ستۋدەنتتەر ءسۇت بەزىنىڭ قاتەرلى ىسىگىن ەمدەۋ ءادىسىن ويلاپ تاپتى

استانا. قازاقپارات - قازاقستاندىق جاس عالىمدار ءسۇت بەزىنىڭ قاتەرلى ىسىگىن ەمدەۋ ءادىسىن ويلاپ تاپتى، دەپ حابارلايدى 24KZ.

ولار باكتەريا تەراپياسىن قولدانۋدى ۇسىنىپ وتىر. نازاربايەۆ ۋنيۆەرسيتەتى ستۋدەنتتەرىنىڭ بۇل جوباسى پاريجدە وتكەن حالىقارالىق بايقاۋدا ۇزدىك اتاندى. الەمدە ءسۇت بەزىنىڭ قاتەرلى ىسىگىنە شالدىققاندار كوبەيىپ بارادى. وبىر دياگنوزىنىڭ !- ءى ءدال وسى دەرتكە تيەسىلى. قازاقستاندىق ستۋدەنتتەر بۇل اۋرۋدى ەمدەۋدىڭ جاڭا ءادىسىن ازىرلەۋگە ءبىر جىلعا جۋىق ۋاقىت جۇمساعان. ناتيجەسىندە گيدروگەلدىڭ كومەگىمەن تىڭ جوبا دايىنداپ شىقتى.

راۋان مۇرات ۇلى، ستۋدەنت:

- مىسالى، 2 پاپكا دەيىك كومپيۋتەردەگى. سول جاقتان ءبىر فايلدى ەكىنشى پاپكاعا كوشىرەمىز. سونداي سياقتى. قاتەرلى ىسىكتى ەمدەيتىن ءنار ۋىزدىڭ د ن ك- سىن سالامىز. سول د ن ك بويىنشا ءبىزدىڭ باكتەريا سول ءدارىنى جاساي بەرەدى. سونى سىرتقا شىعارادى دا، سول ءدارى ءسۇت بەزىنىڭ قاتەرلى ىسىگىن ولتىرە بەرەدى. گيدروگەلدى قولدانامىز، سەبەبى گيدروگەل بارلىق باكتەريانى ۇستاپ الادى جانە باكتەريا ەشقايدا قوزعالمايدى.

دارىگەرلەر قاتەرلى ىسىكتى حيميا جانە راديوتەراپيا ادىستەرى ارقىلى ەمدەيدى. دەگەنمەن ونىڭ ادام دەنساۋلىعىنا كەرى اسەرى دە بار. «ال ستۋدەنتتەر دايىنداعان جوبا مۇنداي زياندى تۇستاردى الدەقايدا سەيىلتەدى»، - دەيدى عالىمدار.

يۆان ۆوروبيەۆ، بيولوگيا عىلىمدارىنىڭ دوكتورى:

- جاس عالىمدار پرەپاراتتىڭ اعزاعا جايىلىپ كەتپەي، قاتەرلى ىسىك جاسۋشالارىنا تىكەلەي جەتۋىن قامتاماسىز ەتكىسى كەلدى. ەكىنشىدەن، پرەپاراتتىڭ ىسىك جاسۋشالارىمەن تولىق ارەكەتتەسۋىن قامتۋدى كوزدەدى. ولاردىڭ بۇل باستاماسى حالىقارالىق زەرتتەۋشىلەردىڭ وڭ باعاسىن الىپ وتىر. الايدا بۇل ءادىستى قولدانىسقا ەنگىزۋ تىم ەرتە.

عالىمداردىڭ ايتۋىنشا، كلينيكالىق زەرتتەۋ الدىندا تاعى تالداۋ جاسالىپ، كەيىن جانۋارلار ارقىلى سىناقتان وتكىزىلۋى ءتيىس. پاريج تورىندە وتكەن حالىقارالىق بايقاۋدا قازاقستاندىق ستۋدەنتتەردىڭ جوباسى ۇزدىك اتاندى. سونىمەن قاتار جاس عالىمدارىمىزدىڭ زەرتحانالىق ەرىتىندىلەر دايىندايتىن قۇرىلعىسى ءۇشىن «ۇزدىك قۇرال-جابدىق» جۇلدەسى دە بەرىلدى.