سەناتور شەتەلگە كەتكەن جەتىمدەرگە قازاقستان ازاماتتىعىن الۋعا جاردەمدەسۋدى ۇسىندى

استانا. KAZINFORM - بۇگىن سەناتتىڭ جالپى وتىرىسىندا دەپۋتات دارحان قىدىرالى شەتەلدىكتەر اسىراپ العان بالالاردىڭ تاعدىرىنا قاتىستى باس پروكۋرور بەرىك اسىلوۆتىڭ اتىنا ساۋال جولدادى.

«ەلىمىزدىڭ باس پروكۋروتۋراسى 2014 -جىلى شەتەل اسقان بالالاردىڭ تاعدىرىنا الاڭداپ، ارنايى تەكسەرىس جۇرگىزدى. جەتىم بالالار مەن ولاردى اسىراپ الۋعا نيەت بىلدىرگەن ازاماتتاردىڭ ءبىرىڭعاي مالىمەتتەر جۇيەسىن قۇرۋدى ۇسىندى. بۇل تەكسەرىستىڭ جانە قابىلدانعان شەشىمدەردىڭ ورىندالۋ بارىسى تۋرالى بىزگە بەيمالىم. ايتالىق، وڭتۇستىك افريكا، كەنيا، فيليپپين، مەكسيكا، مالتا، ارگەنتينا سياقتى ەلدەرگە كەتكەن 120 بالا باقىلاۋعا الىندى ما؟ ءبىرىڭعاي مالىمەتتەر جۇيەسى قۇرىلدى ما؟ جاۋاپ كۇتەتىن ساۋالدار كوپ. 20 جىل بۇرىن جاتتىڭ جەتەگىنە كەتكەن جەتىم بالالار ەسەيدى. سوندىقتان بۇل تاقىرىپ تاعى دا كوتەرىلىپ كەلەدى. ماسەلەن، جۋرناليست جانار بايسەمىزوۆا جۇرگىزەتىن Jibek Joly تەلەارناسىنداعى «شەتەلدەگى قازاق بالالارى» جوباسىن تەبىرەنبەي كورۋ مۇمكىن ەمەس. اتا-اناسىن تاپقىسى، تەگىن بىلگىسى كەلەتىندەر دە از ەمەس. سولاردىڭ ءبىرى - جانىبەك. جۋرناليست بەركىنبايەۆتىڭ جازۋىنشا، ارقالىقتا 2002 -جىلى تۋعان ونى 2004 -جىلى سونداعى بالالار ۇيىنەن بەلگيالىق يرينا اسىراپ العان. يسپانيادا تۇراتىن جانىبەك 2023 -جىلى جەلتوقسان ايىندا وسىندا ءوزىنىڭ بيولوگيالىق اناسىن ىزدەپ كەلىپ، الەۋمەتتىك جەلىدە ۇندەۋ جاريالادى. ول اناسىن تاپپاعان كۇيى ەلىنە قايتتى. بۇل جايت قوعامدا ۇلەن رەزونانس تۋعىزدى»، - دەدى د. قىدىرالى.

قازاقستان شەتەل ازاماتتارى اسىراپ العان بالالاردىڭ قۇقىعىن قورعاۋ ماقساتىندا 2010 -جىلى بالالاردى قورعاۋ جانە بالانى شەتەلگە اسىراپ الۋعا قاتىستى كونۆەنتسيانى راتيفيكاتسيالادى.

«بالا قۇقىقتارىن قورعاۋ سالاسىنداعى وكىلەتتى ورگان سانالاتىن وقۋ-اعارتۋ مينيسترلىگىنىڭ مالىمەتىنە سۇيەنسەك، كونۆەنتسياعا قول قويعالى بەرى شەتەلدىك ازاماتتار 158 بالانى اسىراپ العان. سونىڭ ىشىندە 2013-2019 -جىلدارى 157 بالا شەت ەل اسسا، كەيىنگى 4 جىلدا 1 بالا سىرتقا شىققان. كورسەتكىشتىڭ كۇرت تومەندەگەنى قۋانتادى. كونۆەنتسياعا قول قويعانعا دەيىن 1999-2011 -جىلدار ارالىعىندا شەتەلدىكتەر 8805 بالانى اسىراپ العان. ولاردىڭ 5217 سى قازىر كامەلەت جاسىنا تولۋىنا بايلانىستى ەسەپتەن شىعارىلعان. كامەلەتكە تولماعان 3588 بالا تۋرالى مالىمەت الىنىپ تۇرادى. وكىنىشكە قاراي، ەسەپ بەرمەيتىندەر دە از ەمەس. ماسەلەن، وڭتۇستىك افريكا ەلىنە كەتكەن 30 بالادان حابار-وشار جوق. سول سياقتى ا ق ش-تاعى 104، بەلگياداعى 113 بالانىڭ تاعدىرىن بىلمەيمىز. ەڭ سوراقىسى، 1999 -جىلعا دەيىن ەلىمىزدەن قانشا جەتىم بالانىڭ شەتەلگە كەتكەنى تۋرالى مۇلدە مالىمەت جوق»، - دەدى سەناتور.

دەپۋتات 1999 -جىلعا دەيىن شەتەلدە كەتكەن جەتىمدەر تۋرالى دەرەكتەر بويىنشا زەرتتەۋ جۇرگىزۋ، بالالارعا بيولوگيالىق اتا-اناسىن تابۋعا كومەكتەسۋ، سونداي-اق ولاردىڭ قالاۋى بويىنشا ەلىمىزدىڭ ازاماتتىعىن الۋعا جاردەمدەسۋدى ۇسىنىپ وتىر.

اۆتور
رۋسلان عابباسوۆ