كاسىپكەر Instagram جانە WhatsApp ارقىلى جىلقىنىڭ سۇرلەنگەن ەتىن ارزان باعامەن ساتۋ سىلتاۋىمەن ازاماتتاردان الدىن الا تولەم قابىلداپ، تاۋاردى جەتكىزۋ جونىندەگى مىندەتتەمەلەرىن اۋەل باستان ورىنداۋدى نيەت ەتپەگەن.
ساتىپ الۋشىلاردى الداۋ ماقساتىندا ول بۇعان دەيىن ورىندالعان تاپسىرىستار مەن وڭ پىكىرلەردى پايدالانعان، ال الىنعان اقشالاي قاراجاتتى جەكە قاجەتتىلىكتەرىنە جۇمساعان.
ونىڭ قىلمىستىق ارەكەتتەرى ناتيجەسىندە 31 جابىرلەنۋشىگە جالپى سوماسى 1,7 ميلليون تەڭگەدەن استام ماتەريالدىق زالال كەلتىرىلگەن.
سوتتا مەملەكەتتىك ايىپتاۋشى سوتتالۋشىنىڭ كىناسىن تولىق دالەلدەدى.
- سوت ۇكىمىمەن كەلتىرىلگەن زالالدىڭ تولىق وتەلگەنىن ەسكەرە وتىرىپ، وعان پروباتسيالىق باقىلاۋ بەلگىلەنىپ، 2 جىل 8 اي مەرزىمگە باس بوستاندىعىن شەكتەۋ جازاسى تاعايىندالدى. ۇكىم زاڭدى كۇشىنە ەندى. ازاماتتاردى الەۋمەتتىك جەلىلەر مەن مەسسەندجەرلەر ارقىلى ساتىپ الۋ كەزىندە قىراعى بولۋعا شاقىرامىز. تەكسەرىلمەگەن ساتۋشىلارعا الدىن الا تولەم رەتىندە اقشا اۋدارماۋ قاجەت،-دەلىنگەن پروكۋراتۋرا حابارلاماسىندا.
ايتا كەتەيىك، بۇعان دەيىن پوليتسيا ينتەرنەتتەگى ارزان تاۋارلار تۋرالى ۇسىنىستاردان ساق بولۋعا شاقىرعان ەدى. الاياقتار ساتىپ الۋشىلاردى شەكتەن تىس تومەن باعامەن قىزىقتىرىپ، تاۋار ءۇشىن الدىن الا تولەم جاساتادى دا، اقشا تۇسكەننەن كەيىن بايلانىسىن ۇزەدى.