Mecenat.kz ادەبي سىيلىعى - قازىرگى قازاقستان تۋرالى ۇزدىك رومانعا بەرىلەتىن جىل سايىنعى ادەبي ماراپات.
جوبا وتاندىق كوركەم ادەبيەتتى دامىتۋعا، قالامگەرلەردى قولداۋعا، وقىرمان قىزىعۋشىلىعىن ارتتىرۋعا جانە قازاقستاندىق شىعارمالاردى حالىقارالىق دەڭگەيدە تانىتۋعا باعىتتالعان تاۋەلسىز ازاماتتىق باستاما سانالادى.
بيىل بايقاۋعا 33 ءوتىنىم تۇسكەن.
بەسىنشى ماۋسىمنىڭ قورىتىندىسى بويىنشا جازۋشى ەسبولات ايدابوسىن «بۇكىر» رومانى ءۇشىن جەڭىمپاز اتاندى.
«بۇكىر» رومانى جىلقى تاعدىرى ارقىلى ادام قادىرى، الەۋمەتتىك تەڭسىزدىك، ار-نامىس پەن رۋحاني ىزدەنىس ماسەلەلەرىن ارقاۋ ەتەدى.
جەڭىمپازعا Freedom Life ءومىردى ساقتاندىرۋ كومپانياسى قازاقستان ۇلتتىق بانكىنىڭ تولەم جاسالعان كۇنگى باعامىنا سايكەس ءومىر بويى اي سايىن 500 ا ق ش دوللارى كولەمىندە تولەنەتىن ەرىكتى اننۋيتەتتىك ساقتاندىرۋ ءپوليسىن تابىستادى.
ءىس-شاراعا مادەنيەت جانە اقپارات ۆيتسە-ءمينيسترى رۇستەم ءالي، سىيلىق مەتسەناتى ءارى Freedom Holding Corp. باس اتقارۋشى ديرەكتورى تيمۋر تۋرلوۆ، جوبا نەگىزىن قالاۋشى ەرلان اسقاربەكوۆ، بايقاۋعا قاتىسۋشىلار مەن وقىرماندار قاتىستى.
سالتاناتتى ءراسىم بارىسىندا بەسىنشى جانە التىنشى ماۋسىمداعى جاڭاشىلدىقتار تانىستىرىلىپ، بايقاۋدىڭ بەس ماۋسىمى تۋرالى دەرەكتى فيلم كورسەتىلدى.
ايتا كەتەيىك، مايدانگەرلەر ەرلىگىنە ارنالعان كىتاپ كورمەسى ءوتتى.