سۋديالار دەربەستىگىندە جاڭا رەفورمالار ەرەكشە اسەر ەتتى - جوعارعى سوت ءتوراعاسى

استانا. KAZINFORM - جوعارى سوت كەڭەسى ۇزدىك حالىقارالىق ستاندارتتارعا جاۋاپ بەرەتىن ورگانعا اينالدى. بۇل تۋرالى قازاقستان سۋديالارىنىڭ سەزىندە جوعارعى سوت ءتوراعاسى اسلامبەك مەرعاليەۆ ءمالىم ەتتى.

«سۋديالاردىڭ ناقتى تاۋەلسىزدىگىن قامتاماسىز ەتۋدە جوعارى سوت كەڭەسىنىڭ رەفورمالارى ەرەكشە ءرول اتقاردى. مەملەكەت باسشىسىنىڭ كەلىسىمى بويىنشا جوعارى سوت كەڭەسى ۇزدىك حالىقارالىق ستاندارتتارعا جاۋاپ بەرەتىن جانە سوت بيلىگىنىڭ بارلىق دەڭگەيلەرىن بىلدىرەتىن تولىققاندى سۋديالىق ءوزىن- ءوزى باسقارۋ ورگانىنا اينالدى. 2019-جىلدان باستاپ كەزەڭ-كەزەڭىمەن سوت جۇيەسىنىڭ بارلىق كادر ماسەلەلەرى، سونىڭ ىشىندە سوت تورەلىگى اكادەمياسى مەن سوت جيۋريى جوعارى سوت كەڭەسىنىڭ قاراماعىنا اۋىستىرىلدى. وسىلايشا، قازىر جوعارى سوت كەڭەسى سوت كادرلارىنا، ولاردىڭ بىلىكتىلىگىنە، ودان ءارى مانساپتىق وسۋىنە جانە قۇرمەتتى وتستاۆكاعا شىعۋىنا تولىق جاۋاپ بەرەدى. بۇل رەتتە بارلىق دەڭگەيدەگى ءتوراعالار سۋديالاردىڭ كادرلىق ماسەلەلەرى مەن مانسابىنا ىقپال ەتۋ مۇمكىندىگىنەن ايىرىلدى»، - دەدى ا. مەرعاليەۆ.

سونىمەن قاتار ول سۋديالاردىڭ جاۋاپكەرشىلىگىن ارتتىرۋ ماقساتىندا تارتىپتىك ءىس جۇرگىزۋدى قوزعاۋدىڭ جاڭا تەتىگى ازىرلەنگەنىن ايتتى.

«ەندى جوعارى سوت كەڭەسى جانىنداعى سوت جيۋريى سۋديانىڭ زاڭدىلىقتى ورەسكەل بۇزعانى تۋرالى كورسەتىلگەن ءاربىر كۇشىن جويعان سوت اكتىسىن تەكسەرەتىن بولادى. كونستيتۋتسيالىق سوتتىڭ ۇسىنىسى بويىنشا زاڭدى ورەسكەل بۇزۋ ولشەمشارتتارىن زاڭنامالىق بەكىتۋ ماسەلەسى پىسىقتالدى»، - دەدى جوعارعى سوت ءتوراعاسى.

ونىڭ ايتۋىنشا، جوعارعى سوت جانىنداعى سوت تورەلىگىنىڭ ساپاسى جونىندەگى كوميسسيانىڭ جۇمىسى جەتىلدىرىلدى.

«اپەللياتسيالىق ساتىنىڭ ءرولى كۇشەيتىلدى. بىلتىر شىلدەدەن باستاپ اپەللياتسيالىق سوتتار ىستەردى قايتارۋدى توقتاتتى»، - دەدى اسلامبەك مەرعاليەۆ.