سەمسەرلەسۋدەن ليتسەنزيالىق تۋرنيردە ەل نامىسىن كىمدەر قورعايدى

استانا. KAZINFORM – ناۋرىزدىڭ 22-24-كۇندەرى گرۋزيا استاناسى تبيليسيدە شپاگامەن سەمسەرلەسۋدەن الەم كۋبوگى كەزەڭى وتەدى.

ق ر ۇلتتىق وليمپيادالىق كوميتەتى ءمالىم ەتكەندەي، اتالعان كەزەڭدە الەمنىڭ 60 تان استام ەلىنەن جينالعان سپورتشىلار رەيتينگىلىك ۇپاي مەن پاريج وليمپياداسىنىڭ جولداماسى ءۇشىن تارتىسقا تۇسەدى. اسىرەسە، بۇل دودا قازاقستاندىق شپاگاشىلار ءۇشىن ماڭىزدى بولماق. سەبەبى، رۋسلان كۋربانوۆ پەن ەلمير اليمجانوۆ باستاعان قۇراما تاريحتا تۇڭعىش رەت كوماندالىق سىندا ليتسەنزيا جەڭىپ الۋى مۇمكىن.

گرۋزياداعى الەم كۋبوگىنە قازاقستان ساپىنان 12 سپورتشى قاتىسادى.

ولار: رۋسلان كۋربانوۆ، ەلمير اليمجانوۆ، ەرلىك سەرتاي، ۆاديم شارلايموۆ، الەكساندر فەدوتوۆ، الەكسەي كاساتكين، بوگدان لۋكين، كيريلل پاۆلوۆ، كيريلل پروحودوۆ، الەكساندر ساۆين، گەورگي تيننيكوۆ، نيكيتا جۋلينسكي.

22-23- ناۋرىز كۇندەرى شپاگادان جەكەلەي سىنداعى جەڭىمپازدار انىقتالسا، 24-ناۋرىزدا كوماندالىق جارىستان وليمپيادا جولداماسىنىڭ تاعدىرى شەشىلەدى.

قازىرگى تاڭدا قازاقستان كومانداسى گرۋزيادا وقۋ-جاتتىعۋ جيىنىنا قاتىسىپ جاتىر. قۇراماداعى 12 سپورتشىنىڭ ىشىنەن ءتورت سپورتشى جولداماعا تالاسادى. ولار - رۋسلان كۋربانوۆ، ەلمير اليمجانوۆ، ەرلىك سەرتاي، ۆاديم شارلايموۆ تورتتىگى.

ەگەر تبيليسيدەگى الەم كۋبوگى كەزەڭىندە قازاقستاندىق ءساتتى ونەر كورسەتىپ، جولداماعا قول جەتكىزەتىن بولسا، قازاقستانعا پاريج وليمپياداسىنىڭ ءتورت جولداماسى بەرىلەدى. ونىڭ ۇشەۋى جەكەلەي سىنعا، بىرەۋى تۇتاس كومانداعا تابىستالماق.

ايتا كەتەلىك، گرۋزياداعى الەم كۋبوگى كەزەڭىندە شپاگامەن سەمسەرلەسۋدەن قازاقستان كومانداسى ازيا قۇرلىعىنداعى جالعىز جولداماعا تالاسادى. الەمدىك ۇيىم قاعيداسى بويىنشا، وليمپيادالىق رەيتينگتە العاشقى ءتورت ورىندا تۇرعان كوماندالار اۆتوماتتى تۇردە جازعى ويىندارعا قاتىسادى. ال قالعان قۇرامالارى قۇرلىققا بولىنەتىن ءبىر جولدامانى ساراپقا سالادى.

قازىرگى كەزەڭدە قازاقستان كومانداسى وليمپيادالىق رەيتينگتە بەسىنشى ورىندا تۇر. سوڭعى رەت قازاقستان كومانداسى وڭتۇستىك كورەيامەن حاڭجوۋداعى جازعى ازيا ويىندارىندا كەزدەسىپ، ءىرى ەسەپپەن ۇتقان بولاتىن.

اۆتوركۇنسۇلتان وتارباي