ۆەنەسۋەلا ۇكىمەتى بۇكىل ەل بويىنشا توتەنشە جاعداي جاريالادى. ەلدەگى لا-گۋايرا شتاتى اپات ايماعى دەپ جاريالاندى.
جەر استى دۇمپۋلەرى ەل استاناسى كاراكاستا سەزىلدى. قالا ينفراقۇرىلىمىنا زالال كەلتىرىلدى.
- بۇل ناعىز قايعىلى وقيعا. ونداعان عيمارات قيرادى جانە ءبىز مۇمكىندىگىنشە كوپ ادامنىڭ ءومىرىن ساقتاپ قالۋ ءۇشىن قولدان كەلگەننىڭ ءبارىن جاساپ جاتىرمىز، - دەپ مالىمدەدى ۆەنەسۋەلا پرەزيدەنتىنىڭ مىندەتىن اتقارۋشى دەلسي رودريگەس.
رودريگەس قازا تاپقانداردىڭ وتباسىنا كوڭىل ايتىپ، ۇيلەردىڭ تاۋەكەلدەرىن باعالاۋدا تىنىشتىق، بىرلىك جانە ىنتىماقتاستىققا شاقىردى.
ەسكە سالساق، جەراستى دۇمپۋلەرى سارسەنبى كۇنى جەرگىلىكتى ۋاقىتپەن ساعات 18:04-تە (استانا ۋاقىتىمەن بەيسەنبى كۇنى ساعات 03:04) ۆالەنسيا قالاسىنان سولتۇستىك- باتىسقا قاراي 60 شاقىرىم جەردە تىركەلگەن.
اتالعان قالادا شامامەن 1,62 ميلليون ادام تۇرادى.
جەر سىلكىنىسىنىڭ وشاعى 13 شاقىرىم تەرەڭدىكتە ورنالاسقان. كوپ ۇزاماي جەر بەتىنە جاقىن جەردە، نەبارى 10 شاقىرىم تەرەڭدىكتە 7,5 بالدىق تاعى ءبىر جەر سىلكىنىسى بولدى.
جەر سىلكىنىستەرىنىڭ كۇشتى بولعانى سونشالىق، ولار كولۋمبيانىڭ بىرنەشە ايماعىندا دا سەزىلدى.
جيىرما افتەرشوك تۋرالى بەلگىلى. ال سەيسمولوگتەر 24 ساعات ىشىندە 4,0 بالدىق نەمەسە ودان دا ۇلكەن 20 افتەرشوك، ال ءبىر اپتا ىشىندە ماگنيتۋداسى 5,0 بال تاعى التى جەر سىلكىنىسى سەزىلەتىنىن ەسكەرتتى.
جەر سىلكىنىسى ۆەنەسۋەلانىڭ تاۋەلسىزدىك ءۇشىن سوعىسىنداعى ماڭىزدى وقيعا - كارابوبو شايقاسىنىڭ مەرەيتويىن اتاپ وتۋگە ارنالعان ۇلتتىق مەرەكەسىمەن تۇسپا-تۇس كەلدى. مەرەكەلىك شاراعا بايلانىستى كوپ ادام ۇيلەرىندە بولدى.
ا ق ش بيلىگىنىڭ پىكىرىنشە، سوڭعى ءجۇزجىلدىقتا ۆەنەسۋەلادا تىركەلگەن ەڭ قۋاتتى سەيسميكالىق قوزعالىس ءتىپتى 1967 -جىلى كاراكاستىڭ ءبىر بولىگىن قيراتىپ، جۇزدەگەن ادامنىڭ ءومىرىن قيعان وقيعادان دا كۇشتى بولدى.
- ۆەنەسۋەلانىڭ ۇلى حالقىنىڭ باسىنا تۇسكەن ەكى قۋاتتى جەر سىلكىنىسى وتە كولەمدى جانە ادامدار ءومىرىن قيدى. ا ق ش كومەكتەسۋگە دايىن، نيەتتى جانە قابىلەتتى! مەن بارلىق مەملەكەتتىك ۆەدومستۆولارعا جەدەل ارەكەت ەتۋگە دايىندالۋدى تاپسىردىم. ءبىز كەرەمەت جاڭا دوستارىمىزدىڭ قاسىندا بولامىز. العاشقى حابارلامالار كوڭىل كونشىتپەيدى، - دەپ جازدى ا ق ش پرەزيدەنتى دونالد ترامپ الەۋمەتتىك جەلىلەردە.
وسىعان دەيىن جاپونيادا 6,9 بالدىق جەر سىلكىنىسى بولعانىن حابارلادىق.