سەناتتا قازاقستان مەن قىتاي ازاماتتارىنىڭ كوشى-قونىنا قاتىستى زاڭ ماقۇلداندى
بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى تاراپتار مەملەكەتتەرىنىڭ ازاماتتارىنا قاتىستى اقپارات الماسۋ تۋرالى كەلىسىمدى راتيفيكاتسيالاۋ تۋرالى» زاڭى ماقۇلداندى، دەپ حابارلايدى قازاقپارات ءتىلشىسى.
كەلىسىمگە مەملەكەت باسشىسىنىڭ قىتايعا ساپارى بارىسىندا بيىلعى 17-مامىردا شيان قالاسىندا قىتاي حالىق رەسپۋبليكاسى جانە قازاقستان رەسپۋبليكاسىنىڭ سىرتقى ىستەر مينيسترلەرى قول قويدى.
زاڭنىڭ ماقساتى - قازاقستان مەن قىتاي ازاماتتارىنا قاتىستى كوشى-قون سالاسىندا اقپارات الماسۋ بويىنشا ءوزارا ءىس-قيمىل جاساۋ.
«بۇل مالىمەتتەر قوس ازاماتتىققا قارسى كۇرەسكە، سونداي-اق زاڭسىز كوشى-قون ارنالارىنىڭ جولىن كەسۋ ءۇشىن قاجەت. شارتتى ىسكە اسىراتىن قۇزىرەتتى ورگاندار رەتىندە قازاقستان جاعىنان ىشكى ىستەر مينيسترلىگى مەن ەڭبەك جانە حالىقتى الەۋمەتتىك قورعاۋ مينيسترلىگى، ال قىتاي جاعىنان سىرتقى ىستەر مينيسترلىگى مەن كوشى-قون ىستەرى بويىنشا مەملەكەتتىك باسقارما بەلگىلەنگەن»، - دەدى سەناتور مۇرات قادىربەك.
اتالعان ورگاندار ازاماتتارىنىڭ دەربەس دەرەكتەرىنىڭ قورعالۋىنا جاۋاپ بەرەدى.
«كەلىسىمدە ەگەمەندىككە، قاۋىپسىزدىككە قاۋىپ تونگەندە جانە زاڭناماعا قايشى كەلگەن جاعدايدا، سۇراۋ سالۋلاردى ورىنداۋدان باس تارتۋ كوزدەلگەن. قازىرگى كەزدە وسىنداي ەكى جاقتى كەلىسىم بەس ەلمەن (ازەربايجان، بەلارۋس، قىرعىزستان، تاجىكستان، وزبەكىستان) جاسالعان. سونداي-اق رەسەيمەن، ارمەنيامەن، قىرعىزستانمەن كوپجاقتى شارت بار. كەلىسىمدى راتيفيكاتسيالاۋ كوشى-قون جانە قوس ازاماتتىققا قارسى ءىس-قيمىل سالاسىندا قازاقستان رەسپۋبليكاسى مەن قىتاي حالىق رەسپۋبليكاسىنىڭ اراسىنداعى ىنتىماقتاستىقتى نىعايتۋعا ىقپال ەتەدى، جانە تاراپتاردىڭ ازاماتتارى تۋرالى اقپارات الماسۋ جونىندە ءتيىستى قۇقىقتىق تەتىكتى جاساۋعا مۇمكىندىك بەرەدى»، - دەدى دەپۋتات.
ءوز كەزەگىندە سەنات ءتوراعاسى ماۋلەن اشىمبايەۆ اتالعان زاڭ اياسىندا اقپارات الماسۋ مەملەكەت مۇددەسىن ەسكەرە وتىرىپ جۇزەگە اسىرىلاتىنىن ايتتى.
«ماقۇلدانعان زاڭ ەكى ەلدىڭ ميگراتسيا سالاسىنداعى قۇزىرەتتى ورگاندارى اراسىنداعى قارىم-قاتىناستى دامىتۋعا وڭ سەپتىگىن تيگىزەدى دەپ سەنەمىز»، - دەدى سەنات ءتوراعاسى.