Silk Way Star - پرەزيدەنت تەلەراديوكەشەنى مەن CMG ءدىڭ جاڭا جوباسى
استانا. KAZINFORM - بۇگىن استانادا ق ر پرەزيدەنتىنىڭ تەلەراديوكەشەنى مەن قىتاي مەديا كورپوراتسياسى (CMG) «Silk Way Star» حالىقارالىق جوباسى تۋرالى كەلىسىمگە قول قويدى.
قۇجات قىتاي حالىق رەسپۋبليكاسى ءتوراعاسىنىڭ قازاقستان رەسپۋبليكاسىنا رەسمي ساپارى اياسىندا قابىلداندى. قول قويۋ ءراسىمى ەكى ەل باسشىسى قاسىم-جومارت توقايەۆ پەن ق ح ر ءتوراعاسى شي جينپيڭنىڭ قاتىسۋىمەن ءوتتى.
كەلىسىمگە پرەزيدەنت تەلەراديوكەشەنىنىڭ ديرەكتورى راۋشان قاجىبايەۆا مەن CMG قىتاي مەديا كورپوراتسياسىنىڭ باسشىسى شەن حايسيۋن قول قويدى.
«Silk Way Star» - ورتالىق ازيا ەلدەرى، كاۆكاز جانە قىتاي انشىلەرى قاتىساتىن العاشقى بىرلەسكەن مۋزىكالىق جوبا. جوبا اياسىندا بايقاۋلىق ونەر كورسەتۋلەر، شوۋ باعدارلامالار مەن گالا- كونسەرت جوسپارلانعان. ءار ءتۇرلى تىلدە شىرقالاتىن اندەر مەن جارقىن كروسس-مادەني مۋزىكالىق كوللابوراتسيالار مادەنيەتتەر اراسىنداعى ەرەكشە شىعارماشىلىق ديالوگتى قالىپتاستىرماق. ايماق ەلدەرىنىڭ كورەرمەندەرى Silk Way جانە CGTN تەلەارنالارى ارقىلى جاڭا شوۋدىڭ كوركەم ەپيزودتارىن تاماشالاي الادى.
- بۇگىن قول قويىلعان كەلىسىم ءبىزدىڭ مەديا كومپانيالار اراسىنداعى ىنتىماقتاستىقتىڭ جاڭا كەزەڭىن اشادى. قازاقستان مەن قىتايدىڭ جەتەكشى ەكى مەدياكومپانياسى العاش رەت الەمدىك دەڭگەيدەگى جوبانى بىرلەسىپ جۇزەگە اسىرادى، - دەدى پرەزيدەنت تەلەراديوكەشەنىنىڭ ديرەكتورى راۋشان قاجىبايەۆا.
ال CMG باسشىسى شەن حايسيۋن جوبانىڭ بىرلەسىپ اتقارىلۋى - ەكى كومپانيا ءۇشىن دە ەرەكشە تاجىريبە ەكەنىن ايتتى.
- Silk Way Star جوباسىنىڭ اۋقىمى پرەزيدەنت تەلەراديوكەشەنى مەن قىتاي مەديا كورپوراتسياسى اراسىنداعى ستراتەگيالىق ارىپتەستىك دەڭگەيىنە ساي كەلەدى. ونىڭ بىرلەسىپ اتقارىلۋى - ەكى كومپانيا ءۇشىن دە ەرەكشە تاجىريبە، - دەپ اتاپ ءوتتى CMG باسشىسى شەن حايسيۋن.
سونداي-اق ق ر پرەزيدەنتى تەلەراديوكەشەنى مەن قىتاي مەديا كورپوراتسياسى ب ا ق سالاسىنداعى بىرلەسكەن جوبالاردى ىسكە اسىرۋ جونىندەگى كەلىسىمگە قول قويدى.
ەسكە سالا كەتەيىك، 2024- 2025 -جىلدارى ق ر پرەزيدەنتى تەلەراديوكەشەنى مەن CMG ءبىرقاتار بىرلەسكەن جوبانى تابىستى جۇزەگە اسىردى. اتاپ ايتقاندا: «استانا- بەيجىڭ» تەلەكوپىرى، «SCO — Build Strength Through Multilateral Dialogue» تەلەكونفەرەنسياسى، «SCO Connect» ارنايى شىعارىلىمدارى. سونداي-اق قازاقستاندىق جانە قىتايلىق دەرەكتى فيلمدەرمەن تۇراقتى تۇردە الماسۋ جانە ترانسلياتسيالاۋ جۇزەگە اسىرىلىپ كەلەدى.
ق ر پرەزيدەنتىنىڭ تەلەراديوكەشەنى - تولىق تسيكلدى قازاقستاندىق مەديا- كومپانيا، قۇرامىنا: Jibek Joly رەسپۋبليكالىق تەلەارناسى، Silk Way جانە Silk Way Cinema حالىقارالىق تەلەارنالارى، Kazinform ح ا ا جانە دەرەكتى فيلمدەر ورتالىعى كىرەدى.
قىتاي مەدياكورپوراتسياسى (CMG) - الەمدەگى ەڭ ءىرى مەديا كونگلومەراتتاردىڭ ءبىرى. وعان قىتايدىڭ ورتالىق تەليەۆيزياسى (CCTV) ، قىتايدىڭ حالىقارالىق تەليەۆيزيا جەلىسى (CGTN)، قىتاي ۇلتتىق راديوسى (CNR) جانە قىتاي حالىقارالىق راديوسى (CRI) كىرەدى. كورپوراتسيا قۇرامىندا بارلىعى 47 تەلەارنا، 17 راديوستانتسيا جانە 17 گازەت بار.
ايتا كەتەيىك، 2024 -جىلى قىتاي حالىق رەسپۋبليكاسىنىڭ ءتوراعاسى شي جينپيڭنىڭ قازاقستان رەسپۋبليكاسىنا مەملەكەتتىك ساپارى اياسىندا ق ر پرەزيدەنتىنىڭ تەلەراديوكەشەنى مەن قىتاي مەديا كورپوراتسياسى (CMG) ىنتىماقتاستىق جانە ءوزارا تۇسىنىستىك تۋرالى مەموراندۋمعا قول قويعان بولاتىن.