سەن الەمدى وزگەرتۋ ءۇشىن دۇنيەگە كەلدىڭ - ۋكراين قىزىنىڭ تالانتى ديماشتى تاڭعالدىردى
استانا. KAZINFORM - "سەن الەمدى وزگەرتۋ ءۇشىن دۇنيەگە كەلگەنسىڭ". ديماش قۇدايبەرگەن ماجارستانداعى Virtuosos V4+ تالانتتار بايقاۋىنىڭ فينالىندا ونەر كورسەتكەن ۋكراينالىق امەليا انيسوۆيچكە وسىنداي پىكىر ايتتى.
امەليانىڭ باسقا قاتىسۋشىلاردان ەرەكشەلىگى - ول بۇعان دەيىن ءوز ەلىندەگى سوعىس كەزىندە بومبادان قورعاناتىن پاناجايدا ءان شىرقاپ، بولاشاققا دەگەن ءۇمىت پەن سەنىمنىڭ سيمۆولىنا اينالعان ەدى. سول ساتتەگى ۆيدەوسى الەۋمەتتىك جەلىلەردە كەڭ تاراپ، ونەرپاز ءبۇلدىرشىن الەمگە تانىلعان بولاتىن.
تانىمال ءانشى ديماش قۇدايبەرگەن ماجارستانداعى Virtuosos V4+ تالانتتار بايقاۋىندا قازىلىق ەتتى. Virtuosos V4+ - وزگەشە فورماتتى كلاسسيكالىق مۋزىكا الاڭىنداعى تالانتتار شوۋى. ول جاس ارتىستەردىڭ تالانتىن اشۋعا جانە جاس مۋزىكانتتاردىڭ دامۋىنا مۇمكىندىكتەر بەرەتىن ەرەكشە شوۋ.
بايقاۋ ماجارستاننىڭ جەتەكشى مۋزىكالىق جوعارى وقۋ ورنى - بۋداپەشتتەگى فرانتس ليست اتىنداعى مۋزىكا اكادەمياسىندا وتەدى. حالىقارالىق قازىلار القاسىنىڭ قۇرامىندا ديماشتان بولەك الەمدىك ءانشى پلاسيدو دومينگو، گيتاريست پابلو ساينتس ۆيلەگاس، چەسكي كرۋملوۆ اتىنداعى حالىقارالىق مۋزىكا فەستيۆالىنىڭ كوركەمدىك جەتەكشىسى گابريەلا راچيدي، پروديۋسەر حارۆي گولدسميت جانە تانىمال ۆيولونچەليست ستەپان حاۋزەر بار.
جوبا فينالىندا ماجارستان، پولشا، سلوۆاكيا، ۋكراينا، چەحيادان كەلگەن جاس مۋزىكانتتار ونەر كورسەتتى. ولار فورتەپيانو، كلارنەت، گوبوي، سكريپكا جانە ارفادا وينادى. كوپتەگەن قاتىسۋشىلار قازىلار القاسىنىڭ جەكە ماقتاۋىنا يە بولدى، ال پولشادان كەلگەن گوبوي رىنداۋشىسى مالگورجاتا تسەشكو ديماشتان جەكە كونسەرتكە قاتىسۋعا شاقىرۋ الدى.
سونىمەن بىرگە، ديماش ۋكراينادان كەلگەن بايقاۋدىڭ ەڭ كىشكەنتاي قاتىسۋشىسى امەليا انيسوۆيچتىڭ داۋىسىن ەرەكشە ماقتادى. امەليا انيسوۆيچ 9 جاستا. ول ۋكراينداعى بومبادان قورعاناتىن پاناجايلاردا ادامدارعا ءۇمىت پەن قۋانىش سىيلاۋ ءۇشىن، كوڭىلىن اۋلاۋ ءۇشىن ءان سالۋىن توقتاتپاعان. بايقاۋ فينالىندا «مۇزدى ولكە» انيماتسيالىق فيلمىنىڭ «Let it go» ساۋنترەگىن ورىنداعان. بايقاۋ ۇيىمداستىرۋشىلارى امەليدى ءۇمىت پەن بەيبىتشىلىكتىڭ جانە باتىلدىقتىڭ سيمۆولى دەپ اتاپ كەتتى.
«قاتتى تاڭ قالىپ وتىرمىن. تالانتىڭ ءۇشىن راحمەت. سەن الەمدى وزگەرتۋ ءۇشىن دۇنيەگە كەلدىڭ دەپ ويلايمىن»،-دەدى ديماش قۇدايبەرگەن.
شوۋ فينالىندا حالىقارالىق قازىلار القاسىنىڭ مۋزىكانتتارى ەريك ميكلوش، كىشى پلاسيدو دومينگو، ديماش قۇدايبەرگەن، ەلينا نەچايەۆا، كلاسسيكالىق گيتاريست پەتار چۋليچ جانە امەليا انيسوۆيچ پاننون فيلارمونيالىق وركەسترىنىڭ سۇيەمەلدەۋىمەن مايكل دجەكسوننىڭ ايگىلى «Heal the World» ءانىن شىرقادى.
سونىمەن بىرگە ديماش 20-عاسىردىڭ ەڭ ۇلى داۋسى ماەسترو پلاسيدو دومينگومەن جورج بيزەنىڭ «ءىنجۋ- مارجان جيناۋشىلار» وپەراسىنان نادير مەن زۋرگانىڭ «Au Fond du Temple Saint» دۋەتىن ورىندادى.
اۆتور
ايجان سەرىكجان قىزى