سەنات «ماسس-مەديا تۋرالى» زاڭدى ماقۇلدادى

استانا. KAZINFORM - پارلامەنت سەناتى ماسس-مەديا تۋرالى ءماجىلىس قابىلداعان نەگىزگى زاڭدى ماقۇلدادى.

پالاتانىڭ الەۋمەتتىك- مادەني دامۋ جانە عىلىم كوميتەتىنىڭ مۇشەسى ايگۇل قاپباروۆانىڭ ايتۋىنشا، «ماسس-مەديا تۋرالى» زاڭعا مىنانداي جاڭاشىلدىقتار ەنگىزۋ كوزدەلگەن:

ءبىرىنشى، مەملەكەتتىك ەمەس بۇقارالىق اقپارات قۇرالدارىنا وتاندىق كونتەنتتى دامىتۋ، قازاقستان رەسپۋبليكاسىنىڭ اقپاراتتىق ەگەمەندىگىن نىعايتۋ جانە قورعاۋ ءۇشىن گرانتتىق قارجىلاندىرۋ بەرىلەتىن بولدى؛

ەكىنشى، بۇقارالىق اقپارات قۇرالىندا جاريالانعان اقپاراتتار بويىنشا جەكە نەمەسە زاڭدى تۇلعالاردىڭ تالاپ قويۋ مەرزىمى ءبىر جىل بولىپ بەلگىلەندى؛

ءۇشىنشى، ب ا ق سۇراۋلارىن قاراۋ مەرزىمى 7 جۇمىس كۇننەن 5 جۇمىس كۇنىنە دەيىن قىسقارتىلدى؛

ءتورتىنشى، ب ا ق قىزمەتىنە ءوزىن-ءوزى رەتتەۋگە، مەديا سالانى دامىتۋعا مۇمكىندىك بەرۋ ماقساتىندا ەرىكتى نەگىزدە قوعامدىق-كاسىپتىك كەڭەس قۇرۋعا جانە جۋرناليستەردىڭ ادەپ كودەكسىن ازىرلەۋگە مۇمكىندىك بەرىلدى؛

بەسىنشى، مەملەكەتتىك تىلدەگى تەلە، راديوباعدارلامالاردىڭ اپتا سايىنعى كولەمىن 50 پايىزدان 60 پايىزعا دەيىن كەزەڭ-كەزەڭىمەن ۇلعايتۋ بەلگىلەندى (2025 -جىلدان باستاپ 55 پايىز، 2027 -جىلدان باستاپ 60 پايىز)؛ التىنشى، وتاندىق تەلە، راديو باعدارلامالاردىڭ جانە قازاقستاندىق اۆتورلاردىڭ/ورىنداۋشىلاردىڭ مۋزىكالىق شىعارمالارىنىڭ وتاندىق تەلە، راديوارنالارداعى كولەمىن 50 پايىزدان 60 پايىزعا دەيىن كەزەڭ- كەزەڭىمەن ۇلعايتۋ (2025 -جىلدان باستاپ 55 پايىز، 2027 -جىلدان باستاپ 60 پايىز) كوزدەلدى؛

جەتىنشى، وتاندىق تەلە، راديوارنالارداعى شەتەلدىك باعدارلامالاردىڭ رەترانسلياتسياسىن 20 پايىزدان 10 پايىزعا دەيىن ازايتۋ پايىز بەلگىلەندى؛

سەگىزىنشى، جۋرناليستىڭ كاسىبي قىزمەتىنىڭ قۇقىقتىق كەپىلدىكتەرىن قامتاماسىز ەتۋ جونىندە نورمالار ەنگىزىلدى.

سونداي-اق، ول قولدانىستاعى ۇلتتىق زاڭنامادا كەزدەسەتىن «بۇقارالىق اقپارات قۇرالدارى» ءسوزى «ماسس-مەديا» سوزىمەن اۋىستىرىلاتىنىن اتاپ ءوتتى.

اۆتور

ەسىمجان ناقتىباي