سەمەيدە 1000 نان استام ادام ءانۇراندى بىرگە شىرقادى
سەمەي. قازاقپارات – 4-ماۋسىم -قازاقستان رەسپۋبليكاسىنىڭ مەملەكەتتىك رامىزدەرى كۇنىنە وراي سەمەي قالاسىندا 1000 نان استام ادام ءانۇراندى بىرگە شىرقادى.
- رامىزدەردىڭ ءارقايسىسى تەرەڭ تاريحي ماڭىزعا يە. كوكتە جەلبىرەگەن تۋ، كۇش- قۋات بەن بەرەكە-بىرلىكتى ايقىندايتىن ەلتاڭبا، سالتاناتتى ساتتەردە شىرقالاتىن ءانۇران قازاقستاننىڭ ەگەمەندىگى مەن ەلدىگىنىڭ سيمۆولى. اباي وبلىسىندا تاڭەرتەڭنەن بەرى ءتۇرلى مەرەكەلىك ءىس- شارالار وتكىزىلىپ جاتىر. سونىڭ ىشىندە ورتالىق الاڭدا وتكەن اۋقىمدى پاتريوتتىق فلەشموبتى ەرەكشە اتاپ وتۋگە بولادى. الاڭدا ءبىر مەزەتتە مىڭنان استام سەمەيلىك ءانۇراندى شىرقادى، - دەپ حابارلادى وبلىس اكىمدىگىنەن.
شاراعا وبلىس اكىمى نۇرلان ۇرانحايەۆ، ارداگەرلەر، دەپۋتاتتار، قوعام قايراتكەرلەرى، ساربازدار، ءتارتىپ ساقشىلارى، مەملەكەتتىك قىزمەتشىلەر، جاستار جانە قالا تۇرعىندارى قاتىستى.
مەرەكە اياسىندا «بەيبىتشىلىك» ارالىنان ورتالىق الاڭعا دەيىنگى ارالىقتا ۆەلوجارىس ۇيىمداستىرىلدى. وعان 200 دەن استام ۆەلوشاباندوز قاتىستى. جارىستا باق سىناعاندار پاتريوتتىق فلەشموبقا دا قوسىلدى.
ايتا كەتەيىك، بۇگىن جاستار اراسىندا تاقىرىپتىق كورمەلەر، چەللەندجدەر مەن فلەشموبتار وتەدى.