ستەند اتۋدان ازيا كۋبوگىندا قازاقستاندىقتار تاعى دا تۇعىر بيىگىنەن كورىندى

استانا. KAZINFORM - الماتى وبلىسىندا ءوتىپ جاتقان ستەند اتۋدان ازيا كۋبوگىندا قازاقستان قورجىنى تاعى بىرنەشە مەدالمەن تولىقتى، دەپ حابارلايدى Olympic.kz.

ەرلەر اراسىنداعى «دۋبل-تراپ» باعدارلاماسىندا قازاقستان قۇراماسى كۇمىس مەدال جەڭىپ الدى. بۇل باسەكەدە ەل نامىسىن الىشەر ايسالبايەۆ، ۆلادلەن كاليمۋلين جانە نيكيتا چيكۋلايەۆ قورعادى.

ۆلادلەن كاليمۋلين «دۋبل-تراپ» بويىنشا جەكەلەي سىندا قولا مەدال يەلەندى. سونداي- اق «تراپ» ساناتىنداعى جاسوسپىرىمدەر اراسىنداعى كوماندالىق سىندا قازاقستان قۇراماسى التىن مەدالعا قول جەتكىزدى.

«تراپ» جاتتىعۋى بويىنشا ايەلدەر اراسىنداعى كوماندالىق سىندا ايجان دوسماعامبەتوۆا، اناستاسيا پريلەپينا جانە كارينا پوچيۆالوۆادان قۇرالعان قازاقستان كومانداسى قولا مەدال ەنشىلەدى.

«تراپ» جاتتىعۋىنان ەرلەر اراسىنداعى كوماندالىق سىندا قازاقستان قۇراماسى (الىشەر ايسالبايەۆ، مارك پوچيۆالوۆ، ۆيكتور حاسيانوۆ) كۇمىس مەدال يەلەندى.