ۇستەل تەننيسىنەن وليمپيادا جولداماسىنا كىمدەر تالاسادى

استانا. KAZINFORM - وزبەكستان استاناسى تاشكەنت قالاسىندا 17-19-مامىر ارالىعىندا وتەتىن ليتسەنزيادىق تۋرنيرگە قاتىساتىن قازاقستان قۇراماسىنىڭ سپورتشىلارى بەلگىلى بولدى.

ق ر ۇلتتىق وليمپيادالىق كوميتەتى ءمالىم ەتكەندەي، تاشكەنتتە وتەتىن اتالمىش دودا سوڭعى ورتالىق ازيا ايماقتىق ىرىكتەۋ تۋرنيرى بولماق. تۋرنير بارىسىندا پاريج وليمپياداسىنىڭ ليتسەنزياسى ساراپقا سالىنادى.

وليمپيادا جولداماسىنا قازاقستان ساپىنان تومەندەگى سپورتشىلار تالاسادى:

كيريلل گەراسيمەنكو، الان كۇرمانعاليەۆ، سارۆينوز ميركاديروۆا، اناستاسيا لاۆروۆا.

قازىرگى تاڭدا وقۋ-جاتتىعۋ جيىنىن اياقتاعان سپورتشىلار تاشكەنتكە ۇشىپ كەتتى.

«ءبىزدىڭ الدىمىزدا ءتورتجىلدىقتىڭ باستى دوداسىنا جولداما بەرەتىن جارىسقا جاقسى دايىندىقپەن بارىپ، ەرلەر مەن ايەلدەر اراسىندا ءبىر- بىردەن، جالپى ەسەبى ەكى جولداما الۋ مىندەتى تۇر. قازىرگى تاڭدا سپورتشىلارىمىزدىڭ دايىندىعى جامان ەمەس. قاڭتار ايىنان بەرى جوسپارلانعان تۋرنيرلەردىڭ بارىنە قاتىستىق. جاتتىعۋ جيىنىندا جەكەلەگەن قاتەلىكتەرمەن جۇمىس ىستەپ، ءاربىر تەننيسشىنىڭ ويىن مانەرىن جەتىلدىرۋگە تىرىستىق. تاشكەنتتە يران، وزبەكستان، قىرعىز رەسپۋبليكاسى، تۇرىكمەنستان جانە قازاقستان سپورتشىلارى وليمپيادالىق كۆوتانى ءوزارا ساراپقا سالادى. ءبىز وزبەكستان استاناسىنا جولداما الۋ ءۇشىن بارامىز»، - دەيدى باس باپكەر ەلميرا اليەۆا.

اتالعان تۋرنيردە تەك جەڭىسكە جەتكەن سپورتشىلار عانا جولداماعا قول جەتكىزەدى.

اۆتور كۇنسۇلتان وتارباي