سەنات ءتوراعاسى: قازىر بۇكىل الەم ينۆەستيتسيا ءۇشىن كۇرەسىپ جاتىر

استانا. KAZINFORM - سەنات ءتوراعاسى ماۋلەن اشىمبايەۆ قازىر ەكونوميكامىزدى ءارتاراپتاندىرۋ جانە ەكونوميكالىق ءوسىمنىڭ جوعارى دەڭگەيىن قامتاماسىز ەتۋ ەلىمىزدىڭ الدىندا تۇرعان ماڭىزدى مىندەتتەر ەكەنىن اتاپ ءوتتى.

«پرەزيدەنتىمىز قاسىم-جومارت كەمەل ۇلى توقايەۆ ەكونوميكانى ءارتاراپتاندىرۋ جانە ەكونوميكالىق ءوسىمنىڭ جوعارى دەڭگەيىن قامتاماسىز ەتۋ جونىندە ناقتى مىندەتتەر جۇكتەدى. قازىرگى تاڭدا وسى باعىتتا اۋقىمدى جۇمىس اتقارىلىپ جاتىر. بانكتەرمەن جۇمىس ىستەپ جاتىرمىز. بۇل باعىتتا ينۆەستيتسيا تارتۋ - ماڭىزدى شارت. جالپى، قازىر قازاقستان عانا ەمەس، بۇكىل الەمدە ينۆەستيتسيا ءۇشىن ۇلكەن كۇرەس، باسەكە ءجۇرىپ جاتىر. ياعني، قولايلى جاعداي جاساپ جاتقان باسقا دا مەملەكەتتەر بار. سول سەبەپتى، ءبىز وزىمىزدەگى ينۆەستيتسيالىق احۋالدىڭ وزگە مەملەكەتتەرگە قاراعاندا تارتىمدى بولۋىن نەمەسە ودان كەم بولماۋىن قامتاماسىز ەتۋىمىز كەرەك»، - دەدى م. اشىمبايەۆ سەناتتىڭ جالپى وتىرىسىندا.

پالاتا سپيكەرى قاتار مەملەكەتىنەن ينۆەستيتسيا تارتۋ ماسەلەسىنە نازار اۋدارىپ، جاقىن ارادا ۇلتتىق ەكونوميكاعا ايتارلىقتاي قاراجات قۇيىلاتىنىن، بۇل ەلىمىزدىڭ دامۋىنا تىڭ سەرپىن بەرەتىنىن تىلگە تيەك ەتتى.

«بۇگىن قارالعان كەلىسىم اياسىندا وسى باعىتتار بويىنشا ينۆەستورعا مۇمكىندىكتەر بەرىلەدى. وسى رەتتە اتالعان جۇمىستىڭ ءبارى ۇلتتىق زاڭناما اياسىندا جۇرگىزىلەتىنىن ايرىقشا اتاپ ءوتۋىمىز كەرەك. ۇكىمەت ءبارىن باقىلاپ وتىرادى. الداعى ۋاقىتتا كەلىسىم جانە كەلەتىن ينۆەستيتسيالار ەلىمىزدىڭ دامۋىنا، حالىقتىڭ ءال-اۋقاتىن ارتتىرۋعا جانە ەكونوميكامىزدى جاڭا بەلەسكە شىعارۋعا قىزمەت ەتەدى دەپ سەنەمىز»، - دەدى ماۋلەن اشىمبايەۆ.

بۇدان بۇرىن حابارلانعانداي، بۇگىن سەنات وتىرىسىندا پالاتا دەپۋتاتتارى «قازاقستان رەسپۋبليكاسىنىڭ ۇكىمەتى مەن قاتار مەملەكەتىنىڭ ۇكىمەتى اراسىنداعى باسىم سالالارداعى جوبالاردى دامىتۋ ءۇشىن ۇزاقمەرزىمدى ستراتەگيالىق ارىپتەستىك ورناتۋ تۋرالى كەلىسىمدى راتيفيكاتسيالاۋ تۋرالى» زاڭدى قاراپ، ماقۇلدادى.