سمارت-كوزىلدىرىكتەر الەمدى قالاي وزگەرتپەك
وسكەمەن. KAZINFORM - قازىر ءبىز جارنامانىڭ بەت-بەينەسى مۇلدە وزگەرگەن داۋىردە ءومىر ءسۇرىپ جاتىرمىز. قۇددى ءبىر ۆيرتۋالدى الەم پايدا بولىپ، ۇيالى تەلەفون ءبىزدى سول جاھانمەن بايلانىستىرىپ تۇرعانداي. جاڭا تەحنولوگيالار تاعى قانداي وزگەرىستەر اكەلىپ جاتقاندىعىن ساراپتاپ كوردىك.
سيقىرعا تولى ساندىق تەحنولوگيا
بۇرىندا كوشەدەگى جارنامالار قاراپايىم ەدى: بيلبوردتار، باننەرلەر، LED ەكراندار. ال بۇگىندە الەۋمەتتىك جەلىلەردە بۋردج-حاليفانىڭ تۋرا قاسىنداعى قوراپتان اتىپ شىققان الىپ باربي قۋىرشاعى نەمەسە بيگ-بەننىڭ مامىققا ورانعان كولىگى سىندى ۆيدەولار جەلىدە جەلدەي ەسىپ ءجۇر.
ءبىراق بۇل جارناماداعى كورىنىستەر ومىردە جوق. ۆيرتۋالدى جارناما - الەۋمەتتىك جەلىلەر ءۇشىن ارنايى جاسالعان كۇردەلى كومپيۋتەرلىك گرافيكا. كومپانيالار ميلليونداعان قارالىم جينايتىن ۆيرۋستىق ۆيدەولاردى شىعارۋ ارقىلى ءوز ونىمدەرىن جارنامالايدى.
بۇل تەك ماركەتينگتىك ايلا عانا ەمەس. ول جاھاندىق تەندەنسيانى كورسەتەدى: شىنايى ءومىر مەن ۆيرتۋالدى الەم اراسىنداعى شەكارا جويىلىپ بارادى.
ەكرانداعى وزگەشە ءومىر
وسى ۋاقىتقا دەيىن ۆيرتۋالدى الەم تەك ويىندارمەن بايلانىستى بولدى. بۇگىندە ول ءبىلىم سالاسىندا، ينجەنەريادا جانە ءتىپتى تۋريزمدە بەلسەندى تۇردە قولدانىلادى. ۆيرتۋالدى سيمۋلياتورلار بولاشاق حيرۋرگتارعا «سيفرلىق» پاتسيەنتتەرگە ءوز داعدىلارىن جەتىلدىرۋگە كومەكتەسەدى، ال ۇشقىشتار ۇيدەن شىقپاي-اق تاجىريبە جيناقتايدى.
وسىنشاما پروگرەسكە قاراماستان ۆيرتۋالدى الەمدى جاپپاي ىسكە قوسۋ ءالى دە جابدىقتاردىڭ رابايسىزدىعىنان اقساڭداپ تۇر. سوندىقتان تەحنولوگيالىق الپاۋىتتار جەڭىلدىككە، ستيلگە جانە تاسىمالداۋدىڭ ىڭعايلىعىنا باسا نازار اۋدارادى. ولاردىڭ ماقساتى - كۇندەلىكتى كيۋگە بولاتىن ىڭعايلى سمارت كوزىلدىرىك جاساۋ.
Meta-نىڭ Ray-Ban كومپانياسىمەن بىرلەسە جاساعان كەڭەيتىلگەن الەم كوزىلدىرىگى ۇلكەن جاڭالىق بولدى. ونىڭ ادامدى تولىعىمەن سيفرلىق ومىرگە اپاراتىن ۆيرتۋالدى الەمنەن ايىرماشىلىعى - كەيبىر سيفرلىق ەلەمەنتتەردى عانا قورشاعان ورتاعا قوسىپ، ونىڭ مۇمكىندىكتەرىن كەڭەيتەدى. مۇنداي كوزىلدىرىكتىڭ كومەگىمەن سمارتفوندى قالتاڭىزدان شىعارماي-اق «كوزبەن» فوتو-ۆيدەو تۇسىرۋگە، مۋزىكا تىڭداۋعا، قوڭىراۋلارعا جاۋاپ بەرۋگە بولادى. ال وعان ەنگىزىلگەن ونلاين اۋدارماشى سىزگە شەت ءتىلىن بىردەن تۇسىنۋگە كومەكتەسەدى.
Samsung كومپانياسى Google-مەن بىرلەسىپ، ءوزىنىڭ سمارت كوزىلدىرىكتەرىن شىعارۋعا دايىندالىپ جاتىر. ولاردىڭ مۇمكىندىكتەرى دە وراسان: جاساندى ينتەللەكت ارقىلى دەرەكتەردى جىلدام وڭدەپ، جاناسۋسىز تولەم جاساپ، ىم مەن بەت-الپەتتى تاني الادى.
سمارت- كوزىلدىرىكتەر ادام ومىرىنە تالاي يگى وزگەرىس اكەلەيىن دەپ تۇر. مىسالى، ەندى حالىق قالا ىشىندە ءبىر دۇكەندى تابۋ ءۇشىن تەلەفونىن شىعارماي-اق كوزىلدىرىك ارقىلى جولدى بىلە سالادى. وسىناۋ تەحنولوگيا كەڭىنەن تارالىپ كەتسە، سمارتفوندار وزەكتىلىگىن جوعالتۋى دا مۇمكىن.
الەمدى تۇگەل شارلاۋعا مۇمكىندىك
اۋە كومپانيالارى ۇشۋدى ىڭعايلى ءارى قىزىقتى ەتۋ ءۇشىن ۆيرتۋالدى الەم تەحنولوگيالارىن ەنگىزۋدە. كادۋىلگى فيلمدەر مەن مۋزىكانىڭ ورنىنا جولاۋشىلار ۆيرتۋالدى تۋرعا شىعىپ، باراتىن جەرىن الدىن الا بىلە الادى.
ەلەستەتىپ كورىڭىزشى، ءسىز لوندونعا ۇشىپ بارا جاتىرسىز جانە قازىردىڭ وزىندە ۆەستمينستەر كوشەلەرىمەن سەرۋەندەپ شىعا الاسىز.
ساندىق تەحنولوگيالار جاڭا ساياحاتتارعا دا شابىتتاندىرادى. مىسالى، ۋەلس بيلىگى ەلدىڭ كورىكتى بۇرىشتارىنا ۆيرتۋالدى تۋر جاسادى. حالىق سول ارقىلى كونە بەكىنىستەردى زەرتتەپ، تابيعاتتىڭ الەم جەرلەرىن تاماشالاي الادى جانە كەلت اڭىزدارى الەمىنە ەنەدى.
سپورت تا ەندى بۇرىنعىداي بولمايدى
ۆيرتۋالدى الەم سپورتتىق جاتتىعۋلارعا جاڭا كوزقاراسپەن قاراۋعا مۇمكىندىك بەرەدى. ياعني، ونى پايدالى عانا ەمەس، قىزىقتىراق ەتەدى.
مىسالى، Meta كومپانياسىنىڭ «عاجايىپ» اتتى فيتنەس ويىنى پايدالانۋشىلاردى ۆيرتۋالدى جاتتىقتىرۋشىلارمەن جاتتىعۋعا، ىرعاقتى مۋزىكانى تاڭداۋعا، مەديتاتسيا جاساۋعا نەمەسە يوگامەن اينالىسۋعا بولاتىن 360 گرادۋستىق تسيفرلىق الەمگە ەنگىزەدى.
پايدالانۋشىلار مۇنداي جاتتىعۋلاردان كەيىن سەزىمنىڭ دە بولەك بولاتىنىن ايتتى. زەرتتەۋلەر ۆيرتۋالدى الەمدەگى جاتتىعۋلارىنىڭ جۇگىرۋ، ءجۇزۋ نەمەسە بوكس سياقتى ءداستۇرلى كارديو جاتتىعۋلارى سياقتى ءتيىمدى ەكەنىن راستاپ وتىر.
بولاشاق ەندى قانداي بولادى؟
ءبىز شىنايى ءومىر مەن ۆيرتۋالدىلى الەم اراسىنداعى شەكارالار قامىسقا تيگەن ورتتەي جىلدام جويىلىپ بارا جاتقان جاڭا ءداۋىردىڭ تابالدىرىعىندا تۇرمىز. بۇگىندە الەۋمەتتىك جەلىلەر ادامنىڭ قابىلداۋى مەن مىنەز- قۇلقىنا اسەر ەتۋدە. ال فيزيكالىق جانە سيفرلىق الەمدەر اراسىنداعى بوگەت تولىعىمەن جويىلعاندا نە بولادى؟
بريتاندىق «جاسوسپىرىمدىك شاق» تەلەحيكاياسى جەلىدەگى ورتانىڭ جاسوسپىرىمدەر اراسىندا شىنايى ومىردەگى قايعىلى وقيعالاردى تۋدىراتىنىن كورسەتىپ، قوعامدى ءدۇر سىلكىندىردى. اسەردىڭ كۇشتى بولعانى سونشا، پرەمەر-مينيستر كير ستارمەر ونى ءوز بالالارىمەن بىرگە تاماشالادى.
ەموتسيالار ەكراننان شىعىپ، ارەكەتكە اينالعاندا، ناعىز سىن ساعات تۋىندايدى. سمارت-كوزىلدىرىكتى ازىرلەۋشىلەر ءومىردى ىڭعايلىراق ەتەتىنى راس. ءبىراق سونىڭ سالدارىنان وتىرىك پەن شىندىقتى اجىراتا الماي قالىپ، «ماتريتساعا» ءتۇسىپ كەتپەسىمىزگە كىم كەپىل؟ سۇراق كوپ بولعانمەن، ازىرگە جاۋاپ از.
اۆتور
تالعاتجان مۇحامەتبەك ۇلى