سەرىك ساپيەۆ جاڭا قىزمەتكە ۇسىنىلدى
استانا. KAZINFORM - لوندون وليمپياداسىنىڭ چەمپيونى سەرىك ساپيەۆ قاراعاندى وبلىستىق دەنە شىنىقتىرۋ جانە سپورت باسقارماسىنىڭ باسشىسى بولادى. بۇل تۋرالى تۋريزم جانە سپورت مينيسترلىگى حابارلادى.
استانادا ق ر تۋريزم جانە سپورت ءمينيسترى ەربول مىرزابوسىنوۆتىڭ توراعالىعىمەن وڭىرلىك سپورت باسقارمالارىنىڭ باسشىسىن تاعايىنداۋ بويىنشا كوميسسيا وتىرىسى ءوتتى. وتىرىستا قاراعاندى جانە پاۆلودار وبلىستارىنىڭ دەنە شىنىقتىرۋ جانە سپورت باسقارمالارىنىڭ باسشىلىعىنا ۇسىنىلعان ەكى ۇمىتكەردىڭ كانديداتۋراسى قاراستىرىلدى.
اتاپ ايتقاندا، قاراعاندى وبلىستىق دەنە شىنىقتىرۋ جانە سپورت باسقارماسىنىڭ باسشىلىعىنا بوكستان لوندون وليمپياداسىنىڭ چەمپيونى سەرىك ساپيەۆتىڭ، ال پاۆلودار وبلىستىق دەنە شىنىقتىرۋ جانە سپورت باسقارماسىنىڭ باسشىلىعىنا ق ر تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتى ءتوراعاسىنىڭ ورىنباسارى ازامات يماشيەۆتىڭ كانديداتۋراسى ۇسىنىلىپ، كوميسسيا مۇشەلەرى كەلىسىمىن بەردى.
جيىن بارىسىندا كوميسسيا مۇشەلەرى ۇمىتكەرلەردىڭ سالاداعى تاجىريبەسى مەن ءوڭىر سپورتىن دامىتۋعا قاتىستى جوسپارىنا، سونداي-اق سپورت عىلىمىنىڭ نەگىزدەرى مەن مەنەدجمەنتىن مەڭگەرگەندىگى جونىندە سۇراقتار قويدى.
«مەملەكەت باسشىسى قاسىم-جومارت توقايەۆ جازعى وليمپيادا جۇلدەگەرلەرىمەن كەزدەسۋىندە ءاربىر ءوڭىر قانداي سپورت ءتۇرىن دامىتۋ كەرەكتىگىنە قاتىستى شەشىمدى دەربەس قابىلدايتىنىن سىنعا العان بولاتىن. وسىعان وراي، پرەزيدەنت سپورت سالاسىنداعى بارلىق دەڭگەيدەگى باسقارۋ ۆەرتيكالىن قالپىنا كەلتىرۋ جونىندە ۇكىمەتكە ناقتى تاپسىرما بەردى. ەندى وبلىستىق سپورت باسقارمالارىنىڭ باسشىلىعىنا ۇسىنىلعان ۇمىتكەرلەر ق ر تۋريزم جانە سپورت مينيسترلىگى جانىنان قۇرىلعان كوميسسيانىڭ كەلىسىمىمەن جۇزەگە اسىرىلادى»، - دەدى ەربول مىرزابوسىنوۆ.
ايتا كەتەيىك، كانديداتتاردى جەرگىلىكتى اتقارۋشى ورگان ۇسىنادى جانە تۋريزم جانە سپورت مينيسترلىگى جانىنان قۇرىلعان كوميسسيانىڭ وڭ قورىتىندىسىن العان كانديداتتاردى عانا تاعايىنداۋعا ءتيىس.