سۋپەركومپيۋتەر 10 كۇننەن كەيىن دايىن بولادى - باعدات مۋسين

استانا. KAZINFORM - «قازاقتەلەكوم» ا ق باسقارما ءتوراعاسى باعدات مۋسين الەۋمەتتىك جەلىدە الماتىدا سۋپەركومپيۋتەر ورناتۋدىڭ جاقىن ارادا باستالاتىنىن ايتتى.

كەشە قويماعا باردىق. «قازاقستاننىڭ بولاشاعى» بولاتىن تەمىر قوندىرعىنىڭ امان- ەسەن كەلگەنىنە كوز جەتكىزىپ، كوڭىلىمىز ورنىنا ءتۇستى. ۆيدەوكارتالار ورنىندا ەكەن، - دەپ جازدى باعدات مۋسين.

ول الماتىدا «قازاقتەلەكوم» دەرەكتەر ورتالىعىنىڭ الاڭىندا مونتاجداۋ جۇمىستارى باستالاتىنىن ايتتى.

ءبىزدىڭ NVIDIA H200 نەگىزىندەگى سۋپەركومپيۋتەرىمىز قازىردىڭ وزىندە ەلدە. جاقىندا الماتىدا- «قازاقتەلەكوم» دەرەكتەر ورتالىعىنىڭ الاڭىندا مونتاجداۋ جۇمىستارىن باستايمىز. 10 كۇننەن كەيىن ول دايىن بولادى. اسىرا سىلتەۋسىز ايتساق، مىقتى زات: 6,7 ميلليون CUDA يادرو، 1600 پەتافلوپ جانە ونداعان تەرابايت GPU جادى، - دەدى قازاقتەلەكوم باسشىسى.

باعدات مۋسين مۇنىڭ ءبارى مەملەكەتتىك ورگاندار، ۇلتتىق كومپانيالار مەن كورپوراتيۆتىك تاپسىرىس بەرۋشىلەرگە قولجەتىمدى بولاتىنى ايتتى.

تەحنوگەندىك اپاتتار مەن قاۋىپ-قاتەر باستالماي تۇرىپ مودەلدەۋ، قالالارداعى ترافيكتى الداعى جىلدارعا ەسەپتەۋ، دارىگەرلەرگە دەرەكتەردىڭ ۇلكەن ماسسيۆتەرى نەگىزىندە تەزىرەك دياگنوز قويۋعا كومەكتەسۋ، قازاق ءتىلىن، مادەنيەتىن، تاريحىن جانە قازىرگى كونتەكستىن تۇسىنەتىن ۇلكەن تىلدىك مودەلدەردى ۇيرەتۋگە بولادى. شەتەلدىك سەرۆەرلەرگە تاۋەلدى بولماي، ءوزىڭىزدىڭ ج ي- ونىمدەرىڭىزدى ىسكە قوسۋعا مۇمكىندىك، - دەدى باعدات مۋسين.

ايتا كەتەلىك سۋپەركومپيۋتەرگە قوسىمشا قۋاتتى چيپتەر جەتكىزىلەتىنى تۋرالى جازعان ەدىك.