سەنات كاپيتالدى ەلدەن شىعارۋعا باقىلاۋدى كۇشەيتەتىن زاڭدى ماقۇلدادى

استانا. KAZINFORM - بۇگىن سەناتتىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ترانسفەرتتىك باعا بەلگىلەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكى وقىلىمدا قارالىپ، ماقۇلداندى.

زاڭ مەملەكەت باسشىسىنىڭ ترانسفەرتتىك باعا بەلگىلەۋگە باقىلاۋدى كۇشەيتۋ جونىندەگى تاپسىرماسىن (2020 -جىلعى قازاقستان حالقىنا جولداۋىن ىسكە اسىرۋ جونىندەگى جالپى ۇلتتىق ءىس-شارالار جوسپارىنىڭ 37-تارماعى) ىسكە اسىرۋ ماقساتىندا ازىرلەندى جانە حالىقارالىق ىسكەرلىك وپەراتسيالارداعى جانە حالىقارالىق ىسكەرلىك وپەراتسيالارعا بايلانىستى مامىلەلەردەگى مەملەكەتتىك كىرىستى جوعالتۋدىڭ الدىن الۋعا باعىتتالعان.

زاڭنىڭ مىندەتى - نارىقتىق باعانى ايقىنداۋ ادىستەرىن قولدانۋدى جەتىلدىرۋ، نارىقتىق اۋقىمدى ايقىنداۋ تەتىگىن ەنگىزۋ، كاپيتالدى شىعارۋعا باقىلاۋدى كۇشەيتۋ ماقساتىندا ءوزارا بايلانىستى تاراپتار انىقتاماسىن كەڭەيتۋ، تاۋار بيرجالارىندا جاسالعان مامىلەلەرگە ترانسفەرتتىك باعا بەلگىلەۋ بويىنشا باقىلاۋدى قايتارۋ، ەسەپتىلىككە قويىلاتىن تالاپتاردى جەتىلدىرۋ.

«زاڭ قازاقستان رەسپۋبليكاسىنىڭ ترانسفەرتتىك باعا بەلگىلەۋ سالاسىنداعى زاڭناماسىن جەتىلدىرۋ مەن تيىمدىلىگىن ارتتىرۋعا جانە كاپيتالدىڭ ەلدەن شىعارىلۋىن باقىلاۋ شارالارىن كۇشەيتۋگە، سونداي-اق حالىقارالىق ىسكەرلىك وپەراتسيالارعا بايلانىستى مامىلەلەردەگى مەملەكەتتىك كىرىستى جوعالتۋدى الدىن الۋعا باعىتتالعان. زاڭدا نارىقتىق باعانى انىقتاۋ ادىستەرىن قولدانۋدى جەتىلدىرۋ ەسكەرىلگەن. قازىرگى كەزدە زاڭدا نارىقتىق باعانى انىقتاۋ ءادىسىنىڭ 5 ەرارحياسى قاراستىرىلعان. ماسەلەن، ەگەر سالىق تولەۋشى بەسىنشى ءادىستى قولدانۋ كەرەك دەپ ساناسا، وندا ول الدىمەن الدىڭعى ءتورت ءادىستى قولدانۋ مۇمكىن ەمەستىگى تۋرالى نەگىزدەمەلەر دايىنداۋى كەرەك. وسىعان وراي، حالىقارالىق مامىلەلەردىڭ سيپاتىن ەسكەرە وتىرىپ، ناقتى قاي ءادىستى قولدانۋ كەرەكتىگى انىقتالادى. سالىق تولەۋشىنىڭ دە، تەكسەرۋشىلەردىڭ دە اكىمشىلىك شىعىندارىن ازايتۋعا مۇمكىندىك بەرەدى»، - دەدى سەناتور بەكبولات ورىنبەكوۆ.

ونىڭ ايتۋىنشا، كاپيتالدى شىعارۋعا باقىلاۋدى كۇشەيتۋ ماقساتىندا تاراپتاردىڭ ءوزارا بايلانىستىلىعىن ايقىنداۋدى كەڭەيتۋ ەسكەرىلگەن.

«شيكىزات ونىمدەرىن «ەكسكليۋزيۆتى» ترەيدەرلەرگە تومەندەتىلگەن باعامەن ساتۋ فاكتىلەرى بار. بۇل جاعدايدا قارجىلىق ەسەپتىلىكتى الۋ مۇمكىن ەمەس. تەكسەرىلەتىن مامىلەلەر بويىنشا جەتكىلىكتى اقپاراتتىڭ بولماۋىنا بايلانىستى ەلدەن كاپيتالدى الىپ كەتۋ تاۋەكەلى تۋىندايدى. سوندىقتان ءوزارا بايلانىستى تاراپتار ۇعىمىن كەڭەيتۋ ۇسىنىلدى»، - دەدى دەپۋتات.

سونىمەن قاتار، تاۋار بيرجالارىندا جاسالعان مامىلەلەردى باقىلاۋ قاراستىرىلعان. ترانسفەرتتىك باعا بەلگىلەۋگە قاتىستى باقىلاۋ ەلىمىزدىڭ تاۋار بيرجالارىندا جاسالعان كەلىسىمدەر بويىنشا جۇرمەيدى. بۇل ەلدەن كاپيتالدى سىرتقا شىعارۋعا جاعداي جاسايدى. وسىعان بايلانىستى زاڭنان كورسەتىلگەن نورمانى الىپ تاستاۋ ۇسىنىلدى.

«ەسەپتىلىككە قويىلاتىن تالاپتاردى جەتىلدىرۋگە نازار اۋدارىلدى. قازىرگى كەزدە ءىرى مامىلەلەر بويىنشا جەرگىلىكتى ەسەپتىلىكتى ۇسىنۋ مىندەتى حالىقارالىق توپقا قاتىسۋشىلارعا جۇكتەلگەن. كوزدەلىپ وتىرعان نورمالارمەن جەرگىلىكتى ەسەپتىلىكتى ۇسىنۋ مىندەتى ءوزارا بايلانىستى بەيرەزيدەنت-تۇلعالارمەن مامىلەلەردى جۇزەگە اسىراتىن سالىق تولەۋشىلەرگە جۇكتەۋ ۇسىنىلدى. بۇل تاۋار اينالىمداردىڭ اشىقتىعىن قامتاماسىز ەتۋگە مۇمكىندىك بەرەدى. اتالعان باعىتتار الەمدىك جانە وتاندىق تاجىريبەنى ەسكەرە وتىرىپ زاڭعا ەنگىزىلدى. زاڭنىڭ كۇشىنە ەنۋى وڭ ناتيجەلەر بەرەدى. ياعني تاۋار بيرجالارىندا جاسالعان مامىلەلەر بويىنشا، سونداي-اق ستاتيستيكالىق اۋىتقۋدى قامتىمايتىن نارىقتىق دياپازوندى قولدانۋ ارقاسىندا ەكسپورتتىق باعالار تومەندەتىلمەيدى. بۇل ءوز كەزەگىنلە سالىق سالىناتىن تابىستىڭ ۇلعايۋىنا اكەلەدى. مۇنىمەن قوسا، حالىقارالىق مامىلەلەرگە مونيتورينگ جاساۋ جاقسارادى»، - دەدى بەكبولات ورىنبەكوۆ.

اۆتور

رۋسلان عابباسوۆ