سەناتتا تۇرعىن ءۇي جاعدايلارىن جاقسارتۋعا قاتىستى زاڭ قارالادى

استانا. KAZINFORM - سەنات سپيكەرى ماۋلەن اشىمبايەۆتىڭ توراعالىعىمەن پالاتا بيۋروسىنىڭ وتىرىسى ءوتتى. بۇل تۋرالى سەناتتىڭ باسپا ءسوز قىزمەتى حابارلادى.

وندا دەپۋتاتتار 17-قازاندا بولاتىن سەنات وتىرىسىنىڭ كۇن ءتارتىبىن بەكىتتى جانە پالاتانىڭ ءىس-شارالار جوسپارىن ىسكە اسىرۋ اياسىنداعى مىندەتتەردى تالقىلادى.

وتىرىستى اشقان ماۋلەن اشىمبايەۆ الدىمەن وتكەن اپتادا ۇيىمداستىرىلعان الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ XXII وتىرىسى مەن I جاس ءدىني ليدەرلەر فورۋمىن قورىتىندىلادى. سەنات ءتوراعاسى اتالعان ءىس-شارالار بارىسىندا ايتىلعان ۇسىنىستار مەن يدەيالاردىڭ ماڭىزىنا نازار اۋدارىپ، ونىڭ ءبارى 2025 -جىلعى 17-18-قىركۇيەكتە استانادا وتەتىن «دىندەر ديالوگى: بولاشاق جولىنداعى سينەرگيا» تاقىرىبىنا ارنالعان الەمدىك جانە ءداستۇرلى دىندەر كوشباسشىلارىنىڭ VIII سەزىنىڭ پانەلدىك سەسسيالارىندا ەسكەرىلەتىنىن تىلگە تيەك ەتتى.

سونىمەن قاتار سەناتورلار پالاتانىڭ ءىس-شارالار جوسپارىنا سايكەس وسى اپتادا وتكىزىلەتىن كوشپەلى وتىرىستاردىڭ كۇن ءتارتىبىن تالقىلادى. ناقتى ايتقاندا، مەملەكەت باسشىسىنىڭ «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى قازاقستان حالقىنا جولداۋىن ىسكە اسىرۋ شەڭبەرىندە مەملەكەتتىك قىزمەتتى جەتىلدىرۋ، قىلمىستىق جولمەن الىنعان كىرىستەردى جىلىستاتۋدى زاڭداستىرۋعا جانە تەرروريزمدى قارجىلاندىرۋعا قارسى ءىس-قيمىلدى كۇشەيتۋ، سونداي-اق، شارۋالاردى جانار-جاعارمايمەن جانە مينەرالدى تىڭايتقىشتارمەن قامتاماسىز ەتۋ ماسەلەلەرى بويىنشا دەپۋتاتتاردىڭ الداعى جۇمىسى ءسوز بولدى.

بەكىتىلگەن كۇن تارتىبىنە سايكەس سەناتورلار الداعى بەيسەنبىدە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە تۇرعىن ءۇي ساياساتىن رەفورمالاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى قارايدى. قۇجات تۇرعىن ءۇي قاتىناستارى سالاسىنداعى زاڭنامانى ودان ءارى جەتىلدىرۋدى كوزدەيدى.

زاڭ كوممۋنالدىق تۇرعىن ءۇي قورىنان مۇقتاج ادامدارعا تۇرعىن ءۇي بەرۋ نەمەسە جەكە تۇرعىن ءۇي قورىنان جەرگىلىكتى اتقارۋشى ورگان جالداعان تۇرعىن ءۇي بەرۋ، تۇرعىن ۇيگە جالداۋ اقىسىنىڭ ءبىر بولىگىن سۋبسيديالاۋ جانە تۇرعىن ءۇي جاعدايلارىن جاقسارتۋعا ارنالعان تاعى باسقا مەملەكەتتىك قولداۋ شارالارىن بەلگىلەيدى، - دەلىنگەن سەناتتىڭ باسپا ءسوز حابارلاماسىندا.

سونداي-اق بيۋرو وتىرىسىندا ماجىلىستەن كەلىپ تۇسكەن زاڭدار جۇمىس ءۇشىن تۇراقتى كوميتەتتەرگە ءبولىنىپ بەرىلدى.

ەسكە سالساق، سەناتتىڭ وتكەن جالپى وتىرىسىندا مارات قوجايەۆ دەپۋتات رەتىندە انت بەرگەنىن حابارلاعانبىز.