ساياسات نۇربەك ۇ ب ت-دا 140 بال جيناعان قوسشى قالاسىنىڭ تۇلەگىن قۇتتىقتادى

استانا. KAZINFORM - عىلىم جانە جوعارى ءبىلىم ءمينيسترى ساياسات نۇربەك ۇلتتىق ءبىرىڭعاي تەستىلەۋدە بيىل ەلىمىزدە 140 بال جيناعان ەكىنشى تالاپكەر - اقمولا وبلىسىنىڭ قوسشى قالاسىنىڭ تۇلەگى ايىم ەرجانوۆانى قۇتتىقتادى

مينيسترلىكتىڭ مالىمەتىنشە، بۇل جەتىستىك IELTS حالىقارالىق سەرتيفيكاتىنىڭ بالدارىن ۇ ب ت بالدارىنا اۋىستىرۋ جانە ۇ ب ت ناتيجەسىن ەسەپكە الۋ ارقاسىندا مۇمكىن بولدى.

«ايىم ەرجانوۆانى ەرەكشە جەتىستىگىمەن قۇتتىقتايمىن. بۇل قاجىرلى ەڭبەك پەن بىلىمگە دەگەن ۇمتىلىستىڭ ناتيجەسى. ءسىزدىڭ جەتىستىگىڭىز بارلىعىمىزدى شابىتتاندىرادى جانە قازاقستاندىق جاس تالانتتاردىڭ حالىقارالىق ارەنادا ۇلكەن بيىكتەرگە جەتۋگە قابىلەتتى ەكەنىن كورسەتەدى. سىزگە وقۋدا جانە بولاشاق مانساپتا ودان ءارى تابىس تىلەيمىن!» - دەدى مينيستر.

مينيسترمەن كەزدەسۋگە ايىمدى قولداۋعا ونىڭ جاقىندارى دا كەلدى، ولار ۇ ب ت ناتيجەسىن بىلگەندە قاتتى قۋانعانىن جانە ۇمىتتەرى اقتالعانىن ايتتى. ساياسات نۇربەك تالاپكەردىڭ جاقىندارىنا نەمەرەلەرىنىڭ جەتىستىكتەرىندە ولاردىڭ كورسەتكەن قامقورلىعى ماڭىزدى ءرول اتقارعانىن اتاپ ءوتىپ، بىلىمىنە باعا جەتپەس قولداۋى مەن قوسقان ۇلەسى ءۇشىن العىسىن ءبىلدىردى.

ايىم ەرجانوۆا ۇ ب ت-نى ءتورت ءپان بويىنشا تاپسىرىپ، 90 بال جينادى. سونىمەن قاتار ول «اعىلشىن ءتىلى» ءپانى بويىنشا بالداردى اۋىستىرۋ ءۇشىن IELTS حالىقارالىق سەرتيفيكاتىن ۇسىندى. ەرەجەلەرگە سايكەس، IELTS بالدارىن ۇ ب ت بالدارىنا اۋىستىرۋ ءبىلىم بەرۋ گرانتتارىن تاعايىنداۋ كونكۋرسىنا ءوتىنىش بەرىپ، سەرتيفيكاتتىڭ راستىعى انىقتالعان سوڭ ج و و-نىڭ قابىلداۋ كوميسسياسى ارقىلى جۇزەگە اسىرىلادى. وسىلايشا ايىم 140 بالدىڭ ەكىنشى يەگەرى اتاندى جانە كونكۋرسقا ەڭ جوعارى بالمەن قاتىستى.

«ەڭبەگىم مەن ۇمتىلىسىم اقتالىپ، ونى باعالاپ جاتقاندارىڭىزعا ۇلكەن العىسىمدى بىلدىرەمىن. بۇل جەتىستىك مەنىڭ عانا ەمەس، ماعان بارىنشا قولداۋ كورسەتكەن جانداردىڭ ارقاسىندا. مەنىڭ جەتىستىگىم ءبىلىم مەن جوعارى ناتيجەگە ۇمتىلاتىن باسقا تالاپكەرلەرگە دە ۇلگى بولادى دەپ ۇمىتتەنەمىن»، - دەپ قۋانىشىمەن ءبولىستى.

مينيستر سونداي-اق ۇ ب ت-داعى قازاقستاندىق تالاپكەرلەردىڭ جوعارى ناتيجەلەرى ەلىمىزدە ساپالى ءبىلىم الۋعا ۇمتىلىستىڭ كورسەتكىشى بولىپ تابىلاتىنىن اتاپ ءوتتى.

ەستەرىڭىزگە سالا كەتەيىك، 2021 -جىلدان بەرى العاش رەت تۇلەكتەر ۇ ب ت-دا 140 بال جينادى. كەزدەسۋ سوڭىندا ايىمنىڭ اجەسى باتا بەرىپ، بارلىق تۇلەكتەرگە وزدەرى ارمانداعان بيىكتەرگە جەتۋدى تىلەدى.

اۆتور
ەلميرا ورالبايەۆا