سەناتور سولتۇستىك جانە شىعىس وڭىرلەردە حالىق سانىنىڭ كەمۋى ماسەلەسىن كوتەردى

استانا. KAZINFORM -بۇگىن سەناتتىڭ جالپى وتىرىسىندا دەپۋتات امانگەلدى تولاميسوۆ قازاقستانداعى دەموگرافيالىق ساياساتتىڭ وزەكتى ماسەلەلەرىن كوتەردى.

سەناتور قولدانىستاعى دەموگرافيالىق ساياسات فراگمەنتتى جانە ناقتىلانباعان سيپاتتا ەكەنىن اتاپ ءوتتى. دەموگرافيا مەن كوشى- قوندى باسقارۋ فۋنكسيالارى ءارتۇرلى مەكەمەلەر اراسىندا شاشىراڭقى ورنالاسقان، بۇل جۇيەلى تالداۋ، بەلسەندى جوسپارلاۋ مۇمكىندىگىن جوققا شىعارادى. سونىڭ سالدارىنان تۋۋ تومەندەدى جانە حالىقتىڭ قارتايۋى بايقالدى، ايماقتىق الشاقتىق، سولتۇستىك جانە شىعىس ايماقتارداعى حالىق سانىنىڭ كەمۋى، سونداي-اق كوشى-قون اعىنىنىڭ كوبەيۋى جانە ۋربانيزاتسيانىڭ ءوسۋى كورىنىس تاپتى. بۇل قيىندىقتار باسقارۋدىڭ بارلىق دەڭگەيىندە جان-جاقتى كوزقاراس پەن ۇيلەسىمدى كۇش- جىگەردى قاجەت ەتەدى.

- بۇل سىن-قاتەرلەردىڭ كەشەندىلىگى جەكە باستامالاردى ەمەس، ءبىرتۇتاس، ۆەدومستۆوارالىق ۇيلەستىرىلگەن جانە عىلىمي نەگىزدەلگەن ءتاسىلدى قاجەت ەتەدى. تۇجىرىمداما ومىرلىك تسيكلدىڭ تۋعاننان باستاپ بەلسەندى ۇزاق ءومىر سۇرۋگە دەيىنگى بارلىق كەزەڭدى قامتۋعا، اۋماقتىق ساياسات، ەڭبەك ۇتقىرلىعى، رەپرودۋكتيۆتى جانە كوشى-قوندى جوسپارلاۋدى قامتۋى ءتيىس. قازىرگى كونفيگۋراتسيادا دەموگرافيالىق جانە كوشى-قون ساياساتى ءۇشىن ءبىرىڭعاي جاۋاپتى ورتالىق جوق ەكەنىن اتاپ وتكىم كەلەدى. بۇل وكىلەتتىكتەردىڭ بۇلىڭعىرلانۋىنا جانە باسقارۋدىڭ تومەندەۋىنە اكەلەدى. وسىنى ەسكەرە وتىرىپ، قولدانىستاعى مەملەكەتتىك ورگانداردىڭ بىرىنە نورماتيۆتىك دەڭگەيدە ءتيىستى فۋنكسيالاردى بەكىتىپ، كەڭەيتىلگەن ۇيلەستىرۋ مانداتىن بەرۋ نۇسقاسىن قاراستىرۋ ۇسىنىلادى، - دەدى امانگەلدى تولاميسوۆ ۇكىمەت باسشىسىنىڭ اتىنا جولداعان ساۋالىندا.

سەناتور سونىمەن قاتار دەموگرافيا سالاسىنداعى عىلىمي-تالداۋ جۇمىسىن دامىتۋدىڭ ماڭىزدىلىعىن اتاپ ءوتتى. دەموگرافيالىق جانە كوشى-قون پروتسەستەرىن تالداۋدىڭ ۇلتتىق ورتالىعىن قۇرۋ الەۋمەتتىك ءارى ەكونوميكالىق فاكتورلارمەن قوسا جان-جاقتى تالداۋ جۇرگىزۋگە، مەملەكەتتىك ساياساتتى جوسپارلاۋ ءۇشىن دالىرەك بولجامدار جاساۋعا كومەكتەسەدى. سونىمەن قاتار، دەپۋتات دەموگرافيالىق ستراتەگيانى ءتيىمدى ىسكە اسىرۋ ءۇشىن بىلىكتى كادرلاردى دايارلاۋدى قامتاماسىز ەتۋ قاجەت ەكەنىن ايتتى.

ەسكە سالساق، بىلتىر كۇزدە پرەمەر-مينيستر ولجاس بەكتەنوۆ سەنات دەپۋتاتتارىنىڭ دەموگرافيا ماسەلەلەرى بويىنشا مەملەكەتتىك ورگان قۇرۋعا قاتىستى ساۋالىنا جاۋاپ بەردى.