ەسكەندىر پاتشانىڭ كوز جۇمار الدىنداعى ءۇش تىلەگى
استانا. قازاقپارات - ەسكەندىر پاتشا قىرۋار ەلدى باعىندىرىپ، كەرى قايتار جولىندا ناۋقاستان جىعىلىپتى. ءدال وسى ساتتە ونىڭ قان-تەرىن توگىپ باعىندىرعان جەرلەرى، كۇشتى اسكەري قوسىنى، وتكىر الماس زۇلىقپارى جانە بارلىق قازىناسى ول جونىنەن زارەدەي دە پايداسى قالماعان ەدى.
ول ازىرەيىلدىڭ تاياپ قالعانىن، ءوزىنىڭ اتا مەكەنىنە جەتە الماسىن سەزەدى دە، ساربازدارىنا: «كوپ وتپەي بۇل دۇنيەدەن اتتانامىن، سەندەرگە ايتار ءۇش تىلەگىم بار، ورىنداعايسىڭدار» دەيدى. ساربازدارى كوز جاستارى كول بولا وتىرىپ ماقۇلدىق بەرەدى.
«ءبىرىنشى تىلەگىم، تابىتىمدى ءوزىمنىڭ ەمكوسىم جالعىز الىپ قايتسىن، - دەيدى ەسكەندىر ەنتىگە ءتىل قاتىپ، - ەكىنشى تىلەگىم، مەنى تابىتپەن قابىرىمە قاراي الىپ جۇرگەندە جولعا قازىنامداعى التىن-كۇمىس، گاۋهارلاردى توگىپ تاستاڭدار» دەيدى ەسكەندىر كورپەسىن قىمتانىپ. از-كەم تىنىستاپ العان سوڭ: «ەڭ سوڭعى ءوتىنىشىم مۇردەمدى الىپ جۇرگەندە ەكى قولىمدى تابىتتان سىرتقا شىعارىپ قويىڭدار» دەپتى.
ونىڭ قاسىندا جينالىپ تۇرعانداردىڭ ءبارى بۇعان قاتتى عاجاپتانسا دا «مۇنىڭىز نە ءۇشىن؟» دەپ سۇراۋعا باتا الماپتى. ەسكەندىردىڭ ەڭ قۇرمەتتى ساردارى ونىڭ قولىنان ءسۇيىپ: «تاقسىر، ءسىزدىڭ تىلەكتەرىڭىزدى ءسوزسىز ورىندايمىز! دەسە دە، نە ءۇشىن بۇلاي ىستەۋىڭىز كەرەك ەكەنىن ءبىز پاقىرلارىڭىزعا ايتۋىڭىزعا بولار ما ەكەن؟» دەپتى.
ەسكەندىر تەرەڭ تىنىس الىپ: «ءوزىم ەندى عانا بايىبىنا بارعان ءۇش ءىستى مىنا الەمنىڭ جۇرتشىلىعى تۇسىنسە ەكەن دەپ ءۇمىت ەتەمىن. تابىتىمدى ەمكوسىمە تاپسىرعانىم ادامدار دارىگەردىڭ بارلىق اۋرۋدى ەمدەي المايتىنىن، ولىمگە دە ەشقانداي امالىنىڭ جوق ەكەنىن ءبىلسىن، ءومىردى قادىرلەسىن دەپ ءۇمىت ەتكەنىم. ەكىنشى ءوتىنىشىم، وزگەلەر ماعان ۇقساس قازىنا-مۇلىككە اۋەس بولماسىن دەگەنىم. مەن بۇكىل ءومىرىمدى قازىنا-مۇلىك ءۇشىن جۇمسادىم، ءبىراق، كوپ ۋاقىتىم زايا كەتتى. ءۇشىنشى ءوتىنىشىم مەنىڭ مىنا دۇنيەگە قۇر قول كەلىپ، تاعى دا قۇر قول اتتانىپ بارا جاتقانىمدى ءتۇسىنسىن دەگەنىم»، - دەپتى دە كوز جۇمىپتى.
دايىنداعان: سۇڭقار اقبوز