سايىن دالاعا سىر: كەيكى باتىر كەسەنەسى
كەيكى باتىر كەسەنەسى امانگەلدى اۋىلىنا اپارار جول بويىندا ورنالاسقان. كەسەنە دالالىقتا مەنمۇندالاپ تۇر، دەپ حابارلايدى Kazinform ءتىلشىسى.
كەيكى باتىر - 1916 -جىلعى ۇلت- ازاتتىق كوتەرىلىسىنىڭ قاھارمانى، حالىق باتىرى، ەل قورعانى. احمەت بايتۇرسىنوۆ اتىنداعى قوستاناي وڭىرلىك ۋنيۆەرسيتەتى تاريح عىلىمدارىنىڭ كانديداتى، قازاقستان حالقى اسسامبلەياسى عىلىمي- ساراپتامالىق توبىنىڭ مۇشەسى ايبەك شالعىمبەكوۆتىڭ ايتۋىنشا، كەيكى باتىر (نۇرماعانبەت كوكەمباي ۇلى) 1871 -جىلى توعاي ۋەزى، قازىرگى قوستاناي وبلىسى اۋماعىندا ومىرگە كەلگەن. 1923 -جىلدىڭ كوكتەمىندە ونى جۇبايىمەن جانە ىنىسىمەن بىرگە ءولتىرىپ كەتتى. ولاردىڭ دەنەسى تابىلمادى. ادامدار بويىنا ۇرەي مەن قورقىنىش ۇيالاتۋ ءۇشىن باسىن تورعايداعى الاڭعا ءىلىپ قويدى، كەيىن ورىنبورعا، سانكت-پەتەربۋرگكە جىبەرىلدى. سول جاقتاعى كۋنست كامەرادا «اتاقتى قىرعىز قاراقشىسىنىڭ باسسۇيەگى» دەگەن جازۋمەن ساقتالادى.
- 2015 -جىلى قازاق حاندىعىنىڭ 550 جىلدىعى اياسىندا جۇرگىزىلگەن عىلىمي ەكسپەديتسياعا قاتىسۋعا مۇمكىندىك تۋدى. سول كەزدە ءبىز قوستاناي وبلىسىنىڭ كيەلى جەرلەرىن ارالادىق. جەرگىلىكتى ولكەتانۋشىلار كەيكى باتىردىڭ تۋعان جەرىن، ول جاسىرىنعان اۋماقتى، دەنەسى جەرلەنگەن جەردى كورسەتتى. زەرتتەۋشىلەر ءۇشىن وسى دەرەكتى ناقتىلاۋ جانە ساقتاۋ قاجەت بولدى. ونىڭ باس سۇيەگىن ەلگە اكەلۋ بىرنەشە ۇرپاقتىڭ ارمانى ەدى، - دەدى تاريح عىلىمدارىنىڭ كانديداتى.
قازاقستاندىق عالىمدار، جازۋشىلار، قوعام قايراتكەرلەرى باتىردىڭ باسسۇيەگىن ەلگە قايتارۋ تۋرالى جازىپ، ايتتى. 2016 -جىلى ۇكىمەتارالىق كەلىسىمنەن سوڭ باتىردىڭ باسسۇيەگى ەلگە جەتكىزىلىپ، كەيىن ۆەنگرياعا انتوپولوگيالىق ساراپتاماعا جىبەرىلدى. ماماندار باسسۇيەكتىڭ باتىرعا تيەسەلى ەكەنىن دالەلدەپ، كەيىن ءتۇر- سۇلباسىن جاساپ شىقتى. زەرتتەۋ كەزىندە باسىنا 7 رەت قاتتى سوققى تيگەنى دالەلدەندى.
2017 -جىلى باتىردىڭ باس سۇيەگى تورعاي-ارقالىق تاسجولى ماڭىنداعى مەموريالدىق كەشەنگە جەرلەندى. كەيكى باتىر كەسەنەسى اشىق ءتۇستى كىرپىشتەن قالانىپ، كۇمبەزىنە جارتى اي قويىلدى. ىشىنە ەنگەن ادام قىزىل ءتۇستى گرانيت تاستان جاسالعان بەلگىنى كورەدى. كەشەن اينالاسى تەمىر قورشاۋمەن قورشالعان.
كەشەن كەيكى باتىر ۇرپاقتارى عانا ەمەس، كۇللى قازاق ەلى ءتاۋ ەتەر ورىنعا اينالدى. قازاقستاننىڭ كيەلى ورىندار كارتاسىنا ەندى. مۇندا زەرتتەۋشىلەر، تۋريستەر دە كەلەدى.
Kazinform بۇعان دەيىن تۇركىستان-ءسىبىر تەمىرجولى تۋرالى جازدى. دەرەكتەرگە سۇيەنسەك، تۇركسىبتەگى نەگىزگى جۇكتەر ترانزيتپەن، مىسالى سەمەيدەن ارىسقا دەيىن باعىتتالىپ وتىرعان.
اۆتور
التىناي ساعىندىقوۆا