سەمەيدە كونتەنت ءۇشىن جول ەرەجەسىن ورەسكەل بۇزىپ جۇرگەن بلوگەر جاۋاپقا تارتىلدى

سەمەي. KAZINFORM - سەمەي قالاسىندا بىرنەشە رەت جول ەرەجەسىن ورەسكەل بۇزىپ، اينالاسىنا قاۋىپ توندىرگەن Toyota Camry اۆتوكولىگىنىڭ 22 جاستاعى جۇرگىزۋشىسى ۇستالدى.

بەلگىلى بولعانداي، ول جول ەرەجەلەرىن قاساقانا بۇزىپ، ونى ۆيدەوعا ءتۇسىرىپ، TikTok الەۋمەتتىك جەلىسىنە جاريالاپ وتىرعان.

- بلوگەر ءبىر اپتا ىشىندە بىرنەشە اۋىر قۇقىقبۇزۋشىلىق جاسادى. اتاپ ايتقاندا، جىلدامدىقتى بەلگىلەنگەن شەكتەن اسىرىپ، ءتورت جولاقتى جولدا قارسى قوزعالىس جولاعىنا شىعىپ، باعدارشامنىڭ تىيىم سالاتىن سيگنالىنا وتكەن. سونداي-اق مانەۆر جاساۋ قاعيدالارىن بۇزىپ، كولىك جۇرگىزۋ كەزىندە قاۋىپسىزدىك بەلدىگىن تاقپاعان جانە ۇيالى تەلەفون قولدانعان، - دەپ حابارلادى اباي وبلىستىق پوليتسيا دەپارتامەنتىنەن.

سونىمەن قاتار اۆتوكولىك الدىڭعى مەملەكەتتىك تىركەۋ نومىرلىك بەلگىسىنسىز جۇرگەن جانە وعان پايدالانۋعا تىيىم سالىنعان ارنايى جارىق قۇرىلعىلارى ورناتىلعان.

- اتالعان بارلىق قۇقىقبۇزۋشىلىق بويىنشا جۇرگىزۋشىگە قاتىستى اكىمشىلىك حاتتامالار تولتىرىلدى. ءبىرقاتار دەرەك بويىنشا ءىس سوتقا جولدانادى. ەر ادام كولىك باسقارۋ قۇقىعىنان ايىرىلىپ، ءىرى كولەمدە ايىپپۇل تولەۋى مۇمكىن، - دەلىنگەن اقپاراتتا.

اۆتور

تالعاتجان مۇحامەتبەك ۇلى