كوميتەت حالىقتى سۋشي مەن روللداردى تۇتىنۋ كەزىندە ساقتىق شارالارىن ساقتاۋعا جانە ولاردى دايىندايتىن ءارى ساتاتىن ورىنداردى تاڭداۋعا جاۋاپكەرشىلىكپەن قاراۋعا شاقىرادى.
سۋشي مەن روللدار تاعام قاۋىپسىزدىگى تۇرعىسىنان ەرەكشە نازار اۋدارۋدى قاجەت ەتەدى. ولاردى دايىنداۋ كەزىندە شيكى، از تۇزدالعان نەمەسە مارينادتالعان بالىق، تەڭىز ونىمدەرى جانە تەز بۇزىلاتىن باسقا دا ينگرەديەنتتەر پايدالانىلۋى مۇمكىن. بۇل ونىمدەر ءاردايىم تولىق تەرميالىق وڭدەۋدەن وتپەيدى.
— دايىنداۋ، تاسىمالداۋ جانە ساقتاۋ تەحنولوگيالارى بۇزىلعان جاعدايدا مۇنداي ونىمدەر تاعامنان ۋلانۋعا، ءجىتى ىشەك ينفەكسيالارىنا جانە پارازيتتىك اۋرۋلارعا سەبەپ بولۋى مۇمكىن. تاعامنان ۋلانۋ مەن جۇقپالى اۋرۋلاردىڭ الدىن الۋ ءۇشىن تۇتىنۋشىلارعا سۋشي مەن روللداردى قاۋىپسىزدىك تالاپتارىن ساقتايتىن، رەسمي تىركەلگەن قوعامدىق تاماقتانۋ جانە ساۋدا نىساندارىنان عانا ساتىپ الۋ ۇسىنىلادى. ونىمدەردى رۇقسات ەتىلمەگەن ساۋدا ورىندارىنان جانە بەلگىسىز ساتۋشىلاردان ساتىپ الۋعا بولمايدى، — دەپ ەسكەرتتى ماماندار.
ايتۋىنشا، ءونىمدى تاڭداعان كەزدە ونىڭ ساقتاۋ جاعدايلارىنا، سىرتقى ءتۇرى مەن يىسىنە نازار اۋدارۋ قاجەت. بۇزىلۋ بەلگىلەرى بايقالعان سۋشي مەن روللداردى تۇتىنۋعا بولمايدى.
بالالارعا، جۇكتى ايەلدەرگە، ەگدە جاستاعى ادامدارعا جانە يممۋنيتەتى السىرەگەن ادامدارعا ەرەكشە ساقتىق تانىتۋ ۇسىنىلادى، ويتكەنى بۇل ساناتتاعى ادامداردا تاعامدىق ينفەكتسيالار دەنساۋلىققا نەعۇرلىم اۋىر زارداپتار اكەلۋى مۇمكىن.
كوميتەت ازاماتتاردى تاعام قاۋىپسىزدىگى قاعيدالارىن ساقتاۋعا، سۋشي مەن روللداردى ساتىپ الاتىن ورىنداردى تاڭداۋعا جاۋاپكەرشىلىكپەن قاراۋعا جانە ءوز دەنساۋلىعى مەن جاقىندارىنىڭ دەنساۋلىعىن قورعاۋ شارالارىن قابىلداۋعا شاقىرادى.
بۇعان دەيىن ماڭعىستاۋدا بالىقتان ۋلانعان ءتورت ادام جانساقتاۋ بولىمىنە تۇسكەنىن جازعانبىز.