ساپيەۆتىڭ سوزىنشە، قوماقتى قارجى تۋرالى ۇسىنىس گەننادي گولوۆكيننىڭ جەكپە-جەگىنە بارعان كەزدە جاسالعان. سول جەردە سەرحيو مارتينەسپەن بايلانىسى بار پروموۋتەر قازاقستاندىق بوكسشىمەن كەلىسىمشارت جاساسۋ ءۇشىن ءبىر ميلليون دوللار تولەۋگە دايىن ەكەنىن جەتكىزگەن.
الايدا ساپيەۆ اعىلشىن ءتىلىن بىلمەگەندىكتەن، ۇسىنىستى بىردەن تۇسىنبەگەن. پروموۋتەر كەتىپ قالعان سوڭ عانا ونىڭ ايتقان سوزدەرىن اۋدارىپ بەرگەن.
وليمپيادا چەمپيونى سول ۋاقىتتا اقشا تابۋدى باستى ماقسات ەتپەگەنىن اتاپ ءوتتى. ويتكەنى ول سپورتتىق مانسابىن اياقتاپ، قازاقستان بوكس فەدەراتسياسىندا قىزمەت اتقارىپ، كەيىن «Astana Arlans» كلۋبىن باسقارعان.
- ول كەزدە اقشا تابۋ تۋرالى كوپ ويلاعان جوقپىن. بوكستان كەتكەنىمە ءبىر جارىم جىلداي ۋاقىت بولعان ەدى. ەگەر كاسىپقوي بوكسقا اۋىسسام، وليمپياداداعىداي دەڭگەيدە ونەر كورسەتە المايمىن دەپ ويلادىم. ارينە، سپورتتىق بابىمدى قايتا جيناۋعا بولاتىن شىعار. ءبىراق سول كەزدە بۇرىنعى دەڭگەيىمدى كورسەتە المايتىن بولسام، كاسىپقوي بوكسقا بارۋدىڭ قاجەتى قانشا دەگەن وي بولدى، - دەدى ساپيەۆ.
ايتا كەتەيىك، سەرىك ساپييەۆ 2012-جىلى لوندون وليمپياداسىندا التىن مەدال جەڭىپ الىپ، تۋرنيردىڭ ەڭ تەحنيكالىق شەبەر بوكسشىسىنا بەرىلەتىن ۆەل باركەر كۋبوگىن يەلەنگەن.
سونداي-اق ول ەكى دۇركىن الەم چەمپيونى (2005، 2007)، ەكى دۇركىن ازيا چەمپيونى (2007، 2009) جانە 2010-جىلعى ازيا ويىندارىنىڭ جەڭىمپازى اتانعان.
ساپيەۆ 2012-جىلدىڭ جەلتوقسانىندا سپورتتىق مانسابىن اياقتاعان. ونىڭ ايتۋىنشا، ميلليون دوللارلىق ۇسىنىستان باس تارتۋىنا قارجىدان گورى ءوزىنىڭ سپورتتىق دەڭگەيىن ساقتاپ قالۋعا دەگەن ۇمتىلىسى اسەر ەتكەن.
ايتا كەتەلىك ءالىمحان ۇلى مەن بانكتىڭ تيتۋلدىق جەكپە-جەگىنىڭ وتەتىن ورنى مەن ۋاقىتى ناقتىلانعان ەدى.