مەملەكەت باسشىسى ماجارستان پرەزيدەنتى تاماش شۋيوكپەن كەزدەستى
بۋداپەشت. KAZINFORM - تۇسكى اس فورماتىندا وتكەن كەزدەسۋ بارىسىندا پرەزيدەنتتەر ەكىجاقتى ىنتىماقتاستىقتىڭ كەڭ اۋقىمدى باعىتتارىن تالقىلادى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى ديپلوماتيالىق قارىم-قاتىناس ورناعان وتىز جىلدان استام ۋاقىتتا باۋىرلاس قوس حالىق اراسىندا تىعىز ساياسي ديالوگ، ناتيجەلى ەكونوميكالىق سەرىكتەستىك جانە بەرىك مادەني- گۋمانيتارلىق بايلانىستار جولعا قويىلعانىن اتاپ ءوتتى.
- قازاقستان مەن ماجارستان ورتاق تاريح پەن مادەنيەتكە ارقا سۇيەي وتىرىپ، ەكىجاقتى بەرىك بايلانىس ورناتتى. ەۋروپاداعى العاشقى ەلشىلىگىمىز وسىدان 30 جىل بۇرىن بۋداپەشت قالاسىندا اشىلعان بولاتىن. ەكى ەلدىڭ ناتيجەلى ىنتىماقتاستىقتى دامىتۋدا زور الەۋەتى بار. ماجارستان قازاقستاننىڭ تاۋەلسىزدىگىن العاشقىلاردىڭ ءبىرى بولىپ مويىندادى. مۇنى ەرەكشە اتاپ ءوتۋ كەرەك. مەنىڭ وسى ساپارىم كوپقىرلى ىقپالداستىقتى ودان ءارى تەرەڭدەتۋگە قازاقستان مەن ماجارستاننىڭ نيەتتى ەكەنىن كورسەتەدى، - دەدى قاسىم-جومارت توقايەۆ.
پرەزيدەنت ساۋدا-ەكونوميكالىق جانە ينۆەستيتسيالىق ىنتىماقتاستىق اياسىن كەڭەيتۋدىڭ ماڭىزىنا ايرىقشا توقتالدى. ونىڭ ايتۋىنشا، ەنەرگەتيكا، كولىك- لوگيستيكا، مەتاللۋرگيا، جاڭارتىلاتىن ەنەرگيا كوزدەرى، اۋىل شارۋاشىلىعى، فارماتسيەۆتيكا، تاماق ونەركاسىبى جانە باسقا دا سالالاردى دامىتۋ ماسەلەسىندە ەكى ەلدىڭ مۇددەلەرى ساي كەلەدى.
تاماش شۋيوك قازاقستان مەن ماجارستان گەوگرافيالىق تۇرعىدان الشاق جاتقانىمەن، قوس حالىقتىڭ تاريحى مەن مۇددەسى ورتاق ەكەنىن ايتتى.
- ۇلى جىبەك جولىنىڭ بويىندا ورنالاسقان قازاقستان - بۇگىندە ورتالىق ازيادا ەكونوميكالىق دامۋ تۇرعىسىنان جەتەكشى ەل. ءسىزدىڭ ەلىڭىز ءۇشىن حالىقتار اراسىنداعى دوستىق پەن ىنتىماقتاستىقتى ساقتاۋ - ماڭىزدى باسىمدىق. قازاقستان بەيبىتشىلىك پەن تۇراقتىلىققا زور ۇلەس قوسىپ كەلەدى. بۇگىندە ەلدەرىمىز كوپقىرلى ىنتىماقتاستىقتى نىعايتۋعا جانە تۇراقتى بايلانىستاردى ىلگەرىلەتۋگە كۇش سالىپ وتىر. ءبىزدىڭ مادەني قارىم- قاتىناسىمىز عاسىرلاردان تامىر تارتادى. ماجارلار قازاقتاردىڭ تۇرمىس-سالتىمەن جاقسى تانىس. الماتى قالاسىنىڭ اتاۋى ءبىزدىڭ انا تىلىمىزدە اۋەزدى ەستىلەدى. ويتكەنى حالقىمىز المانى «الما» دەپ ايتادى، - دەدى ماجارستان پرەزيدەنتى.
اڭگىمەلەسۋ بارىسىندا تاراپتار ەكى ەلدىڭ مادەني- گۋمانيتارلىق بايلانىستارىن كۇشەيتۋگە ايرىقشا ءمان بەردى. اسىرەسە، قازاقستان مەن ماجارستاننىڭ جەتەكشى جوعارى وقۋ ورىندارى اراسىنداعى اكادەميالىق جانە عىلىمي بايلانىستى جانداندىرۋ، قوس حالىقتىڭ تاريحي تامىرلاستىعىن تەرەڭ زەرتتەۋ قاجەت ەكەنىنە نازار اۋداردى.
سونىمەن قاتار پرەزيدەنتتەر وڭىرلىك جانە حالىقارالىق كۇن ءتارتىبى، سونىڭ ىشىندە كوپجاقتى قۇرىلىمدار اياسىنداعى ىقپالداستىق جونىندە پىكىر الماستى.
وسىعان دەيىن مەملەكەت باسشىسىنىڭ ماجارستان پرەزيدەنتىمەن كەزدەسۋ ءۇشىن شاندور سارايىنا بارعانىن جازدىق.