سمەتوۆتىڭ جەڭىستى ءساتىن ەسكى تەلەديداردان كورگەن قاريا كوپتىڭ كوڭىلىن بوساتتى

استانا. قازاقپارات - پاريج وليمپياداسىندا دزيۋدودان التىن مەدال يەلەنگەن ەلدوس سمەتوۆتىڭ جارىسىن بارشا قازاقستان تاماشالادى. سمەتوۆتىڭ تاريحي جەڭىسىنە جاس تا، كارى دە قۋاندى، دەپ حابارلايدى Azattyq Rýhy.

ەلدوس سمەتوۆتىڭ پاريج تورىندەگى جەڭىسى كوپتىڭ كوڭىلىن بوساتتى. بۇل التىن سپورتشى ءۇشىن دە، جانكۇيەرلەرى ءۇشىن دە كوپتەن كۇتكەن جەڭىس بولدى. سەبەبى سپورتشى وسىعان دەيىن 2016 -جىلى ريو وليمپياداسىندا كۇمىس، 2021 -جىلى توكيو وليمپياداسىندا قولا مەدال قانجىلاعان ەدى. بۇل پاريج وليمپياداسىنداعى تۇڭعىش التىن مەدال بولعاندىقتان دا، حالىقتىڭ شابىتىن وياتتى.

ەلدوس سمەتوۆتىڭ جەڭىسىن تەلەديداردان تاماشالاپ، جانكۇيەر بولعان اعايىننىڭ اسەرى - بولەك قۇبىلىس بولدى. جەلىدە تاراعان ۆيدەولارعا قاراپ، ەلدوس سمەتوۆ شىنىمەن دە حالىقتىڭ ادامى ەكەنىن بايقاۋعا بولادى.

ماسەلەن، مىنا قاريا وليمپياداداعى سمەتوۆتىڭ جارىسىن ەسكى تەلەديدارىنىڭ الدىندا وتىرىپ تاماشالاعان. ونىڭ ۆيدەوسى قازىر الەۋمەتتىك جەلىدەگى كوڭىل بوساتار ساتتەردىڭ بىرىنە اينالدى. بۇل ۆيدەونىڭ استىنا پىكىر جازعانداردىڭ ءبىرى چەمپيون ەلدوس سمەتوۆكە وسى قارياعا تەلەديدار الىپ بەرىڭىزشى دەپ وتىنگەن. ءبىراق، كوپشىلىك وسى قاريانى ىزدەپ تاپسا، وزدەرى-اق سۋ جاڭا تەلەديدار الىپ بەرۋگە دايىنبىز دەپ جازعان. بەلگىلى بولىپ وتىرعانداي، بۇل جانكۇيەر شىعىس قازاقستان وبلىسى، ۇلكەن نارىن اۋىلىنىڭ تۇرعىنى بولىپ شىقتى. Azattyq Rýhy ءتىلشىسى قازىر قاريامەن بايلانىسۋعا تىرىسىپ جاتىر.

«اتاعا تەز ارادا سمارت تەلەديدار كەرەك ەكەن. ەلدوس، اتامىزعا تەلەديدار الىپ بەرشى. جانكۇيەر اتا كۇش بەرىپ وتىر. توقسانىنشى جىلدار ەسكە ءتۇسىپ كەتتى. اتاعا تەلەديداردى مەن الىپ بەرەيىن»، - دەپ جازعان ۆيدەونى كورگەن ادامدار.

توقسان جاستاعى تاعى ءبىر قاريا ەلدوس سمەتوۆتىڭ جەڭىسىن تەلەفوننان تاماشالاپ وتىرىپ، كوزىنە جاس العان.

سونداي-اق جەڭىس ساتىندەگى قازاقستاندىقتاردىڭ ەموتسياسى كوپتى ەلجىرەتتى. مەكتەپ وقۋشىسىنىڭ جەڭىس ساتىنەن كەيىن اكەسىن قۇشاقتاپ جىلاپ جىبەرگەن ۆيدەوسى دا الەۋمەتتىك جەلىدە تەز تارالىپ جاتىر.

ەلدوس سمەتوۆتىڭ كورشىلەرى دە وليمپيادا چەمپيونىنىڭ شاڭىراعىندا جينالىپ، جەڭىسكە بىرگە قۋانعان. دەرەككوزىنە سۇيەنسەك، سمەتوۆتىڭ شاڭىراعىنا كورشىلەرىنىڭ ءبارى جينالعان.