ساياسي پارتيالاردىڭ قۇرىلتاي سايلاۋى الدىنداعى سوڭعى تەلەدەباتى اياقتالدى

«دامىعان ەكونوميكا - قۋاتتى قوعام» تاقىرىبىنداعى ءسوز دوداسىندا ءتورت كەزەڭ بولدى.
جوبادا ساياسي پارتيالار جەتەكشىلەرى جەرەبە تارتۋ ناتيجەسى بويىنشا بەلگىلەنگەن مىنا رەتتىلىك بويىنشا ءسوز تىزگىنىن الدى:
1. Respublica پارتياسىنىڭ ءتوراعاسى - ايداربەك قوجانازاروۆ؛
2. Baytaq پارتياسىنىڭ ءتوراعاسى - ازاماتحان امىرتايەۆ؛
3. «اق جول» دەموكراتيالىق پارتياسىنىڭ ءتوراعاسى - دانيا ەسپايەۆا؛
4. «ادىلەت» پارتياسىنىڭ ءتوراعاسى - ايبەك دادەباي؛
5. «اۋىل» پارتياسىنىڭ ءتوراعاسى - قايرات ايتۋعانوۆ؛
6. قازاقستاننىڭ جالپىۇلتتىق سوتسيال-دەموكراتيالىق پارتياسىنىڭ ءتوراعاسى - اسحات راقىمجانوۆ؛
7. قازاقستان حالىق پارتياسىنىڭ ءتوراعاسى - نۇرسۇلتان شوقانوۆ.
ءبىرىنشى كەزەڭدە ءار قاتىسۋشى ءوز پارتياسىنىڭ سايلاۋالدى باعدارلاماسىن تانىستىردى. ولار نەبارى 2,5 مينۋتتا پارتياسىنىڭ باستى ماقساتتارىن، نەگىزگى تۇجىرىمداماسىن جانە بۇعان دەيىن اتقارعان جۇمىستارىن تانىستىرۋعا ءتيىس بولدى. ءارقايسىسى حالىقتىڭ الەۋمەتتىك جاعدايىن قالاي جاقسارتاتىنىن مالىمدەۋمەن بىرگە، وزگە پارتيالاردىڭ قىزمەتىن سىنعا الدى.
ەكىنشى كەزەڭدە پارتيا باسشىلارى ءبىر-بىرىنە سۇراق قويدى. ساۋال جولداۋعا 1 مينۋت، ال وعان جاۋاپ بەرۋگە 2 مينۋت بەرىلدى. وسىلايشا، قۇرىلتاي دەپۋتاتتىعىنا ۇمىتكەرلەر ءبىر-ءبىرىنىڭ سايلاۋالدى باعدارلامالارىنان قانداي دا ءبىر كەمشىلىك تاۋىپ، سوزدەن تۇقىرتۋعا تالپىندى.
ءۇشىنشى كەزەڭ دە ەرەكشە ءوتتى. ويتكەنى، كورەرمەندەر كوكەيىندەگى سۇراقتارىن بايلانىس ورتالىعىنا ءبىر اپتا بويى جولدادى. جالپى، 58746 ساۋال جينالدى. سولاردىڭ ىشىنەن ەڭ وزەكتى 14 سۇراق ىرىكتەلىپ، جەتى پارتيا باسشىلارىنا 2 ساۋالدان قويىلدى. ولاردىڭ ءارقايسىسىنا قاتىسۋشىلار ەكى مينۋت ىشىندە جاۋاپ بەرۋگە مىندەتتەلدى.
قورىتىندى ءبولىم ءتورتىنشى كەزەڭدە قاتىسۋشىلار ەلەكتوراتقا قايرىلدى. ولاردىڭ ءارقايسىسى 2 مينۋت بويى بار شەشەندىك ونەرىن سالىپ، ۋادەلەرى مەن جوسپارلارىنا بۇقارانى سەندىرۋگە كۇش سالدى. جەتى پارتيا ءتوراعالارى حالىقتىڭ سەنىمىن اقتاپ، ەلدى ورگە سۇيرەيتىنىن مالىمدەدى.
ەسكە سالايىق، قۇرىلتاي سايلاۋى الدىنداعى تەلەدەبات وسىمەن ءتورتىنشى رەت ۇيىمداستىرىلدى. ءسوز سايىسى بۇل جولى 24KZ تەلەارناسىنىڭ تىكەلەي ەفيرىندە كورسەتىلدى.