سەمەيدە وفيتسەر اسكەري ءبولىمنىڭ مۇلكىن بۋكمەكەرلىك كەڭسەدەگى قارىزى ءۇشىن لومباردقا قويعان
سەمەي. KAZINFORM - سەمەي قالاسىندا وفيتسەر بۋكمەكەرلىك كەڭسەدەگى قارىزىن وتەۋ ءۇشىن اسكەري ءبولىمنىڭ مۇلكىن لومباردقا كەپىلگە قويعان.
سەمەي گارنيزونى اسكەري سوتىندا وزىنە سەنىپ تاپسىرىلعان مەملەكەتتىڭ مۇلكىن جىمقىردى دەپ ايىپتالعان اسكەري ءبولىم وفيتسەرىنە قاتىستى قىلمىستىق ءىس قارالدى.
و. ەسىمدى كاپيتان شتابتىڭ توپوگرافيالىق قىزمەتىنىڭ باستىعى رەتىندە ءوزىنىڭ قىزمەتتىك مانسابىن اسىرا پايدالانعان. بۋكمەكەرلىك كەڭسەدە ۇتىلىپ قالۋى سالدارىنان جەكە قارىزى وسكەن ونىڭ اسكەري بولىمگە تيەسىلى توپوگرافيالىق قۇرالداردى لومباردقا كەپىلگە وتكىزگەنى انىقتالدى. وسىلايشا مەملەكەتكە 2 ميلليون تەڭگەدەن استام شىعىن كەلتىرىلگەن.
- سوت اسكەري قىزمەتكەردى كىنالى دەپ تانىپ، 2 جىل 6 ايعا باس بوستاندىعىنان ايىردى. ول كاپيتان اسكەري اتاعىنان ايىرىلدى، - دەپ حابارلادى سوتتىڭ باسپا ءسوز قىزمەتىنەن.
سونىمەن قاتار سوتتالۋشىدان ماتەريالدىق شىعىن مەن مەملەكەتتىك باج ءوندىرىلدى. ۇكىم ءالى زاڭدى كۇشىنە ەنگەن جوق.