ەسكى كولىكتەرگە سالىناتىن سالىق تومەندەتىلەدى

استانا. KAZINFORM - ەسكى كولىكتەرگە سالىناتىن سالىق تومەندەتىلەدى. بۇل تۋرالى بۇگىن ماجىلىستە جاڭا سالىق كودەكسىنىڭ جوباسىن تانىستىرعان ۇلتتىق ەكونوميكا ۆيتسە-ءمينيسترى ازامات ءامرين ايتتى.

«مەملەكەت باسشىسىنىڭ تاپسىرمالارىن ورىنداۋمەن قاتار، قوعام ءجيى كوتەرەتىن ماسەلەلەر شەشىلەدى. ماسەلەن، جاڭا سالىق كودەكسىندە ءبىرىڭعاي جيناقتاۋشى زەينەتاقى قورىنان زەينەتاقى تولەمدەرىن جەكە تابىس سالىعىنان بوساتۋ جونىندەگى نورما كوزدەلگەن. سونداي-اق، قولدانۋى 10 جىلدان اسقان اۆتوموبيلدەر ءۇشىن سالىق سوماسى 30 پايىزعا، 20 جىلدان اسقان اۆتوموبيلدەر ءۇشىن 50 پايىزعا تومەندەتىلەتىن بولادى»، - دەدى ازامات ءامرين.

سونىمەن قاتار ونىڭ دەرەگىنشە، «ءسان-سالتانات» زاتتارىنا جوعارى سالىق سالۋ جونىندەگى مىندەتتەردى ىسكە اسىرۋ ءۇشىن مىنالار ۇسىنىلادى:

- جيىنتىق قۇنى 450 ميلليون تەڭگەدەن اساتىن جىلجىمايتىن مۇلىك وبەكتىلەرى بويىنشا مۇلىك سالىعىنىڭ جوعارى مولشەرلەمەسى؛

- كەدەندىك قۇنى 75 ميلليون تەڭگەدەن اساتىن جەڭىل اۆتوموبيلدەرگە اكسيزبەن قوسىمشا سالىق سالۋ؛

- قىمبات الكوگول جانە تەمەكى ونىمدەرىنە، سونداي-اق قىمبات تەڭىز كەمەلەرىنە، ۇشۋ اپپاراتتارىنا اكسيزبەن قوسىمشا سالىق سالۋ.

وسىعان دەيىن ۇكىمەتتىڭ 1,3 تريلليون تەڭگەدەن استام سوماعا 110 سالىقتىق جەڭىلدىكتى الىپ تاستاعالى وتىرعانىن جازدىق.