سمارتفونداردى تىركەۋ ەرەجەسى وزگەرەدى

استانا. KAZINFORM - ەلىمىزدە ابونەنتتىك قۇرىلعىلاردىڭ «اق»، «سۇر» جانە «قارا» ءتىزىمى پايدا بولادى. بۇل تۋرالى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى تىركەلگەن بايلانىس جوبالارىن مونيتورينگىلەۋ جانە دامىتۋ باسقارماسىنىڭ باسشىسى ازامات سەرىكتايەۆ ايتتى.

- قابىلداپ جاتقان ەرەجەگە سايكەس، ابونەنتتىك قۇرىلعىلاردىڭ «اق»، «سۇر» جانە «قارا» ءتىزىمى پايدا بولادى. ەرەجەنىڭ ەڭ باستى ماقساتى - تۇتىنۋشىلار مەن ابونەنتتەردى قاۋىپسىز جانە تەكسەرىلگەن ابونەنتتىك قۇرىلعىلارمەن قامتاماسىز ەتۋ. ەگەر قۇرىلعىڭىز اتالعان ەرەجە زاڭدى كۇشىنە ەنگەنگە دەيىن ساتىپ الىنعان بولسا، ەشقانداي قوبالجۋدىڭ، الاڭداۋدىڭ ەش قاجەتى جوق، - دەدى ازامات سەرىكتايەۆ.

ونىڭ اتاپ وتۋىنشە، بۇل ەرەجەنىڭ وسى جىلدىڭ 24-ناۋرىزىنا دەيىن ساتىپ الىنعان ابونەنتتىك ۇيالى بايلانىس قۇرىلعىلارىنا ەش قاتىسى بولمايدى. اتالعان مەرزىمگە دەيىن ساتىپ الىنعان ۇيالى بايلانىس قۇرىلعىلاردىڭ بارلىعى اۆتوماتتى تۇردە «اق» تىزىمگە ەنگىزىلەدى.

- ياعني، زاڭنىڭ كەرى كۇشى جوق. ەرەجە زاڭدى كۇشىنە ەنگەننەن كەيىن عانا ساتىپ الىنعان قۇرىلعىلارعا عانا قاتىستى بولادى، - دەدى باسقارما باسشىسى.

ازامات سەرىكتايەۆتىڭ سوزىنە قاراعاندا، ۇيالى بايلانىس قۇرىلعىلارىن تىركەۋ قاعيدالارىنا ەنگىزىلەتىن وزگەرىستەر قۇرىلعىلار باعاسىنا اسەر ەتپەيدى.

ەستەرىڭىزگە سالا كەتەيىك، 2025-جىلعى 24-ناۋرىزدان باستاپ ابونەنتتىك ۇيالى بايلانىس قۇرىلعىلارىن تىركەۋ ەرەجەلەرىنە ەنگىزىلگەن وزگەرىستەر كۇشىنە ەنەدى.

وسىعان دەيىن ۇكىمەت باسشىسى ولجاس بەكتەنوۆتىڭ ۇيالى بايلانىس وپەراتورلارى اراسىندا باسەكەلەستىك بايقالمايتىنى تۋرالى ايتقانىن جازدىق.