ستەپنوگور سوتى بيشىمبايەۆتىڭ ىنىسىنە راقىمشىلىق جاسادى
استانا. KAZINFORM - بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ ازاماتتىق نەكەدەگى جارى سالتانات نۇكەنوۆانىڭ ولىمىنە قاتىستى سوتتالعان باقىتجان بايجانوۆ ستەپنوگور سوتىنىڭ ۇكىمى بويىنشا راقىمشىلىققا ءىلىندى.
- ستەپنوگور قالالىق سوتى قىلمىستىق اتقارۋ جۇيەسىنىڭ مەكەمەسىنەن سوتتالعان ب-نىڭ جازا مەرزىمىن «كونستيتۋتسياسىنىڭ وتىز جىلدىعىنا بايلانىستى راقىمشىلىق جاساۋ تۋرالى» زاڭدى قولدانا وتىرىپ قىسقارتۋ تۋرالى تۇسكەن ۇسىنىمدى قارادى.
سوت ب-نىڭ 2024 -جىلدىڭ 13-مامىرىندا اۋدانارالىق مامانداندىرىلعان قىلمىستىق سوتتىڭ ۇكىمىمەن قىلمىستىق كودەكستىڭ 432-بابى بويىنشا 4 جىلعا باس بوستاندىعىنان ايىرىلعانىن انىقتادى. سوت سوتتالعان ازاماتقا قاتىستى ۇسىنىمدى مىنانداي نەگىزدەرگە سۇيەنە وتىرىپ قاعاناتتاندىردى.
قىلمىستىق كودەكستىڭ 78-بابىنىڭ 2-بولىگىنە سايكەس، اۋىر جانە اسا اۋىر قىلمىس جاساعانى ءۇشىن تاعايىندالعان جازا مەرزىمىن قىسقارتۋعا بولادى.
كونستيتۋتسياسىنىڭ وتىز جىلدىعىنا بايلانىستى راقىمشىلىق جاساۋ تۋرالى» زاڭ بويىنشا نەگىزگى جازانىڭ نەمەسە وتەلمەگەن بولىكتىڭ مەرزىمى شىعىن وتەلگەن جاعدايدا نەمەسە شىعىن كەلتىرىلمەگەن جاعدايدا ۇشتەن ءبىر بولىگىنە دەيىن قىسقارتىلادى.
سوت ۇكىمىمەن ب-دان ءوندىرىپ الىنۋى كەرەك بولعان ءماجبۇرلى تولەمدەر مەن پروتسەسسۋالدىق شىعىندار تولىق كولەمدە وتەلدى.
سوت قاۋلىسى قىلمىستىق اتقارۋ جۇيەسى مەكەمەسىنىڭ سوتتالعان ب- نىڭ جازا مەرزىمىن قىسقارتۋ تۋرالى ۇسىنىمىن قاناعاتتاندىردى، - دەپ جازىلعان قالالىق سوت تاراتقان رەسمي مالىمەتتە.
وسىلايشا سوت باقىتجان بايجانوۆتىڭ ەندى وتەيتىن جازا مەرزىمىن 1 جىل 4 اي 17 كۇن دەپ بەلگىلەدى.
سوت اكتىسى كۇشىنە ەنگەن جوق.
ايتا كەتەلىك باقىتجان بايجانوۆ راقىمشىلىققا ءوتىنىش بەرگەن ەدى.
بۇعان دەيىن 24 جىلعا قامالعان ەكس-شەنەۋنىك قۋاندىق بيشىمبايەۆقا تۇرمەدە ءالى جۇمىس تابىلماعانىن جازعان ەدىك.