2026 -جىلعى 28-ناۋرىزدا باس كونسۋلدىق قىزمەتكەرلەرى اتالعان كەنتتە جۇمىس ىستەيتىن قازاقستان ازاماتتارىمەن، ونىڭ ىشىندە تۇرمىستىق جانجال سالدارىنان ۇستالعان ازاماتتارمەن كەزدەسۋ وتكىزدى.
كونسۋلدىق مالىمەتىنشە، ۆاحتالىق كەنتتە شامامەن 15 مىڭ ادام تۇرادى. ولاردىڭ بارلىعى رەسەيدىڭ ءىرى ەكسپورتتىق پورتتارىنىڭ ءبىرىن سالۋعا قاتىسىپ جاتقان ءتۇرلى مەردىگەر ۇيىمداردىڭ قىزمەتكەرلەرى.
الدىن الا دەرەكتەر بويىنشا، تارتىپسىزدىككە بىرنەشە ءجۇز ادام قاتىسقان. وقيعادان كەيىن ءارتۇرلى ەلدەردىڭ 30 دان استام ازاماتى ۇستالدى. تەرگەۋ ارەكەتتەرى جۇرگىزىلگەننەن كەيىن ۇستالعانداردىڭ باسىم بولىگى بوساتىلدى.
سونىمەن قاتار ءبىرقاتار ازاماتتارعا، ونىڭ ىشىندە قازاقستان ازاماتتارىنا قاتىستى 10 تاۋلىككە اكىمشىلىك قاماۋعا الۋ تۋرالى سوت شەشىمى قابىلداندى. تاعى ءۇش قازاقستاندىققا قاتىستى تەرگەۋ جالعاسىپ جاتىر.
- قازاقستان ازاماتتارى اراسىندا زارداپ شەككەندەر نەمەسە مەديتسينالىق كومەككە مۇقتاج ادامدار جوق. بارلىعىنا قاجەتتى كونسۋلدىق-قۇقىقتىق كومەك كورسەتىلۋدە، - دەپ مالىمدەدى باس كونسۋلدىق.
بۇدان بولەك، ۆاحتالىق كەنتتىڭ وزىندە جۇمىسشىلار، بريگاديرلەر، رەسەيدىڭ قۇقىق قورعاۋ ورگاندارى، جۇمىس بەرۋشى كومپانيا جانە كۇزەت اگەنتتىگى وكىلدەرىنىڭ قاتىسۋىمەن كەزدەسۋ ءوتتى.
كەزدەسۋ بارىسىندا جاعداي جان-جاقتى تالقىلانىپ، الداعى ۋاقىتتا وسىنداي وقيعالاردىڭ الدىن الۋ شارالارى قاراستىرىلدى.
قازىرگى ۋاقىتتا كەنتتەگى جاعداي تۇراقتى. وقيعاعا قاتىسقان تاراپتارعا قاتىستى تەرگەۋ ءىس-شارالارى جالعاسىپ جاتىر. تەرگەۋ قورىتىندىسى بويىنشا جانجالعا قاتىسۋشىلاردىڭ ارەكەتتەرىنە قۇقىقتىق باعا بەرىلەدى.
ايتا كەتەيىك، 27-ناۋرىز كۇنى الەۋمەتتىك جەلىلەردە رەسەيدەگى قۇرىلىس نىساندارىنىڭ بىرىندە بولعان جاپپاي توبەلەستىڭ ۆيدەوسى قىزۋ تالقىعا ءتۇستى. بۇلاردىڭ اراسىندا قازاقستان ازاماتتارى بولۋى مۇمكىن ەكەنى ايتىلدى. ءوز كەزەگىندە ق ر سىرتقى ىستەر مينيسترلىگى شۇعىل تەكسەرۋ جۇمىستارىن باستاعانىن مالىمدەدى.
كەلەسى كۇنى وقيعاعا قاتىسقان قازاقستاندىقتار اراسىندا اۋىر جاراقات العاندار جوق ەكەنى بەلگىلى بولدى.