يۋ قالاسىندا وتكەن رەسمي راسىمدە ءسوز سويلەگەن «Jibek Joly/Silk Way» تەلەارناسىنىڭ باسقارۋشى ديرەكتورى ەركەجان كۇنتۋعان 2025 -جىلعى ماۋسىمدا قازاقستان پرەزيدەنتى قاسىم- جومارت توقايەۆ پەن ق ح ر ءتوراعاسى شي جينپيڭ وسى جوبانى جۇزەگە اسىرۋ تۋرالى كەلىسىمگە قول قويعانىن اتاپ ءوتتى.
- پرەزيدەنت قاسىم-جومارت توقايەۆ ءبىزدىڭ جوبامىزدى «زاماناۋي مادەني ديپلوماتيانىڭ ۇلگىسى» دەپ اتادى. شىعارماشىلىق پەن تالانت ارقىلى ءبىز حالىقتارىمىز اراسىنداعى ءوزارا تۇسىنىستىك پەن دوستىقتى نىعايتامىز. Silk Way Star جوباسىنىڭ باستى ميسسياسى دا وسىندا، - دەدى ەركەجان كۇنتۋعان.
ق ر پرەزيدەنتىنىڭ تەلەراديوكەشەنى مەن قىتايدىڭ CMG مەدياكورپوراتسياسى بىرلەسىپ جۇزەگە اسىرىپ جاتقان جوبانىڭ ەكىنشى ماۋسىمى ەكى ەل اراسىنداعى مادەني-گۋمانيتارلىق جانە مەديا سالاسىنداعى ىنتىماقتاستىقتىڭ جاڭا كەزەڭىنە جول اشادى.
يۋ قالاسىنداعى ءبىر ساحنادا الەمنىڭ 12 ەلىنەن كەلگەن جەتەكشى ۆوكاليستەر ونەر كورسەتەدى. ولار - قازاقستان، قىتاي، قىرعىزستان، رەسەي، ۆەتنام، مالايزيا، تۇركيا، سەربيا، وڭتۇستىك افريكا رەسپۋبليكاسى، جاڭا زەلانديا، برازيليا جانە گرۋزيا وكىلدەرى. قازاقستان اتىنان ءانشى رۋحيا بايدۇكەنوۆا قاتىسادى.
ەكىنشى ماۋسىمنىڭ فورماتى دا جاڭارتىلعان. 10 شىعارىلىم بويى بارلىق قاتىسۋشى جوبادا ونەر كورسەتۋىن جالعاستىرادى، ال جەڭىمپاز جيناعان ۇپايلاردىڭ جالپى ناتيجەسى بويىنشا انىقتالادى.
مۇنداي فورمات كورەرمەندەرگە ءاربىر ورىنداۋشىنى، ونىڭ ۆوكالدىق ەرەكشەلىگىن جانە ءوزى تانىستىراتىن ەلدىڭ مادەنيەتىن تەرەڭىرەك تانۋعا مۇمكىندىك بەرەدى.
ايتا كەتەيىك، پرەزيدەنت Silk Way Star-دىڭ شەتەلدەگى ەلىمىزدىڭ ەڭ تانىمال ءارى بەدەلدى مەدياجوبالارىنىڭ بىرىنە اينالعانىن جەتكىزدى.
اۆتور
اسحات رايقۇل