سەنات ءتوراعاسى رەسەيدىڭ قازاقستانداعى ەلشىسىنە كوڭىل ايتتى
استانا. KAZINFORM - مەملەكەت باسشىسى قاسىم- جومارت توقايەۆتىڭ تاپسىرماسى بويىنشا پارلامەنت سەناتىنىڭ ءتوراعاسى ماۋلەن اشىمبايەۆ رەسەي فەدەراتسياسىنىڭ قازاقستان رەسپۋبليكاسىنداعى ەلشىلىگىنە باردى.
بۇل تۋرالى ق ر پارلامەنتى سەناتىنىڭ باسپا ءسوز قىزمەتى حابارلادى.
پالاتا سپيكەرى ماسكەۋ وبلىسىندا بولعان لاڭكەستىك وقيعاعا بايلانىستى ەلىمىزدەگى رەسەي ەلشىسىنە كوڭىل ايتتى. سونداي- اق كوڭىل ايتۋ كىتابىنا جازبا قالدىرىپ، گۇل شوعىن قويدى. ول ونداعان جازىقسىز جاننىڭ ءومىرىن قيعان قايعىلى وقيعانى قازاقستاندىقتار اۋىر كۇيزەلىسپەن قابىلداعانىن اتاپ ءوتتى.
سەنات ءتوراعاسى رەسەي فەدەراتسياسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى الەكسەي بوروداۆكينمەن سۇحبات بارىسىندا قازاقستان پرەزيدەنتى قاسىم-جومارت توقايەۆ بەيبىت ازاماتتارعا قارسى تەرروريستىك اكتىنى قاتاڭ ايىپتاعانىن جانە لاڭكەستىككە قارسى كۇرەستە رەسەيمەن بىرگە ەكەنىن راستاعانىن ايتتى.
«قازاقستان پرەزيدەنتى قاسىم-جومارت كەمەل ۇلى توقايەۆ ب ۇ ۇ- عا مۇشە مەملەكەتتەردى جازىقسىز ازاماتتارعا قارسى زورلىق-زومبىلىقتىڭ بۇل تۇرىنە ءبىراۋىزدان قارسىلىق تانىتۋعا شاقىردى. ادامدىققا جات مۇنداي لاڭكەستىك ارەكەتتى مۇلدە اقتاۋعا بولمايدى. قايعىلى وقيعاعا بايلانىستى قازاقستان رەسپۋبليكاسى پارلامەنتى سەناتى دەپۋتاتتارىنىڭ جانە جەكە ءوز اتىمنان كوڭىل ايتامىن. بۇل جاعداي رەسەي حالقىمەن بىرگە ءبىزدىڭ ازاماتتارىمىزدىڭ دا قابىرعاسىن قايىستىردى. ورىن العان لاڭكەستىكتى ءبىز اۋىر كۇيزەلىسپەن قابىلدادىق. بارلىق زارداپ شەككەندەرگە سابىر تىلەي وتىرىپ، ولاردىڭ تەزىرەك ساۋىعىپ كەتۋىنە تىلەكتەستىگىمىزدى بىلدىرەمىز»، - دەدى ماۋلەن اشىمبايەۆ كوڭىل ايتۋ كىتابىنا قالدىرعان جازباسىندا.
ايتا كەتەيىك، مەملەكەت باسشىسى قاسىم-جومارت توقايەۆ رەسەي پرەزيدەنتىمەن تەلەفون ارقىلى سويلەسىپ، ماسكەۋ وبلىسىنداعى لاڭكەستىك ارەكەت سالدارىنان كوپتەگەن ادامنىڭ قازا تابۋىنا بايلانىستى قازاقستاندىقتاردىڭ اتىنان ۆلاديمير پۋتينگە جانە باۋىرلاس رەسەي حالقىنا قايعىرىپ كوڭىل ايتتى. ءوز كەزەگىندە رەسەي پرەزيدەنتى قولداۋ كورسەتكەنى ءۇشىن قاسىم-جومارت توقايەۆقا العىس ءبىلدىردى.
سونىمەن قاتار مەملەكەت باسشىسىنىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ شۇعىل وتىرىسى ءوتتى. جيىندا قۇقىق قورعاۋ قۇرىلىمدارى مەن جەرگىلىكتى اتقارۋشى ورگانداردىڭ جۇمىس جوسپارى، سونداي-اق ەكسترەمالدى جاعدايلارداعى ولاردىڭ قىزمەتىن ۇيلەستىرۋ ماسەلەلەرى قاراستىرىلدى. پرەزيدەنت ەل ازاماتتارىنىڭ قاۋىپسىزدىگىن جانە تەرروريزمگە قارسى كۇرەس ماقساتىندا قازاقستاننىڭ باسقا مەملەكەتتەرمەن جانە حالىقارالىق ۇيىمدارمەن ىقپالداستىعىن قامتاماسىز ەتۋگە باعىتتالعان ءبىرقاتار تاپسىرما بەردى.