سەنات ءتوراعاسى يۋنەسكو-نىڭ ينكليۋزيا جونىندەگى حالىقارالىق كونفەرەنسياسىندا ءسوز سويلەدى

  استانا. KAZINFORM - مەملەكەت باسشىسىنىڭ تاپسىرماسىمەن پارلامەنت سەناتىنىڭ ءتوراعاسى، قازاقستان بوچچا فەدەراتسياسىنىڭ پرەزيدەنتى ماۋلەن اشىمبايەۆ پاريجدە جالاۋى جەلبىرەگەن XVII جازعى پاراليمپيادا ويىندارى اياسىنداعى ءىس-شارالارعا قاتىستى.

فرانسياعا جۇمىس ساپارى بارىسىندا پالاتا سپيكەرى يۋنەسكو-نىڭ ينكليۋزيا جونىندەگى كونفەرەنتسياسىندا ءسوز سويلەدى. سونداي-اق يۋنەسكو-نىڭ باس ديرەكتورى ودرە ازۋلەمەن جانە حالىقارالىق پاراليمپيادا كوميتەتىنىڭ پرەزيدەنتى ەندريۋ پارسونسپەن كەزدەستى.

كونفەرەنسيا پاراسپورتتىڭ ينكليۋزيا سالاسىنا بەرەتىن تىڭ اسەرى جانە ونى كەڭىنەن قولدانۋ ماسەلەلەرىنە ارنالدى. قازاقستان بوچا فەدەراتسياسىنىڭ پرەزيدەنتى ءىس- شاراعا قاتىسۋشىلارعا ءىلتيپات ءبىلدىرىپ، پاراليمپيادا ويىندارى قارساڭىندا وسىنداي اۋقىمدى جيىن ۇيىمداستىرعانى ءۇشىن يۋنەسكو-نىڭ باسشىلىعى مەن وكىلدەرىنە العىسىن جەتكىزدى. سونداي-اق ول مۇنداي باستاما ەرەكشە قاجەتتىلىگى بار ادامداردى قولداۋعا جانە وسى الاڭدا ينكليۋزيا مادەنيەتىن دارىپتەۋدىڭ كەلەشەگىن تالقىلاۋعا زور مۇمكىندىك بەرەتىنىن اتاپ ءوتتى. ماۋلەن اشىمبايەۆ بۇل سالا قازاقستاندا سوڭعى جىلداردا ەلىمىزدە مەملەكەت باسشىسى قاسىم-جومارت توقايەۆتىڭ باستاماسىمەن جۇرگىزىلىپ جاتقان رەفورمالاردىڭ باسىم باعىتتارىنىڭ بىرىنە اينالىپ، ايرىقشا ماڭىزعا يە بولعانىن دا تىلگە تيەك ەتتى.

كونفەرەنتسيادا كەشەندى قولداۋدى قاجەت ەتەتىن مۇمكىندىگى شەكتەۋلى ادامداردى وڭالتۋ ماسەلەسىنە باسا ءمان بەرىلدى. سەنات ءتوراعاسى اتاپ وتكەندەي، بۇل باعىتتا مەديتسينالىق اسپەكتىلەرگە عانا باسىمدىق بەرىپ قويماي، ەرەكشە قاجەتتىلىگى بار ازاماتتاردى جۇمىسقا ورنالاستىرۋ، سونداي-اق، ولارعا وزدەرىنىڭ شىعارماشىلىق الەۋەتىن جۇزەگە اسىرۋعا، ساپالى ءبىلىم الۋعا، قوعام ومىرىنە بەلسەندى ارالاسىپ، مەملەكەتتىك باسقارۋ ىسىنە قاتىسۋعا تولىق جاعداي جاساۋ اسا ماڭىزدى.

«قازاقستاندا مەملەكەتتىك ساياساتتا ينكليۋزيۆتى تاسىلدەردى ىسكە اسىرۋعا باسا ءمان بەرىلىپ كەلەدى. ەل پرەزيدەنتى قاسىم-جومارت كەمەل ۇلى توقايەۆتىڭ باستاماسىمەن جۇرگىزىلىپ جاتقان جاڭعىرتۋلار ادىلەتتىلىك قاعيداتىنا تابان تىرەيدى. بارشاعا تەڭ مۇمكىندىك بەرەتىن ينكليۋزيۆتى قوعام قۇرماي ول قاعيداتقا قول جەتكىزە المايمىز. ءبىزدىڭ ماقساتىمىز - ەرەكشە قاجەتتىلىگى بار ازاماتتار بەتپە-بەت كەلەتىن پروبلەمالاردى شەشۋ جولىندا ءداستۇرلى قايىرىمدىلىقتىڭ جانە مەديتسينالىق قولداۋدىڭ اياسىنان شىعۋ. ءبىز ولاردىڭ قوعامعا بەيىمدەلۋىنە جانە ومىردەن ءوز ورىندارىن تابۋىنا جاڭا سەرپىن بەرەتىن ءتيىمدى ەكوجۇيە قالىپتاستىرۋدى كوزدەپ وتىرمىز»، - دەگەن قازاقستان بوچا فەدەراتسياسىنىڭ پرەزيدەنتى قازاقستان زاڭناماسىنداعى ينكليۋزيۆتى ءبىلىم بەرۋدى دامىتۋعا، الەۋمەتتىك كاسىپكەرلىكتى قولداۋعا جانە مۇگەدەكتىگى بار ادامداردىڭ ءومىر ءسۇرۋ ساپاسىن جاقسارتۋعا ارنالعان وزگەرىستەرگە توقتالدى.

حالىقارالىق كونفەرەنسيا بارىسىندا ب ۇ ۇ-نىڭ باس حاتشىسى انتونيو گۋتەرريش، يۋنەسكو-نىڭ باس ديرەكتورى ودري ازۋلە، حالىقارالىق پاراليمپيادا كوميتەتىنىڭ پرەزيدەنتى ەندريۋ پارسونس جانە تاعى باسقالار ءسوز سويلەدى.

سونىمەن قاتار ماۋلەن اشىمبايەۆ حالىقارالىق پاراليمپيادا كوميتەتىنىڭ پرەزيدەنتى ەندريۋ پارسونسپەن كەزدەستى. تاراپتار پاراليمپيادالىق سپورت تۇرلەرىن ودان ءارى دامىتۋعا قاتىستى وزەكتى ماسەلەلەردى تالقىلاپ، پىكىر الماستى. سۇحبات كەزىندە سەنات ءتوراعاسى قازاقستاندا ەرەكشە قاجەتتىلىگى بار ادامداردى قولداۋ مەن پاراسپورتتى دامىتۋ ءۇشىن قانداي شارالار قولعا الىنىپ جاتقانىن ايتتى.

«قازاقستان پرەزيدەنتى قاسىم-جومارت كەمەل ۇلى توقايەۆ پاراليمپيادالىق سپورتتى دامىتۋعا جانە پاراسپورتشىلارىمىزدى جان- جاقتى قولداۋعا باسا ءمان بەرىپ كەلەدى. ءبىزدىڭ ەلدە 60 مىڭعا جۋىق ازامات پاراليمپيادالىق سپورت تۇرلەرىمەن شۇعىلدانادى. ولاردىڭ مىڭعا جۋىعى ۇلتتىق قۇراماعا مۇشە. بۇگىندە قازاقستاندا 19 پاراليمپيادالىق سپورت ءتۇرى قارقىندى دامىپ وتىر. وسى ورايدا ءبىزدىڭ حالىقارالىق پاراليمپيادا كوميتەتىمەن سەرىكتەستىگىمىز ەلىمىزدە پاراليمپيادالىق سپورت تۇرلەرىن دامىتۋ جولىندا ايرىقشا مانگە يە»، - دەپ، ماۋلەن اشىمبايەۆ قازاقستان بوچا فەدەراتسياسىنىڭ قىزمەتى تۋرالى ءسوز قوزعادى.

سونىمەن قاتار سەنات ءتوراعاسى يۋنەسكو- نىڭ باس ديرەكتورى ودرە ازۋلەمەن كەزدەستى. وندا الماتىدا ب ۇ ۇ وڭىرلىك بيۋروسىمەن جۇمىستى جانداندىرۋ، رۋحاني ديپلوماتيانى ىلگەرىلەتۋ، ورنىقتى دامۋ ماقساتتارىنا قول جەتكىزۋ جانە تاعى باسقا كوپجوسپارلى ءوزارا ءىس- قيمىلدى ارتتىرۋ ماسەلەلەرى اڭگىمەگە ارقاۋ بولدى.

«مەملەكەت باسشىسىنىڭ تاپسىرماسىمەن XVII پاراليمپيادا ويىندارىنا قازاقستان دەلەگاتسياسىن باستاپ كەلۋ - مەن ءۇشىن زور مارتەبە. ءبىزدىڭ ەلدە پاراسپورتتىڭ ەكوجۇيەسىن دامىتۋعا ۇلكەن كوڭىل ءبولىنىپ وتىر. قازاقستان سپورت جانە ءبىلىم بەرۋ سالالارىنداعى اۋقىمدى ساياسات اياسىندا پاراسپورتقا دا باسىمدىق بەرەتىن ۇلتتىق ستراتەگيالار ازىرلەپ جاتىر. ءبىز يۋنەسكو- نىڭ بارشانىڭ سپورتقا تەڭ قولجەتىمدىلىگىن قامتاماسىز ەتۋگە قوسقان ۇلەسىن جوعارى باعالايمىز. بۇل رەتتە Fit for life sport - ءومىر ءۇشىن سپورت فلاگماندىق باستاماسىن ايرىقشا اتاپ وتكەن ءجون»، - دەپ، ماۋلەن اشىمبايەۆ ناقتى سالالارداعى ىنتىماقتاستىقتىڭ ماڭىزدى ەكەنىنە نازار اۋداردى.

ءوز كەزەگىندە ودري ازۋلە ءوزارا ءىس- قيمىلدى ارتتىرۋعا مۇددەلى ەكەنىن ايتىپ، قازاقستاندا جۇزەگە اسىرىلىپ جاتقان رەفورمالار مەن زاڭنامالىق وزگەرىستەردىڭ تيىمدىلىگىن تىلگە تيەك ەتتى.

ايتا كەتەيىك، بۇگىن قازاقستان پاراليمپيادا قۇراماسى استانا ۋاقىتى بويىنشا ساعات 23:00 دە پاريجدە وتەتىن XVII جازعى پاراليمپيادا ويىندارىنىڭ اشىلۋ سالتاناتىنا قاتىسادى. ءدۇبىرلى دودا 8 قىركۇيەككە دەيىن جالعاسادى. جارىسقا 182 ەلدەن كەلگەن 4400 گە جۋىق سپورتشى قاتىسىپ جاتىر. ولار بارلىعى 549 مەدال جيىنتىعىن ساراپقا سالادى.

قازاقستان ۇلتتىق قۇراماسى بۇل ويىندارعا سپورتتىڭ 9 تۇرىنەن 33 جولداما جەڭىپ الدى. ناقتى ايتقاندا، وتاندىق اتلەتتەر پارا جەڭىل اتلەتيكا، پاراپاۋەرليفتينگ، پاراتاەكۆوندو، پارا ۇستەل تەننيسى، ءپاراجۇزۋ، پارادزيۋدو، پاراكانوە، پارا وق اتۋ جانە وتىرىپ وينايتىن ۆولەيبولدان سىنعا تۇسەدى. وسى رەتتە قازاقستاندىق پاراسوپرتشىلار پارا ۇستەل تەننيسى مەن پارا كانوەدەن پاراليمپياداعا العاش رەت قاتىسىپ جاتقانىن ايتا كەتكەن ءجون.

اۆتور

ەربول جانات