سەمەيدە قاقاعان ايازدا 50 باس ءىرى قاراسى جوعالىپ كەتكەن ادامعا پوليتسەيلەر كومەككە كەلدى
سەمەيدە پوليتسيا قىزمەتكەرلەرى ايازدا 50 باس ءىرى قاراسىن جوعالتىپ العان ادامعا كومەككە كەلىپ، مالىن تاۋىپ بەردى، دەپ حابارلايدى Kazinform.
پوليتسياعا حابارلاسقان جەرگىلىكتى تۇرعىن مالىنىڭ جوعالعانىن ايتىپ، كومەك سۇرادى.
- ەر ادام ءبىر كۇن بۇرىن تۇسكى ۋاقىتتا سەمەي قالاسىنان 40 شاقىرىم قاشىقتىقتاعى شارۋا قوجالىعىنان 50 باس مالىنىڭ جوعالىپ كەتكەنىن جەتكىزگەن. اتالعان فاكتى بويىنشا سوتقا دەيىنگى تەرگەۋ باستالىپ، پوليتسيا قىزمەتكەرلەرى ىزدەستىرۋگە كىرىستى. اتتى پوليتسيا مەن قاردا جۇرەتىن تەحنيكا جۇمىلدىرىلدى. سونداي-اق جاقىن اۋماقتى اينالىپ ءوتۋ ءۇشىن اۋەگە درون كوتەرىلدى، - دەپ حابارلادى اباي وبلىستىق پوليتسيا دەپارتامەنتىنىڭ باسپا ءسوز قىزمەتىنەن.
اۋا رايىنىڭ قولايسىزدىعىنا قاراماستان ءتارتىپ ساقشىلارى ءبىر وتباسىنىڭ جالعىز تابىس كوزىن ىزدەستىرۋ شارالارىن ءبىر كۇن بويى جۇرگىزدى.
- سونىڭ ناتيجەسىندە ءىرى قارالار تۇگەل تابىلدى. جوعالعان جەردەن 18 شاقىرىم جەردە جۇرگەن. ءوز كەزەگىندە مال يەسى پوليتسيا قىزمەتكەرلەرىنە جەدەل ارەكەتتەرى ءۇشىن العىسىن ءبىلدىردى. ويتكەنى، ىزدەۋ جۇمىستارى كەيىنگە قالسا، مال قىرىلىپ قالار ەدى، - دەلىنگەن اقپاراتتا.