Starlink ينتەرنەتىنىڭ اي سايىنعى تولەمى 20-25 مىڭ تەڭگە بولۋى مۇمكىن

استانا. قازاقپارات - Starlink ينتەرنەتى بيىل قوسىلادى، ءبىراق باعاسى قىمبات بولادى. بۇل تۋرالى سيفرلىق دامۋ، يننوۆاتسيالار جانە ايەروعارىش ونەركاسىبى ءمينيسترى جاسلان ماديەۆ ءماجىلىس وتىرىسىندا ايتتى.

- Starlink بيىلعى جىلدىڭ 3-توقسانىندا بۇكىل ەل اۋماعىندا تولىق كولەمدە ناقتى جۇمىس ىستەي باستايدى، ونى كەز كەلگەن ازامات پايدالانا الادى. قازىر كومپانيا باعاسىن بەلگىلەپ، جەرگە قوندىرۋ نۇكتەسى بويىنشا تەحنيكالىق ماسەلەلەردى انىقتاپ جاتىر. الايدا ول وپتيكالىق ينتەرنەتكە قاراعاندا ءسال قىمباتىراق، سوندىقتان ازاماتتاردا ءاردايىم تاڭداۋ قۇقىعى بولادى، - دەدى ج. ماديەۆ.

ءماجىلىس دەپۋتاتى نۇرتاي سابيليانوۆتىڭ ايتۋىنشا، Starlink ينتەرنەتىنىڭ اي سايىنعى ابونەنتتىك تولەمى - 20-25 مىڭ تەڭگە بولۋى مۇمكىن.

- اۋىلداردى Starlink سپۋتنيكتىك جۇيەسىنە نەگە قوسپايدى دەپ سۇراپ جاتىر. ول قوسىلادى. وعان ەشكىم قارسى ەمەس. ءبىراق ونىڭ باعاسى قىمبات، ابونەنتتىك اي سايىنعى تولەمى كەم دەگەندە 20-25 مىڭ بولادى. اقشاسى بارلار ونى تولەپ الا بەرەدى، ال قاراپايىم حالىقتى كىم ويلايدى؟ - دەدى ءماجىلىس دەپۋتاتى نۇرتاي سابيليانوۆ.

ايتا كەتەيىك، 12- ماۋسىمدا قازاقستان سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگى مەن Starlink كومپانياسى (SpaceX- ءتىڭ ەنشىلەس قۇرىلىمى) سپۋتنيكتىك ينتەرنەت قىزمەتىن قازاقستان اۋماعىندا رەسمي ىسكە قوسۋ تۋرالى كەلىسىمگە قول قويدى.

بيىل دا ەلىمىزدە Starlink جۇيەسىن ورناتۋ جالعاساتىنىن جازعان بولاتىنبىز.

اۆتور

ايجان سەرىكجان قىزى