سەكسەنىنشى جىلدان كەيىن تۋعاندارعا زەينەتاقى تاعايىنداۋ ءتاسىلى وزگەرەدى - مينيستر

استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا زەينەتاقى جيناعىنا اقشا اۋدارماي جۇمىس ىستەپ جۇرگەن قازاقستاندىقتاردىڭ زەينەتاقىسى قالاي تاعايىندالاتىنىن ءتۇسىندىردى.

مينيستر س. جاقىپوۆا ەلەكتروندى ەڭبەك بيرجاسى پورتالىن تانىستىرۋ ءۇشىن ب ا ق وكىلدەرىمەن «گالستۋكسىز» كەزدەسۋ وتكىزىپ، جۋرناليستەردىڭ ساۋالدارىنا جاۋاپ بەردى. قويىلعان سۇراقتاردىڭ اراسىندا 1998-جىلدان كەيىن ەڭبەككە ارالاسقان، ءبىراق زەينەتاقى جيناعىنا ءبىر دە ءبىر تەڭگە اۋدارماعان ادامداردىڭ كەلەشەگى تۋرالى سۇراق قويىلدى.

«بازالىق زەينەتاقى بارىنە كەپىلدەندىرىلگەن. ياعني، بارىنە تولەنەدى. ەگەر ول ازاماتتاردىڭ ءبىرىڭعاي زەينەتاقى قورىنا اۋدارعان جارنالارى، اۋدارىمدارى بولماسا، مەملەكەت ولارعا دا بازالىق زەينەتاقى تولەۋدەن باس تارتپايدى. بازالىق تۇردە كومەگىن بەرەدى.

ءبىز ونداي ازاماتتاردىڭ ساراپتاماسىن جۇرگىزەمىز. سول ساراپتاماعا قاراساق، ءبىزدىڭ حالىق زەينەتكە شىعاتىن 3 جىل قالعاندا قيمىلداي باستايدى. مىسالى، ەر ازاماتتار 63 تە زەينەتكە شىعادى. سوندىقتان 60 قا كەلگەندە ءبارى زەينەتاقى جارناسىن ەڭ جوعارى كولەمدە تولەي باستايدى. نەگە؟ ءبىزدىڭ زاڭدا، كودەكستە جازىلعان. زەينەتاقىنىڭ مولشەرى كەيىنگى 3 جىل نەمەسە 36 اي بويى اۋدارىلعان جارنالاردىڭ ورتاشا كىرىسىنەن ەسەپتەلەدى. سوندىقتان قازىر قازاقستاندىقتار زەينەت جاسىنا ءۇش جىل قالعاندا اۋدارىمداردى بەلسەندى جولداۋعا ۇيرەنىپ العان. سوعان قاراعاندا، ءبىز ءوزىمىزدى ءوزىمىز الداپ وتىرمىز. 1988-جىلدان بەرى جارناسىن تۇراقتى اۋدارىپ كەلە جاتقان ازاماتتار ارتىلعان سوماعا باسپاناسىن الىپ، دەنساۋلىعىن تۇزەپ جاتىر. مەنىڭ ايتارىم، جۇمىسقا تۇرعان كەزدە ەڭبەك شارتىن جاساۋ كەرەك. ناقتى تۇردە اۋدارىمداردى ۋاقتىلى اۋدارىلعانىن قاداعالاۋ كەرەك»، - دەيدى مينيستر.

ۆەدومستۆو باسشىسى قولدانىستاعى زەينەتاقى مولشەرىن تاعايىنداۋ ءتاسىلى ۋاقىت كەلە وزگەرتىلەتىنىن ەسكە سالدى.

«مەن ايتىپ وتىرمىن عوي. تاعايىنداۋ ءتاسىلىن وزگەرتىپ، 1998-جىلدان باستاپ نەمەسە كەيىنگى 25 جىلداعى اۋدارىم كولەمىنە بايلانىستى تاعايىندالادى دەپ جازامىز. ءبىراق ءوزىڭىز تۇسىنەسىز، حالىق ونداي وزگەرىستەرگە دايىن بولۋ كەرەك. ءقازىر زەينەتكە شىعىپ جاتقان ازاماتتاردىڭ زەينەتاقى مولشەرى قولدانىستاعى نورما بويىنشا ەسەپتەلەدى. ال نەگىزىنەن سەكسەنىنشى جىلدارى تۋعان ازاماتتارعا جاڭا ءتاسىل ەنگىزەمىز. ولاردىڭ زەينەتكە شىعۋىنا دەيىن ءالى ۋاقىت بار عوي. سوندىقتان ولار قازىردەن باستاپ جارنالاردى تۇراقتى اۋدارىپ وتىرۋى كەرەك. ياعني، ولارعا كەيىنگى ءۇش جىلداعى اۋدارىمداردىڭ ولشەمى ەمەس، كەيىنگى 25 جىلداعى اۋدارىمدارى ەسەپكە الىنادى»، - دەدى سۆەتلانا جاقىپوۆا.