سەمەيدە مۇگەدەكتىگى بار جانە اتا-انا قامقورلىعىنسىز قالعان 30 ازامات باسپانالى بولدى
استانا. قازاقپارات - بۇگىن رەسپۋبليكا كۇنى قارساڭىندا قاراعايلى شاعىن اۋدانىندا پاتەر كەزەگىندە تۇرعان الەۋمەتتىك وسال توپتارعا جانە اتا-اناسىنىڭ قامقورلىعىنسىز قالعان ازاماتتارعا 30 وتباسىعا پاتەر كىلتتەرىن سالتاناتتى تۇردە تابىستاۋ ءراسىمى ءوتتى.
راسىمگە قالا اكىمى نۇربول نۇرساعاتوۆ قاتىستى.
- 2022-جىلى قازاقستان رەسپۋبليكاسى پرەزيدەنتى قاسىم-جومارت كەمەل ۇلى توقايەۆ شەشىمىمەن 25-قازان - رەسپۋبليكا كۇنى ۇلتتىق مەرەكە بولىپ بەكىتىلدى. وسىنداي ايتۋلى مەرەكە قارساڭىندا سەمەي قالاسىندا ەرەكشە قاجەتتىلىكتەرى بار ازاماتتار جانە اتا-انا قامقورلىعىنسىز قالعان بالالار جاڭا پاتەرلەردىڭ يەگەرلەرى اتانىپ وتىر. شاڭىراقتارىڭىز بەرەكەگە تولى بولسىن!، - دەدى قالا باسشىسى نۇربول نۇرساعاتوۆ.
سوڭعى جىلدارى سەمەي قالاسىندا قۇرىلىس قارقىنى ايتارلىقتاي ارتىپ، كوپتەگەن تۇرعىن ۇيلەر بوي كوتەردى. مەملەكەت باسشىسىنىڭ قولداۋىمەن 2023-جىلى 211 وتباسى جاڭا باسپاناعا قول جەتكىزدى. ال 2024-جىلدىڭ باسىنان بەرى پاتەر كەزەگىندە تۇرعان 334 ازامات باسپانامەن قامتاماسىز ەتىلدى.
اتا-اناسىنىڭ قامقورلىعىنسىز قالعان و. ميروشچەنكو 2011-جىلدان بەرى پاتەر كەزەگىندە تۇرعانىن ايتىپ، زور ىقىلاسىن جەتكىزدى. بۇگىن ول قاراعايلى شاعىن اۋدانىندا 57 شارشى مەتر، 2 بولمەلى پاتەردىڭ يەسى اتاندى.
ايتا كەتەيىك، تۇرعىن ءۇي سوڭعى ۇلگىدە، مۇمكىندىگى شەكتەۋلى جانداردىڭ كىرىپ شىعۋىنا ىڭعايلى ەتىپ جاسالعان. باسپانالى بولعان تۇرعىندار وبلىس جانە قالا باسشىلىعىنا العىستارىن ءبىلدىردى.