سەناتور قازاق فۋتبولىنداعى باستى پروبلەمالاردى اتادى
استانا. KAZINFORM - سەناتتىڭ جالپى وتىرىسىندا دەپۋتات دارحان قىدىرالى قازاقستان فۋتبولىنا شەتەلدىك لەگيونەرلەردى تارتۋ پروبلەماسىن، قارجىلاندىرۋدىڭ اشىق ەمەستىگى جانە تورەشىلەردىڭ ماتچ ناتيجەلەرىنە قاتىستى داۋلى شەشىمدەرى ماسەلەلەرىن قوزعادى.
دەپۋتات «اتىراۋ- اقتوبە» جانە «اتىراۋ- استانا» كوماندالارى اراسىنداعى سوڭعى ماتچتار تۋرالى تورەشىلەرىنىڭ شەشىمدەرى قوعامدا ۇلكەن رەزونانس تۋدىرعانىن اتاپ ءوتتى. الايدا، بۇل جاعدايلارعا قاتىستى قاتاڭ شارالار قابىلدانبادى، بۇل ۇلتتىق چەمپيوناتتىڭ ادىلدىگىنە كۇمان كەلتىرەدى.
ونىڭ پىكىرىنشە، فۋتبول فەدەراتسياسى قازاقستاندىق تورەشىلەر مەن جاتتىقتىرۋشىلاردى دايىنداۋدى بەلسەندى تۇردە قولداۋى ءتيىس، ويتكەنى قىزمەت ەتەتىن 155 تورەشىنى وقىتۋ دەڭگەيى جوعارى ستاندارتتارعا سايكەس كەلمەيدى. بۇل قازاقستاننىڭ ءالى دە الەمدىك تۋرنيرلەرگە تورەشىلەر شىعارا الماي وتىرعانىن جانە ولاردىڭ دەڭگەيىن كوتەرۋ قاجەت ەكەنىن بايقاتتى.
«ءبىر كەزدەرى بىزبەن دەڭگەيلەس بولعان، قازىر كوماندالارى وليمپيادا ويىندارى مەن الەم، ەۋروپا چەمپيوناتتارىندا كوزگە ءتۇسىپ جۇرگەن گرۋزيا، وزبەكستان سياقتى ەلدەر بالالار فۋتبولىن قولداۋ، ماماندار دايارلاۋ، ينفوقۇرىلىمدى دامىتۋ، ءبىرىڭعاي جۇيە قابىلداۋ، فۋتبول الاڭدارى مەن ستاديوندار سالۋ ارقىلى ناتيجەگە جەتكەنى بەلگىلى»، - دەدى د. قىدىرالى ۇكىمەت باسشىسى مەن باس پروكۋروردىڭ اتىنا جولداعان ساۋالىندا.
ونىڭ ايتۋىنشا، كلۋبتاردى قارجىلاندىرۋ مەن لەگيونەرلەرگە جوعارى جالاقى تولەۋ ماسەلەلەرى ايتىلمايتىن تاقىرىپ، بۇل قارجىنىڭ ءتيىمدى بولىنۋىنە باقىلاۋدى قيىنداتادى.
«ەۋروپانىڭ توپ قۇرامالارىنىڭ باپكەرلەرىنەن ءبىرازىنان كوبىرەك جالاقى الاتىن ۇلتتىق قۇرامانىڭ باس باپكەرىنىڭ ايلىعى قۇپيا. كوپشىلىگى جەرگىلىكتى بيۋدجەتكە بايلاۋلى فۋتبول كلۋبتارىنداعى لەگيونەرلەردىڭ ايلىقتارى دا اشىق ايتىلمايدى. كوپتەگەن مەملەكەتتەردە فۋتبولعا قاتىستى ارنايى زاڭ قابىلدانعان. وسى سالاداعى جۇيەسىزدىك پەن جۇگەنسىزدىكتى رەتتەۋ ءۇشىن بالكىم بىزگە دە فۋتبول تۋرالى ارنايى زاڭ قابىلداۋدىڭ ۋاقىتى كەلگەن شىعار»، - دەدى سەناتور.
بۇدان بۇرىن حابارلانعانداي، جاقىندا ءماجىلىس دەپۋتاتى قازىبەك يسا باس پروكۋرور بەرىك اسىلوۆ پەن سىبايلاس جەمقورلىققا قارسى اگەنتتىك ءتوراعاسى اسقار جۇماعاليعا فۋتبولداعى جەمقورلىق تۋرالى ساۋال جولدادى.
اۆتور
رۋسلان عابباسوۆ