سەمەيدە ۇيىنەن قاشقان وقۋشى تاعى ءبىر بالانى وزىمەن بىرگە الا كەتكەن

سەمەي. KAZINFORM - سەمەيدە جوعالعان 12 جانە 7 جاسار بالالار امان تابىلدى.

اباي وبلىسى پوليسيا دەپارتامەنتىنىڭ حابارلاۋىنشا، بالا جوعالعانى تۋرالى حابار 2 -قىركۇيەك كۇنى ساعات 10:34 تە تۇسكەن.

سەمەي قالاسىنىڭ تۇرعىنى 3 كۇن بۇرىن ۇيدەن شىعىپ كەتكەن، بۇرىن بىرنەشە رەت كەتىپ، قايتىپ كەلگەن 12 جاسار ۇلى راحىمجان ۇكەرتايەۆتى ىزدەۋگە كومەك سۇراپ پوليسياعا جۇگىندى.

سول كۇنى ساعات 21:11 دە 7 جاسار ءالي قاناتوۆتىڭ اجەسى پولي سياعا حابارلاسىپ، نەمەرەسىنىڭ كەشكى 18.30 شاماسىندا اۋلاعا ويناۋعا كەتىپ، سودان قايتىپ كەلمەگەنىن ايتادى.

بىرنەشە مينۋت ىشىندە ايماق پوليتسياسىنىڭ بۇكىل كەشەندى كۇشتەرى حاباردار ەتىلدى. پوليتسيا جاساقتارى ەرىكتىلەرمەن، مۇعالىمدەرمەن جانە جاناشىر ازاماتتارمەن بىرگە تۇرعىلىقتى جەرىنە جاقىن ماڭدى ارالادى.

ىزدەۋگە بارلىعى 12 توپ جىبەرىلدى، سونىمەن قاتار پوليتسيانىڭ كەشەندى كۇشتەرىنىڭ سىرتقى جاساقتارى - 170 ادام اتتاندى.

ىزدەۋ جۇمىسى كۇندىز دە، تۇندە دە توقتامادى.

ولار قاراۋسىز قالعان عيماراتتاردى، ويىن-ساۋىق ورىندارىن ءسۇزىپ شىقتى. ءتارتىپ ساقشىلارى ىزدەۋ شارالارى كەزىندە بەينەباقىلاۋ كامەراسىن قارادى.

3-قىركۇيەكتە جەرگىلىكتى تۇرعىن الگى ەكەۋىن بالالار الاڭىنداعى كوپىردىڭ استىنان تاۋىپ، ەرىكتىلەر مەن پوليتسياعا اقپارات بەردى.

قازىرگى ۋاقىتتا بالالار امان-ەسەن ۇيىنە ورالدى. ءتۇسىندىرۋ جۇمىسى جۇرگىزىلىپ، 12 جاسار بالا مىنەز- قۇلىقتى تۇزەتۋ ءۇشىن يۋۆەنالدى پوليتسيانىڭ ەسەبىنە قويىلادى.

ءوز كەزەگىندە ءتارتىپ ساقشىلارى ەرەسەكتەردەن بالالارىنا قىراعى بولۋدى سۇرايدى جانە مۇنداي فاكتىلەر تۋرالى دەرەۋ حابارلاۋدى سۇرايدى.

«نەعۇرلىم ەرتە جانە تەز حابارلاساڭىز، جوعالعان ادامدى تابۋ مۇمكىندىگى سوعۇرلىم جوعارى بولادى»، - دەيدى ءتارتىپ ساقشىلارى.