ستارتاپ جوبالار بويىنشا قازاقستان جاقسى قارقىن الدى - ساراپشى
استانا. قازاقپارات - Kazinform اگەنتتىگىنىڭ BIZDIÑ ORTA پودكاسىندا وتاندىق IT ماماندار قازاقستانداعى ستارتاپتاردى قولداۋ دەڭگەيىنە باعا بەردى.
- ەرتەرەكتە ءتيىستى ەكوجۇيەنىڭ بولماۋىنان بىزدە ستارتاپتار باياۋ دامىدى. ماسەلەن، 2015 -جىلى شەتەلدە ستارتاپتارعا ينۆەستيتسيا كوپتەپ تارتىلدى. ال قازاقستاندا Astana Hub پايدا بولعالى جانە الماتىدا Most IT Hub اشىلعالى ستارتاپتاردىڭ ۇلەسى كۇرت ارتتى. Astana Hub-تا ينۆەستيتسيا تارتۋ ءۇشىن الەۋەتى جوعارى جوبالاردى تانىستىرۋ مۇمكىندىگى مول. جالپى، كەيىنگى جىلدارداعى باستامالاردىڭ ارقاسىندا قازاقستاندا، ورتالىق ازيادا جاقسى ناتيجە بەرەتىن ستارتاپتار جاقىندا ارادا كوبەيەدى دەپ سانايمىن، - دەدى SHAI ستارتاپىنىڭ نەگىزىن قالاۋشى الىبەك پولاتوۆ.
ءوز كەزەگىندە SmarTestPrep جوباسىنىڭ نەگىزىن قالاۋشىلاردىڭ ءبىرى مەيرام جاردايەۆتىڭ پايىمىنشا، ستارتاپ جوبالاردى جۇزەگە اسىرۋ باعىتىندا قازاقستان جاقسى قارقىنمەن دامىپ كەلەدى.
- ءبىز ەشكىمنەن قالىس كەلە جاتقان جوقپىز. الپاۋىت ەلدەردە بۇل سالاعا بۇرىننان ەكپىن قويىپ كەلەدى. تاۋەلسىزدىك العانىمىزعا دا سونشالىقتى كوپ ۋاقىت بولمادى. مەنىڭ ويىمشا، 2035 -جىلعا دەيىن IT سالادا ەداۋىر ناتيجە بولادى. اتاپ ايتقاندا، قازاقستاندا ەكوجۇيە جاقسى دامىپ جاتىر، ياعني جاقسى مۇمكىندىكتەر بارشىلىق. Astana Hub-تا، نازاربايەۆ ۋنيۆەرسيتەتىندە جاقسى جاعدايلار جاسالعان، سونداي-اق الماتى دا ءبىراز باعدارلامالار بار. ستۋدەنتتەر مەن جاس مامانداردىڭ ستارتاپتارىن قولداۋعا ەرەكشە ءمان بەرىلگەن. قازاقستاننىڭ E-gov جۇيەسىنىڭ ءوزى شەتەلدىڭ ءبىرازىن تاڭعالدىرعان. سمارفونعا جۇكتەگەن وسى ءبىر قوسىمشا ارقىلى ءبىرقاتار قىزمەتتى الۋعا بولادى. ودان بولەك، بىزدە كۇندەلىكتى پايدالانىپ جۇرگەن ءبىراز وزىق پلاتفورما بار. سوندىقتان سيفرلاندىرۋ جاعىنان قازاقستان وتە جاقسى ورىندا، - دەدى م. جاردايەۆ.
ەسكە سالساق، بيىل ءساۋىر ايىندا پارلامەنت ماجىلىسىندە Astana Hub پەن يننوۆاتسيالىق تەحنولوگيالار پاركىن بىرىكتىرۋ تۋرالى زاڭ جوباسى ءبىرىنشى وقىلىمدا تالقىلاندى. سول كەزدە سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ Astana Hub-تان قولداۋ كورىپ، حالىقارالىق نارىققا شىققان يننوۆاتسيالىق ستارتاپتاردىڭ قازىرگى جاي- كۇيىنە توقتالدى.