سەنات ءتوراعاسى ماۋلەن اشىمبايەۆ باستاعان دەلەگاتسيا تاجىكستاندا ءبىرقاتار كەزدەسۋ وتكىزدى

استانا. KAZINFORM - سەنات ءتوراعاسى ماۋلەن اشىمبايەۆ باستاعان پالاتا دەلەگاتسياسى تاجىكستانعا باردى، دەپ حابارلايدى ق ر پارلامەنتى سەناتىنىڭ باسپا ءسوز قىزمەتى.

باسپا ءسوز قىزمەتىنىڭ مالىمەتتەرىنە قاراعاندا، ساپار بارىسىندا سەناتورلار تاجىكستان پرەزيدەنتى ەمومالي راحمونمەن كەزدەستى. سونداي-اق اتالعان ەلدىڭ كونستيتۋتسياسىنىڭ 30 جىلدىعىنا ارنالعان حالىقارالىق پارلامەنتتىك كونفەرەنسياعا قاتىستى جانە ت م د ەلدەرى پارلامەنتتەرىنىڭ دەپۋتاتتارىمەن ەكىجاقتى كەزدەسۋلەر وتكىزدى.

تاجىكستان رەسپۋبليكاسىنىڭ پرەزيدەنتى ەمومالي راحمونمەن كەزدەسۋدە سەنات سپيكەرى اتالعان ەلدىڭ باسشىسىنا قازاقستان پرەزيدەنتى قاسىم-جومارت توقايەۆتىڭ جىلى لەبىزىن جەتكىزدى. سونداي-اق ول ەكى ەلدىڭ اراسىنداعى دوستىق قارىم-قاتىناس پەن مەملەكەت باسشىلارىنىڭ سىندارلى جانە سەنىمدى ديالوگى ءوزارا ءتيىمدى ىنتىماقتاستىقتىڭ كەپىلى ەكەنىن اتاپ ءوتتى.

«تاجىكستان رەسپۋبليكاسى كونستيتۋتسياسىنىڭ 30 جىلدىعى» اتتى حالىقارالىق پارلامەنتتىك كونفەرەنتسيادا ءسوز سويلەگەن ماۋلەن اشىمبايەۆ قازاقستان مەن تاجىكستان اراسىندا قالىپتاسقان ءوزارا تۇسىنىستىك پەن سەنىمنىڭ جوعارى دەڭگەيىنە جانە ونىڭ ماڭىزىنا ەرەكشە توقتالدى.

«جوعارى دەڭگەيدەگى تۇراقتى كەزدەسۋلەر، بەلسەندى ساياسي ديالوگ، ءتۇرلى سالاداعى ناتيجەلى ىنتىماقتاستىق قازاق-تاجىك قارىم-قاتىناسىنىڭ دامۋ قارقىنىن جانە زور الەۋەتىن ايقىن كورسەتەدى. بۇل رەتتە ساۋدا-ەكونوميكالىق بايلانىستاردى، مادەنيەت پەن ءبىلىم بەرۋگە قاتىستى جوبالاردى، ەكولوگيالىق جانە باسقا سالالارداعى بىرلەسكەن باستامالاردى اتاپ وتكەن ءجون. قازاقستان مەن تاجىكستان اراسىندا سەنىمدى جانە جەمىستى قارىم-قاتىناس ورنادى. بيىلعى تامىزدا قازاقستان پرەزيدەنتى قاسىم-جومارت كەمەل ۇلى توقايەۆتىڭ تاجىكستانعا ساپارى جانە سول كەزدە قول جەتكىزىلگەن ۋاعدالاستىقتار وسى ايتىلعانداردى كەزەكتى رەت ناقتىلاي ءتۇستى. اتالعان ساپار كەزىندە ەلدەرىمىز اراسىندا وداقتاستىق قاتىناستار تۋرالى تاريحي شارتقا قول قويىلدى. بۇل ماڭىزدى قۇجات جاڭا مۇمكىندىكتەرگە جول اشادى. سونداي-اق ەلدەرىمىز اراسىنداعى جان-جاقتى ىنتىماقتاستىقتى ودان ءارى كەڭەيتۋدىڭ بەرىك نەگىزىن قالايدى»، - دەدى سەنات ءتوراعاسى.

سونىمەن قاتار ماۋلەن اشىمبايەۆ اتالعان كونفەرەنتسيا كونستيتۋتسيالىق قۇقىقتى دامىتۋدىڭ نەگىزگى ماسەلەلەرىن تالقىلاۋعا جانە قازىرگى الماعايىپ جاعدايدا بيلىكتىڭ زاڭنامالىق تارماقتارىنىڭ تابىستى تاجىريبەسىمەن بولىسۋگە زور مۇمكىندىك بەرەتىنىن تىلگە تيەك ەتتى.

«پارلامەنتتەردىڭ قىزمەتى قۇقىقتىق جۇيەنىڭ تۇراقتىلىعى مەن بولجامدىلىعىن قامتاماسىز ەتۋگە، جاڭا سىن-قاتەرلەرگە ۋاقتىلى دەن قويۋعا جانە تۋىندايتىن پروبلەمالاردىڭ ءتيىمدى شەشىمدەرىن تابۋعا ارنالعان. ءبىزدىڭ ەلدەرىمىزدىڭ الدىندا تۇرعان مىندەتتەر مەن ماسەلەلەردىڭ كوپ جاعدايدا ۇقساس ەكەنىن ەسكەرسەك، بيلىكتىڭ زاڭ شىعارۋشى تارماقتارىنىڭ ءوزارا ءىس-قيمىلى اسا ماڭىزدى ەكەنىن اڭعارامىز. پارلامەنتارالىق ىنتىماقتاستىق مەملەكەتتەرىمىز اراسىنداعى بايلانىستاردى نىعايتۋدىڭ، تاجىريبە الماسۋدىڭ جانە وزەكتى ماسەلەلەر بويىنشا ورتاق شەشىمدەر ازىرلەۋدىڭ نەگىزگى تەتىكتەرىنىڭ ءبىرى ەكەنى انىق. قازىرگى سىن-قاتەرلەر بىزدەن ءتيىمدى ديالوگ پەن اعىمداعى جانە بولاشاقتاعى جاھاندىق وزگەرىستەرگە سايكەس زاڭنامالىق تەتىكتەردى بىرلەسىپ ازىرلەۋدى تالاپ ەتەدى. بۇل رەتتە ورتاق كۇش-جىگەرىمىزدى ۇيلەستىرۋدە پارلامەنتتىك ديپلوماتيا شەشۋشى ءرول اتقارادى»، - دەدى ماۋلەن اشىمبايەۆ.

ساپار كەزىندە ءبىرقاتار ەكىجاقتى كەزدەسۋ ءوتتى. رەسەي فەدەراتسياسى فەدەرالدىق جينالىسى فەدەراتسيا كەڭەسىنىڭ ءتوراعاسى ۆالەنتينا ماتۆيەنكومەن كەزدەسۋدە زاڭ شىعارۋشى ورگاندار جەلىسى بويىنشا ءوزارا ءىس-قيمىلدى نىعايتۋ پەرسپەكتيۆالارى تالقىلاندى. تاراپتار ەكى پالاتا اراسىنداعى ىنتىماقتاستىق جونىندەگى كوميسسيا جۇمىسىنىڭ قورىتىندىلارىنا دا نازار اۋداردى. سونداي-اق 2025-2026-جىلدارعا ارنالعان پارلامەنتارالىق ىنتىماقتاستىقتى دامىتۋ جونىندەگى جاڭا جول كارتاسىنا قول قويۋ ماسەلەسىن قارادى. بۇل قۇجاتتا قازاقستان مەن رەسەي پرەزيدەنتتەرى بەلگىلەپ بەرگەن ىنتىماقتاستىقتىڭ باسىم باعىتتارى كورسەتىلەدى.

سونداي-اق قازاقستان دەلەگاتسياسى تاجىكستان مادجليسي ولي مادجليسي ميللي ءتوراعاسى رۋستامي ەموماليمەن كەزدەستى. وندا پارلامەنتارالىق ىنتىماقتاستىقتىڭ ناقتى باعىتتارى كەڭىنەن تالقىلاندى. اتاپ ايتقاندا، پارلامەنتارالىق بايلانىستاردى نىعايتۋدىڭ نەگىزىن قالاپ، ىنتىماقتاستىقتى ودان ءارى دامىتۋدىڭ باسىم باعىتتارىن ايقىنداپ بەرگەن تۇركىستان دەكلاراتسياسىن ىسكە اسىرۋ اياسىنداعى بىرلەسكەن جۇمىس تۋرالى ءسوز بولدى. سۇحباتتاسۋشىلار بىرلەسكەن كۇش- جىگەردى ءوڭىردى ەكونوميكالىق تۇرعىدا دامىتۋعا، ورنىقتى دامۋ ماقساتتارىن ىسكە اسىرۋعا، ادام كاپيتالىن نىعايتۋعا جانە قازىرگى سىن-قاتەرلەردى ەڭسەرۋگە جۇمىلدىرۋ قاجەت ەكەنىنە باسا ءمان بەردى.

ازەربايجان ميللي ءماجىلىسىنىڭ سپيكەرى ساگيبا گافاروۆامەن كەزدەسۋدە ماۋلەن اشىمبايەۆ ارىپتەسىن جاڭا مەرزىمگە قايتا سايلانۋىمەن قۇتتىقتاپ، ەكى ەل اراسىنداعى ىنتىماقتاستىق حالىقتاردىڭ ورتاق تاريحي قۇندىلىقتارىنا جانە ءوزارا قۇرمەت پەن تۇسىنىستىككە تابان تىرەيتىنىن اتاپ ءوتتى. بۇدان باسقا، سەنات ءتوراعاسى ازەربايجان تاراپىنا الەمدىك جانە ءداستۇرلى دىندەر ليدەرلەرى سەزىنە تۇراقتى قولداۋ كورسەتىپ كەلە جاتقانى ءۇشىن العىس ايتىپ، اتالعان ەلدىڭ وكىلدەرى 2025-جىلى وتەتىن سەزگە قاتىساتىنىنا سەنىم ءبىلدىردى.

ماۋلەن اشىمبايەۆ كونفەرەنسيا الاڭىندا باسقا دا پارلامەنت دەلەگاتسيالارىنىڭ باسشىلارىمەن ءبىرقاتار كەزدەسۋ وتكىزدى.