قۇندى جادىگەردى قايراتكەردىڭ نەمەرەسى بولات شانين بۇقار جىراۋ اتىنداعى ادەبيەت جانە ونەر مۋزەيىنە تابىستادى.
الاش ارداقتىسىنىڭ كوزى تىرىسىندە كيگەن شەكپەنى ونداعان جىل بويى تۋىستارىنىڭ ساندىعىندا ساقتالعان. سيرەك جادىگەردى 2017-جىلى بەلگىلى اقىن، ەكىباستۇز قالالىق «وتارقا» گازەتىنىڭ رەداكتورى جانارگۇل قادىروۆا ىزدەستىرىپ ءجۇرىپ تاپقان.
جادىگەر جۇمات شانيننىڭ تۋعان اۋىلىنىڭ ىرگەسىندەگى جارىلعاپ بولىمشەسىندە تۇراتىن بالتاباي كابيرا ۇلىنىڭ ۇيىندە ساقتالىپ كەلگەن. جەرگىلىكتى جۇرت بۇل شاڭىراقتى «شانانىڭ قاراشاڭىراعى» دەپ اتايدى. بالتاباي اقساقال - شانا اتانىڭ تۋعان شوبەرەسى.
جانارگۇل قادىروۆا شەكپەننىڭ قالاي ساقتالىپ قالعانىن دا ايتىپ بەردى.
- قۇربىم پاكيزات بالتاباي اعانىڭ قىزى. بىردە الاش ارداقتىسىنان قالعان زات بار ما دەپ سۇراعانىمدا، وسى شەكپەن جۇك اراسىنان شىعا كەلمەسى بار ما! «اتام نۇرشەكە - شانانىڭ بەس ۇلىنىڭ كەنجەسى. ال شەكپەندى مۇستافانىڭ (ول دا شانانىڭ ۇلى) بالاسى بەيسەنباي مارقۇم جۇماتتىكى دەپ ماعان بەرگەن» دەگەن ەدى بالتاباي اتا، - دەيدى ول.
جۇمات ءشانيننىڭ 100 جىلدىق مەرەيتويى تۋعان جەرىندە اتالىپ وتكەن كەزدە قايراتكەردىڭ نەمەرەسى بولات شانين اتاسىنان قالعان شەكپەندى العاش كورىپ، ەرەكشە تولقىعان. ءتىپتى ونى كيىپ، اتاسىنا دەگەن ساعىنىشىن باسقان. كەيىننەن جادىگەردى الماتىعا الىپ كەتكەن. سودان بەرى وتباسىلىق مۇرا رەتىندە ساقتالىپ كەلگەن شەكپەن ەندى تاريحي وتانىنا ورالدى.
بۇقار جىراۋ اتىنداعى ادەبيەت جانە ونەر مۋزەيىنىڭ قىزمەتكەرلەرى الماتىعا ارنايى بارىپ، جادىگەردى ەرتىس-بايان وڭىرىنە جەتكىزدى. مۋزەي باسشىسى ەربول قايىروۆتىڭ ايتۋىنشا، تۇيە جۇنىنەن تىگىلگەن شەكپەننىڭ باستاپقى قالپى جاقسى ساقتالعان.
- مۋزەيىمىزدىڭ قورى قۇندى جادىگەرمەن تولىقتى. الاش قايراتكەرى، كاسىبي قازاق تەاترىنىڭ نەگىزىن قالاۋشى، اكتەر، رەجيسسەر جۇمات شانيننىڭ نەمەرەسى بولات شانين اتاسىنىڭ تۇيە جۇنىنەن تىگىلگەن شەكپەنىن تابىستاپ، مادەني مۇراعا دەگەن ادالدىعىن تانىتتى. جۇمات اتامىزدىڭ تەرى سىڭگەن جادىگەردىڭ ءوڭى بۇزىلماعان، سول زامانعى مانەردە تىگىلگەن. جادىگەر مۋزەيگە كەلۋشىلەردىڭ قىزىعۋشىلىعىن ارتتىرىپ، زەرتتەۋشىلەر ءۇشىن ۇلكەن ولجا بولاتىنى انىق، - دەدى ەربول قايىروۆ.
وسىلايشا، تالاي جىل وتباسىلىق جادىگەر رەتىندە ساقتالعان تاريحي شەكپەن ەندى كوپشىلىك نازارىنا ۇسىنىلىپ، جۇمات ءشانيننىڭ ءومىرى مەن شىعارماشىلىعىن زەرتتەۋگە مۇمكىندىك بەرمەك.
بۇعان دەيىن پاۆلوداردا جانبيكە شانينانىڭ پورترەتى ساقتالىپ تۇرعانىن جازعانبىز.
سونداي-اق جاقىندا پاۆلودار ءوڭىرىنىڭ تۋماسى، داۋلەسكەر كۇيشى رۇستەمبەك وماروۆتىڭ نەمىس تۇتقىنىندا تۇسىرىلگەن فوتوسۋرەتى تابىلدى.
فوتو - بۇقار جىراۋ اتىنداعى ادەبيەت جانە ونەر مۋزەيى.