ستۋدەنتتەردىڭ جاتاقحانا ماسەلەسىن شەشۋگە ارنالعان ءبىرىڭعاي جەلى قوسىلدى
استانا. KAZINFORM - بيىل 10576 ورىندىق 27 جاتاقحانا پايدالانۋعا بەرىلەدى. بۇل تۋرالى ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى.
«ستۋدەنتتەر ءۇشىن وقۋ جىلىنىڭ باسىندا ماڭىزدى ماسەلەلەردىڭ ءبىرى - جاتاقحانا ماسەلەسى. قازىرگى كەزدە الماتى مەن استانا قالالارىندا جاتاقحانا بويىنشا قيىندىق بار. بۇل ماقساتتا جاتاقحانالار سالۋعا ارنالعان مەملەكەتتىك تاپسىرىس مەحانيزمى وڭتايلاندىرىلدى»، - دەدى س. نۇربەك.
سونىمەن قاتار مينيسترلىك باعدارلامالىق مەملەكەتتىك جانە جەكەشەلىك سەرىكتەستىك ەنگىزۋ باعىتىندا جۇمىس اتقارىپ جاتىر. جەكە ينۆەستورلاردى تارتۋ مەحانيزمى (0 مەملەكەتتەن جانە p ينۆەستوردان) جوعارى وقۋ ورىندارىنىڭ ينفراقۇرىلىمىن نىعايتۋعا باعىتتالعان.
«جالپى، 2024 -جىلعا 10576 ورىندىق 27 جاتاقحانانى تاپسىرۋ جوسپارلانعان (ونىڭ ىشىندە ج و و ستۋدەنتتەرى ءۇشىن 8473 ورىندىق 19 جاتاقحانا، كوللەدج ستۋدەنتتەرىنە 2103 ورىندىق 8 جاتاقحانا)»، - دەدى مينيستر.
ۆەدومستۆو مالىمەتىنە قاراعاندا، قازىرگى كەزدە 2369 ورىندىق 10 جاتاقحانا ىسكە قوسىلدى (تۇركىستان وبلىسىندا 70 ورىندىق 1 جاتاقحانا، جامبىل وبلىسىندا 100 ورىندىق 1 جاتاقحانا، اتىراۋ وبلىسىندا 490 ورىندىق 1 جاتاقحانا، پاۆلودار وبلىسىندا 189 ورىندىق 1 جاتاقحانا، الماتى قالاسىندا 490 ورىندىق 2 جاتاقحانا، شىمكەنت قالاسىندا 930 ورىندىق 3 جاتاقحانا).
س. نۇربەكتىڭ سوزىنە قاراعاندا، ستۋدەنتتەردىڭ وقۋ جىلىنىڭ باسىندا كوپتەپ كەلۋىن ەسكەرە وتىرىپ، مينيسترلىك ءبىرىڭعاي كولل- ورتالىق جانە احۋال ورتالىعىن ۇيىمداستىردى. سونداي- اق، ستۋدەنتتەردى جاتاقحانالارعا ورنالاستىرۋ كۇندەرىندە ءاربىر جوعارى وقۋ ورنىندا كومەككە مۇقتاج ستۋدەنتتى قولداۋ ءۇشىن ءتيىستى ورتالىقتار جۇمىس ىستەيتىن بولادى.
بۇدان بۇرىن حابارلانعانداي، بۇگىن ۇكىمەت وتىرىسىندا پرەمەر- مينيستر ولجاس بەكتەنوۆ قالاعا كەلگەن بىردە-ءبىر ستۋدەنت باسپاناسىز قالماۋى ءتيىس ەكەنىن تاپسىردى.