سەنات ءتوراعاسى يران پرەزيدەنتىن ۇلىقتاۋ راسىمىنە قاتىستى

استانا. قازاقپارات - مەملەكەت باسشىسى قاسىم-جومارت توقايەۆتىڭ تاپسىرماسىمەن پارلامەنت سەناتىنىڭ ءتوراعاسى ماۋلەن اشىمبايەۆ يران پرەزيدەنتى ماسۋد پەزەشكياندى ۇلىقتاۋ راسىمىنە قاتىستى.

سونداي-اق پالاتا سپيكەرى يسلام كەڭەسى ءماجىلىسىنىڭ توراعاسىمەن جانە يسلام مادەنيەتى جانە بايلانىستارى ۇيىمىنىڭ باسشىسىمەن كەزدەستى. ەكىجاقتى كەزدەسۋلەر بارىسىندا تاراپتار قازاقستان مەن يران اراسىنداعى قارىم-قاتىناستى ارتتىرۋ جانە پارلامەنتارالىق ىنتىماقتاستىقتى نىعايتۋ ماسەلەلەرىن تالقىلادى.

ماۋلەن اشىمبايەۆ قازاقستان پرەزيدەنتى قاسىم-جومارت توقايەۆتىڭ اتىنان يران يسلام رەسپۋبليكاسىنىڭ جاڭادان سايلانعان پرەزيدەنتى ماسۋد پەزەشكياندى سايلاۋداعى جەڭىسىمەن قۇتتىقتادى. سونىمەن قاتار ول قازاقستان ەكى ەل اراسىنداعى ىنتىماقتاستىقتى ودان ءارى دامىتۋعا باسا ءمان بەرىپ وتىرعانىن اتاپ ءوتتى.

«سىزگە قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆتىڭ قۇتتىقتاۋى مەن جىلى لەبىزىن جەتكىزۋگە رۇقسات ەتىڭىز. مەملەكەت باسشىسى ءبىزدىڭ ەلدەرىمىز اراسىنداعى ەكىجاقتى ساياسي جانە ەكونوميكالىق ىنتىماقتاستىقتى دامىتۋعا ەرەكشە كوڭىل ءبولىپ وتىر. يران -كاسپي وڭىرىندەگى كورشىمىز، سونداي-اق، تاياۋ جانە ورتالىق شىعىستاعى ماڭىزدى ساۋدا سەرىكتەستەرىمىزدىڭ ءبىرى. سوندىقتان يرانمەن قارىم-قاتىناستى نىعايتۋ ءبىزدىڭ سىرتقى ساياساتىمىزداعى باسىم باعىتتاردىڭ ءبىرى بولىپ قالا بەرەدى. بۇل رەتتە قازاقستان پارلامەنتى ءوز تاراپىنان ەلدەرىمىز اراسىنداعى بايلانىستى جان-جاقتى نىعايتۋعا ىقپال ەتەدى»، - دەدى ماۋلەن اشىمبايەۆ.

سونىمەن قاتار سەنات ءتوراعاسى يران تاراپىنا اتالعان ەلدىڭ دەلەگاتسياسى شاڭحاي ىنتىماقتاستىق ۇيىمىنىڭ سامميتىنە بەلسەندى قاتىسقانى ءۇشىن العىس ءبىلدىردى. سامميتتىڭ ناتيجەسىندە ماڭىزدى 25 قۇجات، ونىڭ ىشىندە استانا دەكلاراتسياسى قابىلدانعانى بەلگىلى.

سۇحبات كەزىندە پارلامەنتارالىق ىنتىماقتاستىق ماسەلەلەرى دە ءسوز بولدى. سونىڭ اياسىندا قازاقستان پارلامەنتىنىڭ قوس پالاتاسىندا يرانمەن دوستىق توپتارى جۇمىس ىستەيتىنى ايتىلدى. ودان بولەك، يراننىڭ جاڭارتىلعان پارلامەنتىندە وسىنداي توپ قۇرۋ ەكىجاقتى قارىم-قاتىناسقا وڭ اسەر ەتەتىنىنە دە نازار اۋدارىلدى.

يسلام كەڭەسى ءماجىلىسىنىڭ ءتوراعاسى موحامماد باگەر گاليبافپەن كەزدەسۋدە ماۋلەن اشىمبايەۆ قازاقستان مەن يران پارلامەنتتەرىنىڭ ىنتىماقتاستىعىن ودان ءارى نىعايتۋ پەرسپەكتيۆاسىنا توقتالدى. پالاتا ءتوراعاسى زاڭ شىعارۋ سالاسىنداعى ءوزارا بايلانىستىڭ نەگىزگى باعىتتارىن اتاپ ءوتتى.

«قازاقستان پارلامەنتى يراننىڭ يسلام كەڭەسى ماجىلىسىمەن ءوزارا بايلانىستى ارتتىرۋعا مۇددەلى. ءبىزدىڭ پارلامەنتتەرىمىزدە جۇمىس ىستەپ كەلە جاتقان دوستىق توپتارى پارلامەنتارالىق ىنتىماقتاستىقتىڭ بەرىك نەگىزىن قۇرايدى. بۇل باعىتتا ءوزارا بايلانىستى پراكتيكالىق مازمۇنعا باسىمدىق بەرە وتىرىپ، قالىپتاستىرعان ماڭىزدى. سونداي-اق ەكى ەل ءۇشىن وزەكتى ماسەلەلەردى وڭ شەشۋگە ىقپال ەتۋ جانە زاڭ شىعارۋ ىسىندە تاجىريبە الماسۋ دا ايرىقشا مانگە يە»، - دەدى ماۋلەن اشىمبايەۆ.

بۇدان باسقا، سەنات ءتوراعاسى يسلام مادەنيەتى جانە بايلانىستارى ۇيىمىنىڭ پرەزيدەنتى موحامماد مەحدي يمانيپۋرمەن كەزدەستى. وندا تاراپتار ەكى حالىقتىڭ مادەني جانە رۋحاني بايلانىستارىن نىعايتۋ ماسەلەلەرىنە نازار اۋداردى. بۇل رەتتە جاھاندىق سىن-قاتەرلەردى ەڭسەرۋ جولىندا ءرولى ارتىپ كەلە جاتقان رۋحاني ديپلوماتياعا جانە وسى باعىتتا كۇش بىرىكتىرۋدىڭ ماڭىزىنا اسا ءمان بەرىلدى.

«بيىل قازان ايىندا الەمدىك جانە ءداستۇرلى دىندەر كوشباسشىلارى سيەزى حاتشىلىعىنىڭ XXII وتىرىسىن وتكىزۋ جوسپارلانىپ جاتىر. وندا سەزدى دامىتۋ تۇجىرىمداماسىن ءارى قاراي ىسكە اسىرۋ ماسەلەسى تالقىلانادى. ودان بولەك، كەلەسى VIII سەزدىڭ تاقىرىبى مەن وتكىزۋ مەرزىمى بەكىتىلەدى. سونداي-اق جاس ءدىني ليدەرلەر فورۋمى وتكىزىلەدى. اتالعان ءىس-شارالارعا يران ەلىنىڭ وكىلدەرى بەلسەندى قاتىسادى دەپ ۇمىتتەنەمىز»، - دەگەن ماۋلەن اشىمبايەۆ يران تاراپىنا الەمدىك جانە ءداستۇرلى دىندەر كوشباسشىلارى سەزىنىڭ باستامالارىنا قولداۋ تانىتىپ، فورۋمنىڭ قورىتىندى قۇجاتتارىن ازىرلەۋگە بەلسەندى قاتىسقانى جانە ءدىنارالىق كەلىسىمنىڭ يدەيالارى مەن قۇندىلىقتارىن دارىپتەۋگە قوسقان ۇلەسى ءۇشىن العىس ءبىلدىردى.

اۆتور

اسحات رايقۇل