سەمەيدە جاراقات العان مۇعالىمگە ءومىر بويى وتەماقى بەرۋ ۇسىنىلدى
استانا. KAZINFORM - سەمەي قالاسىندا شىرشا ورناتۋ مەن بەزەندىرۋگە بولىنگەن قاراجات تەكسەرىلىپ، بيۋجەت قاراجاتىن ماقساتسىز پايدالانعاندار جاۋاپقا تارتىلۋى كەرەك.
بۇل تۋرالى ءماجىلىس دەپۋتاتى جۇلدىز سۇلەيمەنوۆا ق ر باس پروكۋرورى بەرىك اسىلوۆقا ساۋال جولدادى. 2024-جىلعى 21-جەلتوقساندا 49-مەكتەپتىڭ قازاق ءتىلى مەن ادەبيەتى ءپانىنىڭ مۇعالىمى، 49 جاستاعى قۋات ايتقاليەۆ ورتالىق الاڭدا جاڭا جىلدىق شىرشانى بەزەندىرۋ كەزىندە بيىكتىكتەن قۇلاپ، اۋىر جاراقات العان ەدى.
- پرەزيدەنت تاپسىرماسىمەن قابىلدانعان «پەداگوگ مارتەبەسى تۋرالى» زاڭ ۇستازداردىڭ زاڭدى مۇددەسى مەن قۇقىقتارىن قورعاۋعا ارنالعان. اتالعان زاڭ مۇعالىمدەردىڭ نەگىزگى قىزمەتىنە جاتپايتىن ارتىق مىندەتتەردەن قورعاۋى شارت. الايدا، وسى جاعداي پەداگوگ مارتەبەسى تۋرالى زاڭدى ورەسكەل بۇزىپ تۇر. مۇعالىمدەردى زاڭسىز جۇمىسقا تارتۋ شەشىمىن قابىلداعان جانە «پەداگوگ مارتەبەسى تۋرالى» زاڭدى بۇزعان تۇلعالاردى انىقتاپ، قاتاڭ جاۋاپكەرشىلىككە تارتۋدى سۇرايمىز، - دەدى دەپۋتات بۇگىنگى ءماجىلىس وتىرىسىندا.
سونداي-اق، دەپۋتات زارداپ شەككەن مۇعالىمگە تولىق مەديتسينالىق كومەك كورسەتۋدى جانە زاڭدى وتەماقى تولەۋدى، ونىڭ ىشىندە پەداگوگتىڭ العان جاراقاتىن وندىرىستىك جاراقات دەپ تانۋدى جانە وعان ءومىر بويى وندىرىستىك جاراقاتقا بەرىلەتىن تولەمدى تاعايىنداۋدى سۇرادى.
- سەمەي قالاسىندا شىرشا ورناتۋ مەن بەزەندىرۋگە بولىنگەن قاراجاتتى تەكسەرىپ، بيۋجەت قاراجاتىن ماقساتسىز پايدالانعاندار بولسا، ولاردى زاڭ اياسىندا جاۋاپقا تارتۋ قاراستىرىلسىن. «پەداگوگ مارتەبەسى تۋرالى» زاڭ تالاپتارىن ساقتاماۋ جاعدايلارىنا بايلانىستى بارلىق ءبىلىم بەرۋ ۇيىمدارىندا تەكسەرىس جۇرگىزىپ، مۇعالىمدەردىڭ قۇقىقتارى مەن قاۋىپسىزدىگىن قامتاماسىز ەتۋ بويىنشا قوسىمشا شارا قابىلداۋدى ۇسىنامىز، - دەدى ج. سۇلەيمەنوۆا.
بۇعان دەيىن دەنساۋلىق ساقتاۋ مينيسترلىگى مەديتسينالىق كومەك كورسەتۋ دەپارتامەنتىنىڭ ديرەكتورى گۇلنار سارسەنبايەۆا سەمەيدە شىرشا بەزەندىرۋ كەزىندە جاراقات العان مۇعالىمنىڭ جاي-كۇيى تۋرالى ايتىپ بەردى.
وقيعاعا بايلانىستى قالا اكىمىنىڭ ورىنباسارى ارايبەك حامزايەۆقا سوگىس جاريالاندى جانە ءبىلىم ءبولىمىنىڭ باسشىسى ءبىرجان بۇلابايەۆ قىزمەتىنەن بوساتىلدى.